MANLAENLAEN NA AKTIBIDAD ISASAGIBO SA ENVIRONMENT MONTH

SYUDAD NIN LEGAZPI, MAYO 30 – NAGKAKAPIRA SA MGA AKTIBIDAD NA IBUBUSOL KAN DEPARTMENT OF ENVIRONMENT AND NATURAL RESOURCES (D-E-N-R) KATAKOD KAN SELEBRASYON NIN ENVIRONMENT MONTH IYO AN MEDIA BRIEFING SA ENVIRONMENT DAY SA HUNYO 5 NA TUTUNGKUSAN AN IBA-IBANG PROGRAMA SAKA PROYEKTO SA PANGANGATAMAN KAN KAPALIBUTAN; PANDUWANG BIODIVERSITY CHALLENGE SA HUNYO 15 NA PAPARTISIPARAN NIN IBA-IBANG AHENSIYA DE GOBYERNO, INDUSTRIYA ASIN IBA PA; ENVIRO-ROCK JAM NA TATAMPUKAN NIN MGA BANDA NA UGOS SA KAPALIBUTAN.

SEMINAR SA DISASTER RISK REDUCTION BUDA CLIMATE CHANGE ADAPTATION SA HUNYO 11; POLLUTION CONTROL OFFICERS TRAINING SA HUNYO 13 SAGKOD 15; ARBOR DAY SA HUNYO 14, EAGLE QUIZ CONTEST ENTRI KAN MANLAEN-LAEN NA GRADE SIX SAKA FOURTH YEAR HIGH SCHOOL NA ESTUDYANTE NA KUN SAEN AN PROVINCIAL ELIMINATION ISASAGIBO SA HUNYO 21; PAGLANSAR NIN “LINIS SALOG” SA ANOM NA PROBINSIYA KAN REHIYON DANGAN AN EAGLE QUIZ FINALS SAGKOD SARINGAYA AWARDS SA HUNYO 29 NA IYO MAN AN MASARADO SA SANGBULAN NA OBSERBASYON KAN ENVIRONMENT MONTH.

SINABI NI REGIONAL EXECUTIVE DIRECTOR JOSELIN MARCUS FRAGADA NA DAHILAN TA AN BULAN NIN HUNYO OROG MAHALAGANG OKASYON SA PANGANGATAMAN KAN KAPALIBUTAN PINAGMAWOT KAN DEPARTAMENTO NA MAGTULOD NIN MGA AKTIBIDAD TANGANI TAWAN INI NIN DOON.

SEGUN KAY RED FRAGADA, NAIBALANGIBOG NAMAN SA MAN-IBA-IBANG STAKEHOLDERS AN OKASYON TANGANING MAGSABIT SINDA NIN STREAMERS SA PAGPAHAYAG NIN SUPORTA DIGDI, SIRING MAN MAGKONDUKTA NIN KAPAREHAS NA AKTIBIDAD NGANING MA-ENGANYAR AN PUBLIKO NA MAKISUMARO.

AN WORLD ENVIRONMENT DAY SA HUNYO 5 IGWA NIN TEMANG “GREEN ECONOMY: DOES IT INCLUDE YOU?”

AN OBSERBASYON KAN ENVIRONMENT MONTH NAKAPALAOG SA PRESIDENTIAL PROCLAMATION NUMERO 237 KAN 1988, NA MAY KATOYOHON NA PAKUSUGON AN KAARAMAN KAN PUBLIKO SA PANGANGATAMAN ASIN PAG-PROTEHIR KAN RECURSUS NATURALES BUDA KAPALIBUTAN. (Ruby Mendones, DENR-V/ PIA Sorsogon)