81 DAYUHAN NAGTATRABAHO SA MINA SA BICOL

LEGAZPI CITY, SETYEMBRE 27 – OTSENTA Y UNONG (81) DAYUHAN AN NAGTATRABAHO SA MANLAIN-LAIN NA MINA SA BICOL. INI SOSOG SA IMPORMASYON KAN MINES AND GEOSCIENCES BUREAU O M-G-B REGIONAL OFFICE 5.

BASADO SA IMPORMASYON, KAGABSAN KAN MGA DAYUHAN IGWA NIN NAGKAKANIGONG PAPELES O WORKING VISA PARA SA PAG-EMPLEO NINDA SA MGA MINA NA NAG-OOPERAR SA REHIYON.

NAPAPALAMAN SA LISTAHAN NA AN MASBATE GOLD PROJECT SA AROROY, MASBATE AN MAY PINAKADAKUL NA DAYUHANG EMPLEYADO NA NAIPAMUGTAK SA 33 KATAWO; MINASUNOD AN BICOL CHROMITE AND MANGANESE CORP. SA LAGONOY, CAMARINES SUR NA IGWA NIN 16 KATAWO; GOODFOUND CEMENT CORP. SA CAMALIG, ALBAY NA MAY 14 KATAWO; UNI-DRAGON MINING DEVELOPMENT CORP. SA PARACALE, CAMARINES NORTE NA MAY 7 KATAWO; INVESTWELL RESOURCES INC. SA JOSE PANGANIBAN NA IGWANG 7 KATAWO SAKA RAPU-RAPU POLYMETALLIC PROJECT SA ISLANG RAPU-RAPU SA ALBAY NA MAY APAT (4) KATAWO.

KADAKLAN SA MGA DAYUHANG EMPLEYADO SA MINA IYO AN MGA AUSTRALYANO BUDA TSINO NA NAKA-TOKA SA MGA TECHNICAL ASIN SPECIALIZED NA TRABAHO SA PAGMIMINA. NAPAG-ARAMAN PA NA IGWA MAN NIN SUPISYENTENG PAPELES AN MGA INI PARA MAKAPAGTRABAHO SA MGA NAUNAMBITANG KOMPANIYA.

SA IBONG NA LADO, ENOT NANG IPINAGKLARAR NI M-G-B REGIONAL DIRECTOR THEODORE ROMMEL PESTAÑO NA KAIPUHAN NINDANG PAG-ADALAN AN MGA KWALIPIKASYON KAN MGA DAYUHANG NAGTATRABAHO SA MINA SOSOG MAN SA IPINAGBOBOOT KAN LEYE. (Ruby Mendones, DENR-V/PIA Sorsogon)