Ni: Bennie A. Recebido
Sorsogon City, April 26 (PIA) – Patuloy pa rin ang pagdagsa ng mga pasahero sa mga pantalan at terminal ng bus dito matapos ang mahabang bakasyon dahilan sa paggunita sa Semana Santa.
Sa ulat na nakarating sa PIA Sorsogon, fully booked hanggang sa Miyerkules, April 27, ang mga istasyon o terminal ng mga bus dito.
Maging sa mga pantalan ng Pilar, Bulan at Matnog ay dagsa din ang mga pasaherong bibyahe patungong Maynila, Masbate, Visayas at Mindanao.
Kaugnay nito patuloy din ang pinagsanib na pwersa ng mga kapulisan at Philippine Coast Guard sa pagtiyak sa kaligtasan at seguridad ng mga pasahero at ng mga bagahe nito.
Samantala, fully booked naman hanggang unang linggo ng Hunyo ang karamihan sa mga pangunahing hotel at inn sa Sorsogon dahilan sa pamamalagi ng mga bakasyunista at turista kahit pa nga tapos na ang holy week.
Maliban kasi sa pamosong Butanding at firefly watching sa Donsol ay patok din sa mga bakasyunista at turista ang Bulusan Lake, mga paliguang tulad ng Orok Spring sa Casiguran, San Benon Hot Spring sa Irosin , Paguriran Island sa Sorsogon City, maging ang mga magagandang tanawin sa Energy Development Corporation at iba pang mga eco-tourism destinations dito ay patok din sa mga turista . (PIA Sorsogon)
No comments:
Post a Comment