LEGAZPI CITY, August 09 – SUHAY SA IMPORMASYON NA MAY DIIT NA DIPERENSYA AN GEOHAZARD MAPS NIN KABIKOLAN, TINAWAN NIN ASEGURASYON KAN DEPARTMENT OF ENVIRONMENT AND NATURAL RESOURCES O D-E-N-R SA PAAGI KAN MINES AND GEOSCIENCES BUREAU O M-G-B AN TOLTOL NA PAGPA-OTOB KAN GEOLOGIC HAZARD MAPPING SA RONA.
TINAWAN NIN DOON NI GEOSCIENCES DIVISION CHIEF ARLENE DAYAO, KAN MINES AND GEOSCIENCES BUREAU NA ENTERONG BANWAAN BUDA BARANGAY NA SINAKOB KAN PAGBAHA DANGAN PAGTIRIS NIN DAGA O LANDSLIDE NA DARA KAN BAGYONG JUANING NASA DELANTERA NIN PELIGRO SOSOG SA GINIBONG GEOHAZARD MAPS KAN AHENCIA.
TINAWAN NIN PALIWANAG NI DAYAO NA NAGKAKAPIRANG LUGARES SA ALBAY IYO AN KONSIDERADONG NASA MODERATE TO HIGHLY SUSCEPTIBLE AREAS SA LANDSLIDES BASE SA GEOHAZARD MAPS NINDA. PIGTAONG EHEMPLO NIYA AN KADAKUL NA NANGYARING PAGRASAY NIN DAGA SA MT. MASARAGA NA KAWSA NIN DAKULANG VOLUME NIN URAN DARA KAN BAGYONG JUANING. SOSOG SA MAPA, INING MGA LUGAR NA INI TALAGANG MODERATE TO HIGHLY SUSCEPTIBLE.
“AN NANGYARING PAGTUPAG NIN DAGA SA BARANGAY GABON, POLANGUI NA NAKAGADAN NIN TULO KATAWO NASA MODERATE TO HIGHLY SUSCEPTIBLE AREA BASE SA PAG-INSPEKSYON SA LUGAR. DAWA PA NGANI AN CENTRO KAN GABON BAKO LANDSLIDE PRONE MAY MGA PARTE AN BARANGAY NA NASA SLOPES O AMPAS, KADAKLAN KAN SLOPES O AMPAS NA INI IGWA NIN LOW SUSCEPTIBILITY ALAGAD SA PAGRASAY NIN DAGA AN NANGYARI SA MODERATE TO HIGHLY SUSCEPTIBLE ZONE” SINABI NI DAYAO.
IDINAGDAG PA NIYA NA AN NANGYARING PAGRASAY NIN DAGA SA GABON KONSEDERADONG TRANSLATIONAL LANDSLIDE NA NA NANGYARI DAHEL SA NATIPON NA GRABENG TUBIG URAN SA LINDERO KAN HIBABAW NA KADAGAAN BUDA KAN MATAGAS NA GAPO SA IRAROM KAINI.
APUERA KAINI, INAKO NIYA MAN NA AN KADAKLAN SA MGA PAGRASAY NIN DAGA IYO AN “FLOW TYPE LANDSLIDE” NA PANGENOT ATRIBUEDO SA PAINGGULPING URAN KAN NAKA AGING BAGYO, PINAG-EHEMPLO MAN NIYA AN PANGYARI SA BARANGAY MALABNIG, GUINOBATAN NA KON SAEN NAGKAPIRANG LUGARES DIGDI AN NASA “MODERATE” SUNDO “LOW SUSCEPTIBILITY” SA PAGTIRIS NIN DAGA AN DAE MAN NAKALIKAY DOLOT MAN KAN GRABENG URAN.
SOSOG KAY DAYAO, PAG TINARAM NA “LOW SUSCEPTIBILITY ZONE” MEDYO HABABA NA MANGGAD AN POSIBILIDAD KAN LUGAR NA MAG-LANDSLIDE, ALAGAD YAON PA MAN GIRARAY AN POSIBILIDAD KAN PAGRASAY NIN DAGA DULO NA KUN GULPING URAN AN HATOD KAN BAGYONG JUANING.
MAKUSOG AN PAGTUBUD NI DAYAO SA INTEGREDAD KAN GEOHAZARD MAPS KAN M-G-B SA KABIKOLAN KON SAEN GABOS NA MGA LUGARES NA NAKABUGTAK SA MAPA IYO AN SYENTO POR SYENTONG NATANTAN O EBALWAR KAN MGA TECHNICAL STAFF KAN AHENCIA. “ALAGAD, SIYEMPRE MAY LIMITASYON MAN SA DETALYE AN MAPA KAN M-G-B TA 1:50,000 SANA AN ESKALA KAINI, KAYA NGANI ANUMAN AN BAGONG GEOHAZARD EVENTS NA NAGYARI PIGDODOKUMENTO KAN AHENCIA PARA MAGAMIT SA PAG-UPDATE ASIN PAG-PAKARHAY SA FUTURO KAN MGA MAPANG INI” IPINAHAYAG PA NIYA.
SAIYANG ABISO SA MGA GOBYERNO LOKAL BUDA DISASTER RISK REDUCTION MANAGEMENT COUNCILS O D-R-R-M-Cs NA TOTOKAN AN PAGPAPAKUSOG KAN PAGBALANGIBOG NIN IMPORMASYON MANONONGOD SA MGA DAPAT ASIN DAE DAPAT GIBUHON SA ORAS NIN BAGYO O PAGBAHA DANGAN PAKUSUGON AN “WARNING” BUDA EVACUATION PLANS ASIN PROCEDURES”.
SEGON SA M-G-B, POON PA KAN TAON 2007 AN PAGHIHRAS NINDA KAN GEOHAZARD MAPS ASIN IMPORMASYON MANONONGOD DIGDI SA PROBINSIYA NIN ALBAY APUERA SA MUNISIPYO NIN JOVELLAR; TAPOS NAMAN AN PAGTATAONG KUWENTA KAN MGA GEOHAZARD MAPS BUDA I-E-C SA SORSOGON BUDA CATANDUANES; MANTANG SA PRESENTE SA CAMARINES SUR NA AN TOTOK KAN PAGBABALANGIBOG NIN IMPORMASYON PARA DIGDI.
MIENTRASTANTO, NATAPOS NAMAN KAN M-G-B CENTRAL OFFICE AN GEOHAZARD MAPPING KAN CAMARINES NORTE. MANTANG, NAGPOON NA MAN AN M-G-B KAN MAS DETALYADONG 1:10,000 NA ESKALA NIN GEOHAZARD SURVEY AND ASSESSMENT NGONIAN NA TAON ALAGAD MAY HALAWIG NA PROCESO INI TA KADAKOL NA DETALYES AN KAIPUHAN REPAROHON SA GROUND O LUGAR DANGAN IPROCESO SA COMPUTER. (JESSEL BASANTA/DENR-EMB/PIA SORSOGON)
No comments:
Post a Comment