Bantay-Dagat ng Donsol makakatanggap ng mga bagong bangka mula sa Provincial-LGU

Ni: Bennie A. Recebido

LUNGSOD NG SORSOGON, April 25 (PIA) – Sa patuloy na pagpupunyagi ng pamahalaang lalawigan ng Sorsogon na mabigyang solusyon ang mga isyung kinasasangkutan ng ilegal na aktibidad sa karagatan partikular sa bayan ng Donsol kung saan libong mga turista ang dumadayo doon, ay higit pang pinaiigting nito ang kampanya sa pamamagitan ng pagdagdag ng kagamitan para sa mga Bantay Dagat.

Sa naging pahayag ni Provincial Tourism Officer Cris Racelis, inihayag nitong naka-iskedyul sa darating na Sabado, Abril 28, and turn-over ng dalawang bagong Bangka para sa Bantay Dagat ng Donsol, Sorsogon.

Ang nasabing mga Bangka ay mula sa provincial government na pinondohan ng P500,000 upang magamit ng mga Bantay Dagat sa operasyon nito bilang bantay at tagapangalaga ng karagatang sakop ng munisipalidad ng Donsol.

Dagdag pa ni Racelis na sa araw ng turn-over ay magkakaroon ng seremonya sa gitna ng dagat na tinaguriang “Alay” kung saan doon na rin mismo babasbasan ang dalawang bangka bago ang aktwal na turn-over.

Habang ginagawa ang seremonya ng “alay” at pagbabasbas ay papalibutan naman ng mga mangingisda ang lugar kung saan idaraos ito bilang pagpapakita ng suporta sa adbokasiyang isinusulong ng Bantay Dagat at ng pamahalaang bayan ng Donsol.

Ayon kay Racelis, sa pagkakaroon ng karagdagang kagamitang ito ay mas magiging mabilis ang pagresponde sa panahong may nagaganap na ilegal na aktibidad sa karagatan at maiiwasan na rin ang anumang mga perwisyong maaaring pag-ugatan ng pagkasira ng natural na yaman at turismo ng Donsol. (BARecebido, PIA Sorsogon)