Akreditasyon ng mga CSOs mahalaga

Ni: Bennie A. Recebido

LUNGSOD NG SORSOGON, Agosto 9 (PIA) – Kakailanganin ng isang civil society organization (CSO) o dating mas kilala sa tawag na non-government organization (NGO) na ma-akredit kung nais nitong mapabilang sa local special bodies sa mga proyektong nais ipatupad ng pamahalaan.

Ito ang inihayag ni Department of Interior and Local Government (DILG) provincial director Ruben Baldeo kung saan sinabi din niyang kapag hindi ito ginawa ng mga CSOs ay maaari itong makunsiderang hindi na aktibo o wala na.

Ayon kay Baldeo, kinakailangang bawat taon ay magpa-akredit ang mga ito sa Sangguniang Panlalawigan, lungsod o bayan.

Nilinaw din ng opisyal na bagama’t sa umpisa lamang ng termino ng mga nahalal na opisyal ng lokal na pamahalaan kailangang ma-akredit ang mga nais mapabilang sa special bodies, kinkailangan pa rin silang magpa-akredit bawat taon upang matiyak na patuloy pa rin ang operasyon ng isang CSO.

Anumang araw ng taon basta’t oras ng opisina ay maaari umanong mag-aplay para sa akreditasyon ang CSO sa mga Sangguniang Panlalawigan.

CSO at pribadong sector ang kailangang bumuo sa sangkapat (1/4) na kasapi ng local development councils.

Ang pagiging bahagi ng CSO at pribadong sector sa local development council, health board, school board, peace and order council at pre-qualification ng bids and awards committee ay nakapaloob sa Local Government Code kung kaya’t mahigpit itong ipinatutupad.

Samantala, hinikayat ni Baldeo ang mga NGO/CSO na sumali sa mga nabanggit na special bodies sapagkat nabibigyan ng kaukulang awtoridad ang mga nagiging kasapi nito.

Sa tala ng Provincial Alliance of Non-Government Organizations and People’s Organizations for Development (PANGOPOD), Inc., aabot sa 43 mga NGOs at POs sa Sorsogon ang kasapi nilang mga organisasyon at akreditado ng Sangguniang Panlalawigan. (BARecebido, PIA Sorsogon/SG)