DENR News Releases

DENR matao nin scholarship sa mga aki kan mga herowe kan kapalibutan

SYUDAD NIN LEGAZPI, Marso 21 (PIA – An Department of Environment and Natural Resources matao nin scholarship o libreng pag-aadal sa mga aki kan mga herowe kan kapalibutan o mga empleyado kan ahensya na nagadan mantang nag-ootob kan saindang katungdanan.

Sinabi ni DENR Bicol Regional Executive Director Gilbert Gonzales na sa ipinaluwas na Memorandum Circular No. 2013-02 ni Environment Sec. Ramon Paje ipigbiklad man an mga panundanan para sa scholarship program na an katoyohan pa-eskwelahon sagkod sa kolehiyo an mga aki kan mga ginadan na empleyado kan ahensya.

Tinawan nin doon ni Director Gonzales na an siring na lakdang sarong pagromdom sa bolaos na serbisyo buda kontribusyon kan mga empleyado kan DENR na nagbuwis nin buhay sa pangangatamanan kan kapalibutan.

Sa lindong kan panundanan, an scholarship award minasakop sa bilog na matrikula kan resipyente sa arin man na State University sa nasyon, kairiba pa an bulanan na sustentong 5,000 pesos, paragasto sa libro buda internet asin iba pang mga pangangaipo sa unibersidad na maabot sa 3,500 pesos. Dugang pa digdi an 10,000 pesos na paragasto sa pagsurat kan thesis, 10,000 pesos na gastos sa graduation dangan duwang libreng byahe pauli-pabalik pagka semestral break.

Sa ibong na lado, kaipuhan mamantini kan iskolar an 2.75 o katampad na grado sa gabos na subheto kaini. (RMendones, DENR-V/PIA Sorsogon)

------------------------------------------------------

DENR Bicol nagpatanid sa kasulo sa kadlagan

SYUDAD NIN LEGAZPI, Marso 21 (PIA) – Sa hampang kan ngapit na tig-initan, nagpatanid an Department of Environment and Natural Resources (DENR) Bicol sa mga insidente nin kasulo sa kadlagan.

Sinabi ni DENR Bicol Regional Executive Director Gilbert Gonzales na mantang an bulan nin Marso pigseselebra bilang Fire Prevention Month, asin an publiko nagtitimaan kan kasulo sa banwaan kaipuhan man na magin marigmat sa kasulo sa kabubuldan.

Saiyang sinabi na an kasulo sa kadlagan pig-aapud na wild o grass fire igwang dara na pag-alaman sa kapalibutan. Dahil an sulo minadulot sa pagkawara kan mahalagang mga sustansya sa daga asin minagadan sa mga saradit na pananom buda hayop na iyo an kawsa sa init nin daga na nakakawara sa nutrihino.

Dahil digdi minaluya man an kakayahan kan daga na makapagpogol nin tubig kun kaya nagkakaigwa nin baha, laen pa an paglangkaw kan init kan kinaban nin huli ta natitipon an aso sa panganoron.

Ipigsadol man ni RED Gonzales an mga mga dapat buda dai-dapat na gibohon para malikayan an kasulo sa kadlagan arog kan: gadanon an kalayo kan apos nin sigarilyo bago iapon; likayan an pagsulo sa babol o kaingin sa mga kaawagan; gumibo nin fireline o kasagkuran kan kalayo bago sumulo nin doot o mga alang na kahoy; gumibo nin kalot para suloan kan ati buda basura; kun nagsagibo nin "bonfire" iharayo ini sa kakahuyan, asin sigurohon man na palsok buda dae nang baga an loon bago ini bayaan. (RMendones, DENR-V/PIA Sorsogon)

---------------------------------------------------------------

DENR Bicol matanom nin 1.2 milyon na katutubong kahoy sa kadlagan

SYUDAD NIN LEGAZPI, Marso 21 (PIA) – Sa kamawotan na maibalik giraray an mga katutubong kahoy sa kadlagan kan rehiyon, matanom nin 1.2 milyon na indigenous species an Department of Environment and Natural Resources (DENR) Bicol sa lindong kan National Greening Program (NGP).

Tinugun na ni DENR Regional Executive Director Gilbert Gonzales an Ecosystem Research and Development Service (ERDS) na magpatambo nin mga katutubong banhi para sa taon na ini.

Saiyang sinabi na kamawotan kan siring na lakdang na tawan nin pagka-Pilipino an NGP kun saen matatabangan pa kaini na maibalik sa dati an kamugtakan kan mga kadlagan.

An mga katutubong kahoy na papatambuon iyo an sambulauan, kupang, bagras, kalumpit, bagalunga, malapapaya, banaba, molave, bitaog, narra, batino, dao, lamio, akleng parang, lumbang, baguilumbang, white lauan, bagtikan, red lauan, almon, mayapis buda iba pang dipterocarps.

Kan naka-aging taon igwa nin 807,000 na katutubong kahoy an napatambo kan DENR parte kan 5.9 milyon na mga poon nin kahoy na pinagtaranom sa manlaen-laen na kabubuldan. (RMendones, DENR-V/PIA Sorsogon)