House Bill 4741 tatalakayin sa Joint Committee Hearing

Ni: Bennie A. Recebido

Sorsogon City, July 1 (PIA) – Isang Joint Committee Hearing sa Sangguniang Panlalawigan ang nakatakdang gawin ngayon kaugnay ng pagbabalik muli ng bayan ng Juban sa unang distrito ng Sorsogon mula sa ikalawang distrito na kasalukuyang kinabibilangan nito.

Sa nakalap na impormasyon ng PIA Sorsogon, ang nasabing committee hearing ay isinagawa upang pag-usapan ang ilang mga isyung maaaring maging hadlang upang tuluyang maisabatas ang House Bill No. 4741 (An Act Reapportioning the Composition of the Legislative District of Sorsogon to include Juban in the 1^st District) na inakda ni Sorsogon First District Congressman Salvador H. Escudero III at co-author naman si 2^nd District Congressman Deogracias Ramos, Jr.

Matatandaang una nang naghayag ng pagtutol si Juban Mayor Jimmy Fragata at mga local na opisyal ng Juban ukol sa pagpapasa ng nasabing panukala dahilan sa pulitika lamang diumano ang pinakadahilan kung bakit parang pinagpapasa-pasahan ang bayan ng Juban, kung saan mula sa pagkakabilang nito sa unang distrito ay inilagay sa ikalawang distrito at ngayon naman ay muling ibabalik sa unang distrito.

Maliban sa mga kasapi ng Sangguniang Panlungsod, dadaluhan ang committee hearing ng mga opisyal ng local na pamahalaan ng Juban, iba pang mga alkalde ng lalawigan at ng dalawang kongresista ng Sorsogon na nasa likod ng isinusulong na House Bill.

Ayon kay Cong. Ramos, karatpatan ng bawat isang makapaghayag ng kanilang saloobin lalo kung ito ay para sa ikabubuti ng komunidad at umaasa siyang malilinawan ng bawat panig ang mga isyu at matukoy ang tunay na prinsipyo sa pagkakahati ng lalawigan ng Sorsogon.

Ang bayan ng Juban ay isang 4^th class municipality na binubuo ng dalawampu’t-limang mga barangay at may mahigit sa dalawampu’t walong libong populasyon base sa datos ng National Statistical Coordination Board (NSCB) noong 2007. (PIA Sorsogon)

Intercropping ipinanawagan ng PCA sa mga cocoteros

Ni: Bennie A. Recebido

Sorsogon City, July 1 (PIA) – Nanawagan ngayon ang Philippine Coconut Authority (PCA) sa mga magsasaka ng niyog dito sa Sorsogon na i-aplay ng mga ito ang sistema ng intercropping sa kanilang mga lupang taniman ng niyog.

Sinabi ni PCA Sorsogon Agriculturist II Romeo Brutamante na mahalaga ang ganitong sistema ng pagtatanim upang higit na maging produktibo ang lupa at mapataas pa ang produksyon ng kanilang ani.

Sinabi rin niya na wala itong epekto sa mga niyog at iba pang uri ng pananim lalo’t kung nasusunod naman ang tamang distansya ng bawat isa, kung kayat hindi dapat mabahala ang mga cocoteros na ipatupad ang ganitong sistema.

Ang intercropping ay isang pamamaraan ng pagtatanim ng dalawa o mas marami pang uri ng pananim sa halip na isahang uri lamang upang higit na makakuha ng malaking ani mula sa isang partikular na lupain.

Ilan sa mga pananim na maaaring gamitin ng mga cocoteros sa kanilang intercropping ay saging, pinya, luya at mabubutong gulay tulad ng sitaw at monggo.

Sinabi ni Brutamante na malaking tulong ang ganitong sistema ngayon lalo pa’t tumataas ang pangangailangan sa produktong agrikultural at pagtaas ng halaga ng mga bilihin. (PIA Sorsogon)

Special Registration para sa PWDs itinakda ng Comelec

Ni: Bennie A. Recebido

Sorsogon City, June 30 (PIA) – Espesyal ang gagawing pagtrato ng Commission on Election (Comelec) sa gagawing pagrehistro ng mga Persons With Disabilities o PWD sa darating na July 18-22 ngayong taon.

Sinabi ni Provincial Election Supervisor Att. Calixto Aquino Jr na talagang nagtalaga ang Comelec isang linggo na tinagurian nilang Special Registration for PWDs upang mabigyang pagkakataon na makapagrehistro ng maginhawa ang mga may kapansanang nasa edad at kwalipikado nang magparehistro bilang botante.

Ayon kay Aquino, ang naturang special registration para sa PWDs ay alinsunod sa naaprubahang Comelec Minute Resolution 110623 kung saan itinakda ang July 18-22, 2011 upang ma-accomodate ang mga PWD na makapagparehistro at makaboto sa darating na 2013.

Matatandaang noong mga nakaraang taon, isa sa mga iminumungkahi ng grupo ng mga PWDs na mabigyan sila ng espesyal na pagkakataong makaboto at kung maaari ay malagyan din ng special lane ang mga voting centers upang maging maginhawa at hindi na makasama sa siksikan ang mga botanteng may kapansanan.

Samantala, aminado din si Aquino na mahina ang turn-out ng kanilang continuing registration program dahilan sa posibleng malayo pa umano ang eleksyon.

Sinabi din niya na nakaugalian na ng mga Pilipino na maghintay sa pinakahuling araw bago magparehistro at maging opisyal na botante ng bansa, dahilan upang magsiksikan sa mga tanggapan ng Comelec kung oras na.

Subalit, sa kabila nito, patuloy pa rin ang panawagan ni Aquino sa mga Sorsoganon na may edad labing-walo pataas na magparehistro hanggang sa huling kwarter ng taong 2012.

Nanawagan din ito sa mga rehistradong botante lalo na ang mga datihan na i-validate ng mga ito ang kanilang voter’s registration sa pinakamalapit na tanggapan ng Comelec sa kanilang lugar. (PIA Sorsogon)

Layunin ng Philhealth Sabado II napagtagumpayang maipaabot sa publiko

Photo by: IAGuhit

Ni: Bennie A. Recebido

Sorsogon City, June 30 (PIA) – Tiniyak ni Philippine Health Insurance Corp. (Philhealth) Sorsogon Member Services Officer Marian Garcia na nakamit nila ang layunin ng Philhealth na maipaabot sa publiko lalo sa mga kasapi nito ang mga mahahalagang impormasyon at kaukulang paglilinaw ukol sa Philhealth at benepisyong ibinibigay nito.

Ayon sa kanya, mass registration ang ginawa nila noong Oktubre noong nakaraang taon, subalit sa Philhealth Sabado II noong June 25, 2011, ay mas tinutukan nila ang Information, Education at Advocacy component ng programa dahil halos karamihan sa mga target ay nakapagparehistro na, at nais nila diumanong malinawan pa ng mga kasapi ang mga benepisyong dapat nilang makuha ayon sa ibinibigay ng Philhealth.

Pinawi din niya ang ilang mga agam-agam ukol sa pagpili ng mga benepisyaryo sa ilalim ng sponsored program ng Philhealth kung saan nilinaw nya na ito ay base sa isinagawang survey ng National Household Targeting System (NHTS) ng Department of Social Welfare and Development (DSWD).

Samantala, inihayag din ni Garcia na aabot sa walong-daang mga bagong kasapi ang nagpatala sa buong lalawigan ng Sorsogon sa isinagawang Philhealth Sabado II at nasa 58,413 na mga ID na rin ang naproseso nila mula 2010, hindi kasama sa bilang na ito ang mga dependent-beneficiaries ng Philhealth members na makakatanggap din ng de-kalidad na pangkalusugang serbisyong ibinibigay ng ahensya.

Patuloy din diumano ang gagawin nilang pagpoproseso sa mga dokumento ng mga nagnanais pang magparehistro bilang Philhealth members.

Nanawagan din si Garcia sa mga nagparehistro sa Philhealth na lahat ng mga nabigyan ng ID na may problema sa pangalan ay agad nang pumunta sa kanilang tanggapan upang maiwasto na ang mga pagkakamali at hindi magka-aberya sa pagkuha ng Philhealth benefits.

Dagdag pa ni Garcia na sa ngayon ay naipamahagi na nila ang mga Philhealth ID sa Sorsogon City at Castilla habang naibigay na rin sa mga Local Government Unit (LGU) ng Magallanes ang 3,649 na Philhealth ID at 3,700 na ID naman sa Gubat upang maipamahagi sa kani-kanilang mga barangay. Sinabi din ni Garcia na umaasa silang maibibigay na ang lahat ng mga ID ng mga nagparehistro noong October 2010 sa natitira pang mga bayan sa lalawigan ngayong Hulyo, 2011.

Umaasa din ang Philhealth Sorsogon na hindi maglalaon ay mapupunuan na ang target na universal Philhealth coverage na isa sa adyendang pangkalusugan ni Pangulong Benigno Aquino III. (PIA Sorsogon)

Quality Management System susi sa tagumpay ng DTI Bicol

Ni: Bennie A. Recebido

Sorsogon City, June 29 (PIA) – De-kalidad na sistema sa pamamahala at pagbibigay serbisyo ang pinanghahawakang susi ng Department of Trade and Industry (DTI) Bicol sa natatamo nilang tagumpay ngayon.

Ayon kay DTI Bicol Regional Director Engr. Jocelyn Blanco, nais nilang maipaabot sa mga mamamayan na ang pagsisikap ng DTI Bicol sa tulong na rin ng DTI sa mga lalawigan na mabigyan ng oportunidad at inspirasyon ang bawat indibidwal o grupo na makapagsimula ng negosyo ay isa sa mga adhikain ng ahensya upang magkaroon ng sustenableng kabuhayan ang bawat pamilyang Bikolano.

Binigyang-diin din niya hindi tumitigil ang kanilang ahensya sa pag-iisip ng mga pagbabago, mas mahusay pang mga pamamaraan at mga aktibidad upang madala sa mga kunsumidor at mga kliyente nila ang serbisyong nauukol para sa mga ito.

Isang patunay sa hindi matatawarang pagsisikap ng DTI Bicol ang pagiging ISO certified nito sa loob ng tatlong taon na iginawad ng Certification International Philippines (CIP) noong Pebrero ngayong taon.

Ayon kay CIP Managing Director Renato V. Navarette, matagumpay na nagawa ng DTI Bicol ang isang sistema ng pamamahala o Management System na sumusunod sa rekisitos na itinakda ng ISO 9001:2008, isang quality management system international standard na ginagamit ngayon ng hindi bababa sa 150 bansa sa buong mundo.

Binigyang komendasyon din ni Navarette ang pagiging kampeon ng DTI Bicol sa pagkakaroon ng napakaraming mga customer sa buong rehiyon at mga stakeholders na kinabibilangan ng mga Small and Medium Enterprises (SMEs), kunsumidor, iba’t-ibang mga ahensyang pampamahalaan man at pampribado, at maging ang maayos na pagbibigay serbisyo at organisadong pagsubaybay sa pagpapatupad ng mga batas na nagbibigay proteksyon sa mga kliyente nito at kunsumidor.

Dagdag din ni Navarette na corporate entity ang ISO kung kaya’t ipapatupad din diumano ng DTI ang corporate governance. (PIA Sorsogon)