IACAT nanawagan sa publiko na pag-ibayuhin ang pag-iingat laban sa mga human trafficker

Ni: Bennie A. Recebido

LUNGSOD NG SORSOGON, May 14 (PIA) – Sa pagpapaigting pa ng kampanya ukol sa human trafficking, patuloy ang pamahalaan sa panawagan nito sa publiko lalo na sa mga menor de edad sa kanayunan na pag-ibayuhin pa ng mga ito ang pag-iingat laban sa mga masasamang elemento.

Ang human trafficking ay isang makabagong anyo ng pang-aalipin, pang-aabuso at krimen laban sa tao kabilang na ang sapilitang prostitusyon at child labor, at upang masugpo ang ganitong uri ng krimen, malaking bahagi ang aktibong partisipasyon ng buong komunidad.

Ayon sa Inter-agency Council Against Child Trafficking (IACAT), malimit maganap ang Human Trafficking sa malalayong barangay at mahihirap na mga lugar kung kaya’t pursigido ang anti-human trafficking task force na binubuo ng mga ahensya ng pamahalaan at mga partner nito kabilang na ang Phil. National Police, Department of Interior and Local Government, Philippine Information Agency, Department of Justice, Department of Social Welfare and Development at iba pa na masugpo ang ganitong uri ng krimen.

Ayon kay Atty. Ryan Inoncencio ng IACAT dapat na maiparating agad sa awtoridad ang mga kaso ng human trafficking upang mailigtas ang mga inosenteng mabibiktima ng sistemang ito ng pangangalakal ng tao. Aniya, kadalasang biktima nito ay mga kababaihan, subalit hindi rin isinasantabi na may mga kalalakihang menor de edad na nabibiktima din. 80 porsyento sa kanila ay ibinebenta sa mga casa at prostitution den.

  

Ayon naman sa local inter-agency task force against human trafficking dito, ang probinsya ng Sorsogon ay daanan at lagusan ng mga human traffickers kung kaya’t binabantayan nila partikular ang mga pantalan ng Pilar,Donsol,Matnog at Bulan kung saan dito madalas na itinatawid ang mga nakukuha nilang biktima patungong Metro Manila.

Sinabi ni Atty Inocencio na malaki ang papel na ginagampanan ng lokal na pamahalaan (LGU) upang matigil ang malawakang recruitment sa mga barangay at kanayunan. Dapat din aniyang magkaroon ng maaayos na pagpapatupad ng business regulation system lalo na sa mga panggabing establisimyento tulad ng mga bar o night club upang makontrol ang pagbibigay suporta sa pangangalakal ng mga tao. (BARecebido, PIA Sorsogon)