Comelec, DENR muling nagpaaala sa paglalagay ng campaign paraphernalia at iba pang alituntuning dapat sundin sa Halalan 2013

Ni: Bennie A. Recebido

LUNGSOD NG SORSOGON, Pebrero 7 (PIA) – Sa pagsisimula ng panahon ng kampanya para sa darating na halalan sa Mayo, muling nagpaalala ang Commission on Election (Comelec) sa mismong mga kandidato at suportador nito na mahigpit na sumunod sa mga alituntuning pinaiiral ng Comelec ukol sa paglalagay o pagdidikit ng mga campaign paraphernalia.

Ayon kay Comelec Sorsogon Election Supervisor Atty. Calixto Aquino, may mga itinalagang common poster area na maaaring pagdikitan ng mga campaign paraphernalia at dapat na alam ng mga kandidato at suportador ito.

Maging ang Department of Environment and Natural Resources (DENR) ay nanawagan na iwasan ang pagdidikit ng mga campaign paraphernalia sa kung saan-saan lalo na sa mga kahoy. 

Binigyang-diin ng DENR na ipinagbabawal ng batas ang pagdidikit o pagpapako ng mga campaign posters sa mga puno ng kahoy sa ilalim ng Section 23 ng Comelec Resolution 7767 alinsunod sa itinatakda ng Republic Act 9006 o Fair Election Act.

Ayon pa sa DENR, nadiskubre nila na biglaang tumataas ang bilang ng impeksyon sa mga kahoy lima hanggang anim na buwan matapos ang eleksyon dala ng mga sugat na tinatamo nito sanhi ng mga pako at staple wire.

Maliban sa paglalagay ng mga campaign paraphernalia, may iba pang mga alituntuning dapat sundin at tandaan ang lahat ng sangkot sa gaganaping halalan ngayong Mayo 2013 tulad ng mga sumusunod: pagbibitbit ng lahat ng uri ng armas na nakakamatay at pagtatalaga ng mga security personnel maliban doon sa mga pinahintulutan ng Comelec.

Ipinagbabawal din ang ang pagtatalaga ng mga confidential speial agent, paglikha ng anumang reaction forces, strike forces at ano pa mang puwersa o grupong maaaring magdala ng kaguluhan, pagbabawal sa pagbura ng mga nakatalang presinto, paglikha ng bagong posisyon, pagkuha ng bago at paglilipat ng mga manggagawa sa serbisyo sibil, pagpapagawa ng pampublikong proyekto, at pagtanggap ng mga manggagawa ng mga pamahalaan ng anumang donasyon maging pera man ito o kusang loob na bigay ng sinumang opisyal o kandidato.

Higit sa lahat dapat na igalang ang Huwebes at Biyernes Santo sapagkat ipagbabawal ang pangangampanya sa mga panahong ito.

Magsisimula ang panahon ng kampanya sa darating na Pebrero 12 hanggang Mayo 11, 2013 para sa mga senador at party list group habang Marso 29 hanggang Mayo 11, 2013 para sa mga congressman at mga opisyal ng probinsya, lungsod at munisipyo. (BARecebido, PIA Sorsogon)