Aktibidad sa pagdiriwang ng NDPR Week matagumpay

Ni: Francisco B. Tumalad, Jr.

Sorsogon City, July 22 (PIA) – Suportado ng pamahalaang lungsod ng Sorsogon ang mga aktibidad at programang higit pang nagsusulong at nagpapaunlad sa kakayahan ng mga taong may kapansanan o Persons With Disabilities (PWDs).

Ayon naman kay City Social Worker Ericka Dig, sa pagdiriwang ng National Disability Prevention and Rehabilitation (NDPR) Week ngayong linggo ay matagumpay na naisagawa ang mga aktibidad kung saan muling naiparamdam sa mg PWDs ang ginagawang pagpapahalaga ng pamahalaan para sa kanila.

Isang misa ang ginanap noong Martes bilang panimulang aktibidad para sa NDPR Week celebration habang nagsagawa naman kahapon ng radio hopping bilang bahagi ng kampanya ng city government na maipaabot sa publiko ang tamang impormasyong dapat malaman ng mga ito lalo na pagdating sa kanilang mga karapatan at pribilehiyo.

Aktibo din ang naging partisipasyon kahapon ng mga Special Education (SPED) pupils ng Sorsogon east Central School sa ginawang poster making at drawing contest.

Namahagi din ng tig-iisang libong piso financial assistance ang City Social Welfare and Development Office (CSWDO) para sa pang-araw-araw na gastusin sa transportasyon ng mga SPED pupils.

Samantala, patuloy na hinihikayat ng CSWDO ang mga magulang o kamag-anak ng mga batang may kapansanan na bumisita sa Special Education School ng lungsod at i-enrol ang kanilang mga anak upang matamasa ng mga batang may espesyal na pangangailangan ang edukasyong natatamasa ng mga ordinaryong bata. (PIA Sorsogon)

CSWDO pinulong ang mga PWDs sa Sorsogon City

Ni: Bennie A. Recebido

PIA Sorsogon, July 22 (PIA) – Isang pulong ang isinagawa kahapon ng City Social Welfare and Development Office (CSWDO) para sa mga taong may kapansanan kung saan ipinaliwanang ni Carlo Bustamante, dating pangulo ng asosasyon ng may mga kapansanan sa Sorsogon at sa ngayon ay kabilang sa mga tauhan ng CSWDO, ang mga karapatan at pribelihiyong dapat na makamit at matamasa ng mga taong may kapansanan.

Aniya bawat benepisyo at serbisyong nais tamasain ng mga PWDs ay kaakibat ang pag-iingat ng mga ito sa kanilang mga ID at dapat na palagiang dala ng mga ito ang kanilang Purchase Booklet upang hindi maantala at pagdaanan pa ang istriktong ispeksyon at proseso sa pagkamit ng kanilang mga benepisyo.

Kasama sa ginawang pulong ang kinatawan ng Department of Trade and Industry (DTI) at ng Technical Edication Skills and Development Authority (TESDA) na nagpaliwanag din ukol sa 20 porsyentong diskwento ng mga PWDs sa bilihin at serbisyong pampubliko at ang pagbibigay sa kwalipikadong PWD ng anim na slots para sa Private Education Student Financial Assistance (PESFA) scholarship program.

Ipinaliwanag din ang mga nakakalat na marker signs o sticker sa mga paaralan, ospital, fastfood chains, grocery stores at mga pampasaherong sasakyan na nagbibigay prayoridad sa mga may kapansanan sa anumang transaksyong isasagawa nito. Halos karamihan na rin diumano sa malalaking establisemyento ay mayroon na ring special lane para sa mga PWDs.

Ipinaliwanag naman ng pamunuan ng Land transportation Organization (LTO) na suportado nila ang karapatan ng PWDs kung saan nagbibigay sila ng oryentasyon sa mga tsuper at operators at inatasan din nila ang mga ito na maglagay ng sticker sa kanilang sasakyan at gumawa ng seat plan para sa mga pasaherong PWD.

Binigyang-diin naman ng Department of Labor and Employment (DOLE) na maaaring maparusahan sa ilalim ng RA 9442 ang mga employer na tatangging tumanggap ng mga kawalipikadong aplikanteng magtatrabaho sa kanilang mga tanggapan. May kaukulang insentibo din diumano ang mga employer na nagbibigay oportunidad sa mga PWDs. (PIA Sorsogon)

May kapansanan man, may karapatan din

Ni: Bennie A. Recebido

Sorsogon City, July 21 (PIA) – Ipinagdiriwang mula Hulyo 17 hanggang Hulyo 23 ang National Prevention and Rehabilitation (NDPR) Week upang bigyang pagkilala ang mga taong may kapansanan o Persons With Disabilitie (PWDs) bilang kabahagi ng lipunang ating ginagalawan at muling ipaalala sa lahat na may kapansanan man, ay may karapatan din ang mga ito.

Sa programang Talking Points ng Philippine Information Agency Central Office, inihayag ni Rizalino Sanchez, ang hepe ng Information and Communications Division ng National Council on Disability Affairs na may mga pinaiiral na batas sa bansa na nagbibigay importansya sa mga taong may kapansanan.

Ipinaliwanag nito na sa Republic Act 9442 o ang Magna Carta for persons with Disabilities nakasaad ang mga pribeliheyong maaaring matamasa ng mga kapansanan at mga probisyong mangangalaga sa kanila laban sa pangungutya ng publiko, paninirang-puri at diskriminasyon.

Malinaw diumaong nakasaad sa batas ang kaukulang parusa para sa unang pagkakamali ng sinumang irereklamo na lumabag sa RA 9442, indibidwal man o korporasyon. Pagmumultahin din ng hindi bababa sa P50,000 hanggang P100,000 at maaari ding makulong ang sinumang indibidwal na mapapatunayang lumabag sa RA 9442 sa unang pagkakataon ng hindi bababa sa anim na buwan hanggang dalawang taon.

Bilang patunay na pinahahalagahan ng pamahalaan ang mga taong may kapansanan, matatamasa ng mga ito sa ilalim ng RA 9442 ang mga pribelihiyong tulad ng 20 porsyentong diskwento sa lahat ng mga bilihin at serbisyong pampubliko, educational assistance sa lahat ng antas ng edukasyon kasama na ang kursong bokasyunal sa pampubliko man o pampribadong paaralan, paglalagay ng mga express lane  para sa kanila lalo na sa mga establisimyentong pangkomersyal at pampamahalaan, pati na rin ang pagkakaroon ng katumbas na insentibo sa mga taong tagapag-alaga at namumuhay kasama ng mga taong may kapansanan.

Samantala, maaari din umanong makatanggap ng kaukulang insentibo ang mga kompanya o korporasyong tumatanggap ng mga manggagawang may kapansanan. Ang mga pribadong kompanya diumano ay makakatanggap ng 25 porsyentong diskwento sa buwis sa pasweldo nito sa manggagawa at hiwalay pang 50 porsyentong diskwento sa ginastos nito upang gawing PWD-friendly ang kanilang pinagtatrabahuhang lugar.

Dagdag pa ni Sanchez na sa loob ng 20 taon, malaki na ang naging pagbabago sa Pilipinas sa usapin ng karapatang pantao ng mga may kapansanan. Positibo din siyang lalo pang mapag-iibayo ang pangangalaga sa mga karapatang ito sa mga susunod pang mga taon. (PIA Sorsogon)

BSP National Jamborette 2011 gagawin sa Sorsogon

Ni: Bennie A. Recebido

Sorsogon City, July 21 (PIA) – Tuloy-tuloy pa rin sa ngayon ang ginagawang ground preparation para sa pagdarausan ng Boy Scout of the Philippines (BSP) National Encampment ngayong taon.

Matatandaang napili ang Brgy. San Isidro, Castilla, Sorsogon upang maging venue ng BSP National Jamborette dahilan sa pagiging istratehiko ng lugar, sa gandang panturismo ng lokasyon at sa malaking potensyal ng lalawigan para magsagawa ng ganitong okasyon.

Ayon kay BSP Sorsogon Council Executive Rene Hayag, matapos mapag-alaman ng Sangguniang Bayan ng Castilla na isa sa kanilang barangay ang napiling lugar, ay agad nitong inaprubahan ang isang resolusyon bilang pagpayag at pagsuporta sa aktibidad na anila’y makakatulong sa pagsusulong ng turismo, popularidad ng Sorsogon at ekonomiya hindi lamang ng bayan ng Castilla kundi maging ng buong lalawigan.

Napakaganda diumano ng lokasyon sapagkat maliban sa lawak ng lugar ay kitang-kita sa magkabilang bahagi ang dalawang aktibong bulkan sa rehiyong Bikol, ang Mt. Mayon at Mt. Bulusan.

Sinabi ni Hayag hindi ito ang unang pagkakataon na nag-host ng boy scout national jamborette ang Sorsogon. Una nang nagkaroon diumano ng encampment sa Brgy. Gabao at Del Rosario sa Bacon District, Sorsogon City at maging sa bayan ng Casiguran noong dekada nubenta.

Sa ngayon ay pinaplantsa pa nila ang mga pinal na detalye upang maging matagumpay ang gagawing aktibidad dito. (PIA Sorsogon)

Malaking bawas sa IRA sakit ng ulo ngayon ng City government

Ni: Bennie A. Recebido

Sorsogon City, July 20 (PIA) – Agad na nagpatawag ng pulong si Sorsogon City Mayor Leovic Dioneda sa mga hepe ng iba’t-ibang departamento ng city government upang pag-usapan ang mga mahahalagang hakbang na dapat gawin matapos na ipalabas ng Department of Budget and Management (DBM) ang desisyon nitong babaan ang natatanggap na Internal Revenue Allotment ng mga Local Government Units sa bansa.

Ayon kay Dioneda, sakit sa ulo nila ngayon ang halos ay P30 milyong mawawalang pondo sa lungsod kaugnay ng direktiba ng DBM kung kaya’t minabuti niyang ngayon pa lamang ay gawan na nila ng kaukulang istratehiya upang hindi maisakripisyo ang mga programa at serbisyo ng pamahalaang panlungsod para sa mga nasasakupan nito.

Kabilang sa mga suhestyong lumabas sa pagpupulong ay ang pagpapaigting pa ng koleksyon sa buwis ng lungsod, taasan ang mga regulatory fees, gawing centralized ang procurement system at mahigpit na ipatupad ang pagtitipid sa enerhiya.

Dapat din aniyang maisapubliko na sa lalong madaling panahon ang nirebisang City Revenue Code na ipinasa ng Sangguniang Panlungsod kung saan may mga pagbabago sa koleksyon ng real property tax na tiyak na makakatulong sa operasyon at pagpapatupad ng mga programa at proyekto sa lungsod.

Magiging malaking tulong din aniya ang paglalagay nila ng abot-kayang taripa sa mga birthing facilities sa lungsod sapagkat tiyak na may papasok na kaban ng lungsod na maaring magamit bilang pambayad sa mga manggagawa at pagmantini ng pasilidad.

Inatasan na rin niya diumano ang Local Finance Committee at mga department heads na gumawa rin ng kanya-kanyang istratehiya upang masolusyunan at hindi gaanong maramdaman ang malaking bawas na ito sa IRA.

Ayon pa sa alkalde, kung hindi ito mapag-aaralang mabuti, tiyak na mababawasan ang mga programang pangkomunidad na maaaring ibigay ng pamahalaang lokal ng Sorsogon City lalo pa’t aminado si Dioneda na nakadepende ang operasyon ng lungsod sa IRA nito. (PIA Sorsogon)

529 Sorsoganon maaaring maging PESFA scholars

Ni: Bennie A. Recebido

Sorsogon City, July 20 (PIA) – Bukas na ngayon ang Technical Education and Skills Development (TESDA) sa pagtanggap ng panibagong batch ng mga iskolar ngayong taon sa ilalim ng Private Education Student Financial Assistance (PESFA) program.

Ayon kay TESDA Sorsogon Provincial Director Rodolfo G. Benemerito, limangdaan dalawampu’t siyam na Sorsoganon, may trabaho o wala, mula sa buong lalawigan ang mabibigyan ng pagkakataong maging PESFA scholars para sa taong 2011.

Sinabi ni Benemerito na layunin ng programa na mabigyan ng pagkakataong makapagpatuloy pa ng pag-aaral ang mga kwalipikadong nakapagtapos ng hayskul subalit kulang sa kapasidad pinasyal na makapag-enrol sa mga pribadong Technical-Vocational Schools.

Maaari diumanong mag-aplay bilang iskolar ang may mga sumusunod na kwalipikasyon:

·         May edad na labinwalong taong gulang sa pagtatapos ng pagsasanay;

·         Hindi pa nanginabang sa alinmang scholarship na ibinigay ng TESDA;

·         May buwanang kabuuang kita ang pamilya na hindi lalagpas sa P10,000;

·         Nais mag-enrol at makapagtapos ng short-term, non-degree, technical-vocational course sa mga pribadong paaralan sa lalawigan;

·         Nais sumailalim sa Compulsory Competency Assessment matapos ang pagsasanay;

·         Naninirahan sa Sorsogon;

·         Hindi pa sumailalim sa National Career Assessment Examination (NCAE) o sa Youth profiling for Starring Careers (YP4SC); at

·         Interesado at handang magtrabaho matapos ang ibibigay na pagsasanay.

Sinabi pa ni Benemerito na 251 slots ang ibinigay sa unang distrito ng Sorsogon kung saan labing-isang tech-voc courses ang maaaring pagpilian na binadyetan ng aabot sa P1.7 milyon, habang 278 slots naman sa ikalawang distrito kung saan may labing-dalawang tech-voc courses na maaaring mapagpilian na binadyetan ng aabot naman sa P1.9 milyon.

Labingsiyam na pribadong paaralan naman sa buong lalawigan na may tech-voc courses ang katuwang ng TESDA na maari ring pagpilian ng mga mag-aaral ayon sa kursong nais nito.

Maari diumanong makipag-ugnayan ang mga interesadong kwalipikadong Sorsoganon sa pinakamalapit na paaralang tech-voc sa kanilang lugar o di kaya bumisita sa mga itinalagang Community Training and Employment Coordinator sa kanilang munisipyo o personal na bumisita sa TESDA office para sa mga dagdag pang impormasyon. (PIA Sorsogon)