May-ari ng lupa pinaghahanda sa pagtaas ng singil sa buwis

Ni: Bennie A. Recebido

LUNGSOD NG SORSOGON, Disyembre 30 (PIA) – Inanunsyo ng lokal na pamahalaan ng lungsod ng Sorsogon sa mga nagmamay-ari ng lupa na magkakaroon ng pagtaas sa singil sa real property tax simula sa unang araw ng Enero sa susunod na taon.

Sa pahayag ng Sorsogon City Council ang pagtaas ng singil sa buwis ay bunsod ng pagtaas din ng fair market value ng mga real property hindi lamang sa lungsod kundi maging sa buong lalawigan ng Sorsogon.

Matatandaang una nang nagpasa ng isang ordinansa ang konseho ng lungsod, ang City Ordinance No. 018, series of 2011 na may titulong “An ordinance providing for an updated schedule of fair market values of real properties in the city of Sorsogon”.

Inaprubahan ng konseho ang nasabing ordinansa noong ika-21 ng Hunyo, 2011 at isinailalim na rin sa paglathala sa lokal na pahayagan.

Sinabi ni City Councilor Nestor J. Baldon, awtor ng ordinansa na ang ginawang iskedyul ng fair market value ay alinsunod din sa kasalukuyang halaga ng mga lupa real estate base sa isinagawang pagtatasa ng halaga nito.

Ang pagpapatupad ng bagong buwis ng mga lokal na pamahalaan ay pinapayagan ng batas bawat tatlong taon matapos ang pagsasagawa ng general revision ng property assessment alinsunod sa Republic Act 7160 o mas kilala bilang Local Government Code of 1991.

Saklaw ng pagbabagong ito ang tatlong distrito ng lungsod – ang Bacon, East at West District.

Samantala, maliban sa Sorsogon City, magkakaroon din ng pagtaas sa singil ng real property tax sa lalawigan ng Sorsogon alinsunod rin sa ipinasang Provincial Ordinance No. 01-2011 ng Sangguniang Panlalawigan kung saan ipapatupad din ang pagbabago sa labing-apat na mga bayan sa Sorsogon simula January 1, 2012. (PIA Sorsogon)

PARCCOM mahalaga ang papel sa pagsusulong ng kaunlaran sa mga kanayunan

Ni: Bennie A. Recebido

LUNGSOD NG SORSOGON, Disyembre 30 (PIA) – Simula nang ipatupad ang Republic Act 6657 o ang Comprehensive Agrarian Reform Law,malaki na ang naging papel na ginampanan ng  Provincial Agrarian Reform Coordinating Committee (PARCCOM) sa pagsusulong ng kaunlaran ng mga kanayunan lalo na sa mga Agrarian Reform Communities (ARC).

Ang PARCCOM ang nagsisilbing balangkas ng istruktura ng Comprehensive Agrarian Reform Program (CARP) na pinamumunuan ng Presidential Agrarian Reform Council (PARC) kung saan nagsisilbing counterpart nito ang Barangay Agrarian Reform Committee (BARC)

Ayon kay Provincial Agrarian Reform Officer (PARO) II at Executive Officer ng PARCOMM Roseller R. Olayres, ang PARCCOM ay hindi tagapagpatupad subalit may kapangyarihan itong gumawa ng mga resolusyon ukol sa mga sumusunod: land tenure and improvement (LTI), program beneficiaries’ development (PBD), at  yaong mga patungkol sa mga suliuranin at isyung may kaugnayan sa agrarian justice delivery (AJD).

May kapangyarihan din umano itong mag-utos sa mga ahensya ng pamahalaan na linawin ang usaping nangangailangan ng kanilang natatanging kakayahan at hurisdiksyon. May kapangyarihan din ang PARCCOM na magrekomenda ng mga presyo sa pamilihan, pumasok sa isang leaseback arrangement at magbigay ng kaukulang exemption mula sa ilang mga polisiya sa aplikasyon o di kaya’y baguhin ang ilang mga polisiya.

Sa Sorsogon, binubuo ang PARCCOM ng mga magsasaka, kinatawan ng agricultural cooperative, non-government organization at cultural community. Kasama din dito ang PARO at may mga kinatawan din ito mula sa Department of Agriculture, Department of Environment and Natural Resources at Land Bank of the Philippines na tumatayo bilang Government Sector Ex Officio Members. Ang Secretariat na binubuo ng kalihim at ingat-yaman ay pawang mga empleyado ng DAR na siyang nangangasiwa sa mga pangangailangang teknikal at administratibo ng komitiba. (PIA Sorsogon)

DOH-PHO, desididong mapababa ang bilang ng firecracker injury

Ni: Bennie A. Recebido

LUNGSOD NG SORSOGON, Disyembre 23 (PIA) – Desidido ang mga opisyal ng kalusugan dito na mapababa ang bilang ng mga nabibiktima ng paputok at iba pang mga mapaminsalang bagay sa pagdating ng araw ng pasko at sa pagsalubong sa bagong taon.

Kaugnay nito muling ipinaalala sa publiko ng mga technical personnel ng Provincial Health office ang kampanyang Aksyon: Paputok Injury Reduction (APIR) na ipinatutupad ng Department of Health.

Sa kampanyang APIR limang babala ang binibigyang-diin tulad ng mga sumusunod: Mapanganib ang paggamit ng paputok; Lahat ng paputok ay bawal sa bata; Lumayo sa mga taong nagpapaputok; Huwag mamulot ng mga di sumabog na paputok; at Magpagamot agad kapag naputukan.

Sa pagsalubong naman ng bagong taonBagong Taon, may limang alternatibong mungkahi din ang DOH tulad ng: Itaguyod at makilahok sa “Community Fireworks Display”; Magdiwang ng ligtas kasama ang pamilya; Lumikha ng ingay gamit ang ibang bagay tulad ng torotot, busina, musika, lata at sirang kaldero; Makisaya sa ibang paraan tulad ng street party, concert at palaro; at Matuto sa mga ral ng nakaraan at magsimula nang maayos na buhay sa bagong taon.

Maliban sa pagpapaigting ng kampanyang APIR, nakasaad din sa sinusunod nilang memorandum na may bilang 2011-0310 na ipinalabas ng DOH ang pagsasailalim sa lahat ng mga ospital sa white code alert sa mga petsang Diyembre 24, 25, 31, 2011 at Enero 1, 2012 bilang paghahanda ng kanilang mga emergency unit at matiyak na matutugunan ang mga pangangailangang medikal kaugnay ng mga pagdiriwang.

Ayon pa sa memorandum, lahat ng DOH Sentinel Hospital ay dapat na mag-ulat sa Online National Electronic Surveillance System Registry ng DOH.

Patuloy din ang pagsasagawa ng Tetanus Surveillance na sinimulan noong Miyerkules, Disyembre 21 na matatapos hanggang sa Enero 21, 2012. Dapat umanong ireport agad sa kinauukulan ang lahat ng tetanus na nakuha mula sa mga paputok.

Mahigpit din ang atas ng DOH sa mga tauhan at opisyal sa kalusugan na ukol sa patuloy na pakikipag-ugnayan sa iba’t-ibang ahensya ng pamahalaan upang mapaigting pang lalo ang public information campaign at iba pang mga adbokasiya partikular ang kampanya laban sa paggamit ng watusi, ilegal na mga paputok na mahigpit na ipinagbabawal sa ilalim ng Republic Act 7183 o mas kilala bilang Firecracker Law.

Deklaradong Firecracker Free Zone din ang mga ospital kung saan ipinagbabawal ang pagbebenta o paggamit ng anumang uri ng mga paputok sa loob, labas at paligid nito. (PIA Sorsogon)

Mga tanggapan ng pamahalaan nagbigay babala sa publiko ukol sa paggamit ng mga paputok

Ni: Bennie A. Recebido

LUNGSOD NG SORSOGON, Disyembre 22 (PIA) – Nagkakaisa ang mga ahensya ng pamahalaan dito sa pag-abiso sa publiko ukol sa dapat gawing mga pag-iingat kaugnay ng paggamit ng mga paputok ngayong pasko at bagong taon.

Babala ng Department of Environment and Natural Resources (DENR) Sorsogon Provincial Office alinsunod na rin sa panawagan ni DENR Bicol Regional Executive Director Joselin Marcus Fragada at DENR Secretary Ramon Paje na dapat na mag-ingat ang publiko sa mga naiipong alikabok mula sa mga paputok na sumasabay sa hangin sapagkat napakamapanganib nito sa kalusugan.

Naglalaman din umano ang mga paputok ng sulfur, uling at iba pang mga materyal na nakabubuo ng greenhouse gases kapag nakahalo na ito sa hangin. Kung kaya’t dapat na maiwasang malanghap ito ng mga taong may asthma, bronchitis, laryngitis, pneumonia, rhinitis, at sinusitis.

Suportado din ng DENR Sorsogon Provincial Office ang panawagang dapat na magtalaga ang bawat lokal na pamahalaan ng isang lugar na pagdadausan ng pagpapaputok sa darating na pasko at bagong taon.

Mahigpit din ang kampanya ng Department of Health at ng Provincial Health Office kaugnay ng inilunsad na programang Aksyon: Paputok Injury Reduction (APIR) upang mabawasan ang bilang ng nabibiktima ng mga malalakas na paputok. Umaasa ang ahensya na maiiwasan at mababawasan ang pagkalagas ng buhay ng tao at bilang ng mga nasusugatan lalong-lalo na ang mga kabataan na may edad mula sampu pataas.

Sa tala ng DOH umabot ng 200 porsyento ang itinaas ng bilang ng mga naputukan noong taong 2010 kumapara noong taong 2009. Sa kampanyang APIR, higit pang palalakasin ng ahensya ang pagpapaalala sa mamamayan tungkol sa dapat at hindi dapat gawin sa pagsalubong ng pasko at bagong taon.

Maging ang Philippine National Police at Bureau of Fire Protection ay mahigpit din ang payo sa publiko na pag-ibayuhin ang pag-iingat laban sa mga paputok lalo’t kadalasang naitatala ang mga disgrasya at malalaking sunog sa panahong nagdiriwang ng bagong taon.

Paalala din ng BFP sa publiko na huwag gumamit ng mga malalakas at ipinagbabawal na paputok sa pagsalubong sa bagong taon upang maiwasan ang disgrasya at pagkawala ng buhay bagkus ay salubungin na lamang ito sa pamamagitan ng paggamit ng mga bagay na hindi mapaminsala.

Sa bayan ng Bulan, mahigpit na ipinag-utos ni Senior Fire Officer IV Tomas Dio sa kanyang mga tauhan na pag-ibayuhin ang inspeksyon sa mga tindahan ng paputok upang matiyak na walang magbebenta ng mga ipinagbabawal na paputok.

Dagdag pa ng opisyal na magsasagawa din ang Bulan Fire Station ng Fire Truck Visibility kung saan mag-iikot ang mga bumbero sa kabayanan at mga kalapit na barangay upang patuloy na mapaalalahanan ang publiko ukol sa kampanya sa iwas-paputok. (PIA Sorsogon)

Mga mapagsamantalang negosyante hindi palulusutin ng DTI

Ni: Bennie A. Recebido

LUNGSOD NG SORSOGON, Disyembre 22 (PIA) – Tiniyak ng pamunuan ng Department of Trade and Industry (DTI) Sorsogon Provincial Office sa publiko na hindi nila papayagang makalusot ang mapagsamantalang mga negosyante ngayong pasko at bagong taon.

Ito ang inihayag ni DTI Consumer Welfare Desk Officer Evelyn Paguio matapos na magsagawa ang kanilang ahensya ng regular na pagsubaybay sa sitwasyon ng halaga ng mga bilihin ngayong panahon ng pasko at nalalapit na bagong taon.

Aniya, hindi sila mag-aatubiling sampahan ng kaso ang sinumang mapapatunayan nilang nagsasamantala sa mga panahong tulad nito kung saan mataas ang pangangailangan ng mga mamimili.

Muli din niyang pinayuhan ang mga mamimili na maging mapanuri sa pagbili ng mga produkto at tiyaking iisa lang ang makikita nilang price tag ng produkto, dapat din aniyang kung ano ang nakalagay sa price tag ay iyon din ang  halagang babayaran nila at dapat ding nakapaloob na sa babayaran ang Value Added Tax (VAT) sa presyo ng produktong binili.

Paliwanag pa niya na dapat na maging maingat ang mga mamimili sa pagpili ng mga produkto at tiyaking de kalidad at hindi ito makakasama sa kanilang kalusugan. At upang makatiyak umano na magandang uri ang produktong mabibili ay hanapin ang Import Commodity Clearance (ICC) sticker sa produkto bilang katiyakan o garantiya na nainspeksyon at pumasa ito sa quality standard test bago ibebenta sa mga pamilihan. (PIA Sorsogon)