Sa TESDA, May Choice ka!

Pagbisita ni TESDA Sec. Villanueva nagbigay inspirasyon sa mga Sorsoganon; mas maraming programa ng TESDA tiniyak

Ni: Bennie A. Recebido

LUNGSOD NG SORSOGON, April 20 (PIA) – Positibo ang mga Sorsoganon na mas marami pang mga technical-vocational development opportunities ang darating sa lalawigan ng Sorsogon matapos tiyakin ni Technical Education Skills and Development Authority (TESDA) General Secretary Joel Villanueva na maraming programa pa ang ibaba nila sa Sorsogon.

Sa kanyang mensahe kahapon kaugnay ng kanyang pagbisita sa lalawigan sa okasyon ng pasinaya ng bagong TESDA Provincial Office, nangako ang kalihim na dodoblehin pa nito ang bilang ng mga scholarship grant sa Sorsogon.

Ipinagmalaki din niya ang pagkakaroon ng sariling gusali at bagong provincial office ng TESDA Sorsogon sa City Hall Complex sa Brgy. Cabid-an, Sorsogon City at inihayag na rin ang pagkakaroon ng ikalawang palapag ng nasabing gusali kung kaya’t abot-abot ang naging pasasalamat ni TESDA provincial director Rodolfo Benemerito at ng mga Sorsoganong makikinabang pa dito.

Pinasalamatan din ng kalihim ang lungsod ng Sorsogon dahilan sa suporta nito sa mga programa ng TESDA at marapat lamang umanong matanggap nito ang parangal bilang Kabalikat Awardee ng TESDA.

Sinamantala na rin niya ang oportunidad na naroroon sa pasinaya si Sorsogon 2^nd District Congressman Deogracias Ramos, Jr. at Ako Bicol Partylist Representative Rodel Batocabe upang umapela na mataasan pa ang pondo para sa operasyon at programa ng TESDA.

Kinakitaan naman ng pagmamalaki at inspirasyon ang mga TESDA Specialistas mula sa iba’t-ibang munisipalidad ng Sorsogon maging ang mga stakeholders na naroon dahilan sa kitang-kita dito ang kakaibang sigla at pagmamalaki sa mga manggagawa at kabataang tumatangkilik sa mga kursong tech-voc.

Si Sec. Villanueva ay National Certificate III holder ng Food and Beverage Services at isa din sa mga Specialistas na sinanay ng TESDA. Ipinagmamalaki din niya ang mga certified workers ng TESDA dahilan sa tuwirang pagpapahalaga ng mga ito sa kanilang angking galing at kasanayan.

Pinawi din ni Sec. Villanueva sa isipan ng publiko ang agam-agam na hindi kaagad nakakahanap ng trabaho yaong tapos ng kursong vocational bagkus ay sinabi niyang 60 porsyento sa mga nakakatapos ng ganitong kurso ang agarang nakakakuha ng trabaho habang yaong kabilang sa 40 porsyentong naghihintay pang makapasok sa trabaho ay binibigyan pa nila ng iba pang mga scholarship opportunity upang higit pang mabigyan ng matibay na daan tungo sa ikakatagumpay nito bilang mga manggagawa.

Ayon pa sa kalihim, ang patuloy na paglago at pagtangkilik sa technical-vocational education mula sa hanay ng mga negosyo, edukador at mambabatas ay patunay na pagkilala sa imahe ng kasanyan bilang matibay na tugon sa krisis sa lipunan at ekonomiya ng bansa. (BARecebido, PIA Sorsogon)

Inauguration and blessing of New TESDA Sorsogon Provincial Office graced by no less than TESDA General Secretary Joel Villanueva. The new building is located at the City Hall Complex, Brgy. Cabid-an, Sorsogon City.

ARCP2 Multi-purpose building sa Casiguran bukas para sa iba’t-ibang mga serbisyong pangkaligtasan at pangkaunlaran

Ni: Bennie A. Recebido

LUNGSOD NG SORSOGON, April 20 (PIA) – Matapos na pasinayaan noong nakaraang buwan ang bagong tayong Agrarian Reform Communities’ Project 2 (ARCP2) multi-purpose building sa Brgy. Trece Martires, Casiguran, Sorsogon, opisyal nang binuksan ito ng Casiguran ARC Cluster A para sa iba’t-ibang mga serbisyo.

Ayon kay Provincial Agrarian Reform Officer Roseller Olayres ang 108 metro-kwadradong multi-purpose building ay proyekto ng ARCP2 na pinondohan ng Department of Agrarian Reform-Asian Development Bank (DAR-ADB) at ng pamahalaang bayan ng Casiguran kung saan sinimulang ipatayo ito noong Setyembre 23, 2011 at opisyal na pinasinayaan noong Marso 8, 2012.

Sa pagkakatayo ng bagong multi-purpose building ay inaasahang maseserbisyuhan nito ang pangangailangan sa lugar kung saan maaaring makapagsagawa ang Agrarian Reform Communities ng kanilang mga aktibidad.

Ayon naman kay Casiguran Mayor Ma. Ester Hamor, magsisilbi rin itong health center, day care center, women’s center, at conference room ng mga people’s organization sa Casiguran at maaari din itong gamitin bilang evacuation center sa panahong may kalamidad.

Ang bayan ng Casiguran ay isang fourth class municipality ng Sorsogon kung saan tatlong mga barangay na kinabibilangan ng Burgos, Sta. Cruz at Trece Martires ang bumubuo ng Casiguran ARC Cluster A.

Taon-taon ay nagsasagawa dito ng pagtatasa ang ARC na mas kilala bilang ARC Level of Development Assessment (ALDA) ukol sa antas ng pag-unlad ng komunidad. Noong nakaraang taon ay nakuha nito ang pinakamataas na ARC rating dahilan upang maging kwalipikado ang Casiguran sa ARCP2.

Kabilang sa mga layunin ng Casiguran ARC Cluster A na dapat makamit mula 2010 hanggang 2014 ay ang pagsasakumpleto ng Land Acquisition and Distribution (LAD) at leasehold activities, pagpapataas pa ng produksyon ng agrikultura at kita sa pagsasaka, pagpapalakas ng farmer’s cooperative, pagsusulong ng paggamit ng mga makabagong teknolohiya sa pagsasaka at pagpapaganda ng mga serbisyong pang-imprastruktura at mga pangunahing suporta sa pagsasaka. (AJA, DAR/BARecebido, PIA Sorogon)

Earth day ipagdiriwang, tree planting at coastal clean-up tampok na mga aktibidad

Ni: Bennie A. Recebido

LUNGSOD NG SORSOGON, April 19 (PIA) – Sa darating na ika-22 ng Abril ay muling ipagdiriwang partikular ng mga makakalikasang grupo at institusyon ang Earth Day.

Layunin ng pagdiriwang na ipakita sa bawat tao ang kagandahan ng mundo at ipanawagan sa bawat indibidwal, organisasyon at mga institusyon na gawin ang kanilang bahagi upang mapangalagaan ang mundo para sa sustenableng hinaharap.

Sa Sorsogon, dalawang grupo sa dalawang magkaibang araw ipagdiriwang ang Earth Day.

Sa panig ng Department of Environment and Natural Resources (DENR) Sorsogon  at ng Provincial ENRO, katuwang ang 903^rd Infantry Brigade, lokal na pamahalaan ng Castilla, residente ng Brgy. Amomonting sa Castilla at mga tauhan at mag-aaral ng Sorsogon State College Castilla Campus, ay magdiriwang ng Earth Day sa darating na ika-20 ng Abril.

Ayon kay PENR Officer Engr. Maribeth L. Fruto dahilan sa nataong araw ng Linggo ang aktwal na pagdiriwang ay ginawa na lamang nila ito sa araw ng Biyernes upang makalahok din ang mga katuwang nilang ahensya.

Aniya, magsasagawa sila ng tree planting, re-planting at ring weeding activity sa Brgy. Amomonting, Castilla. Ito umano ang model site ng Upland Development Project at Reforestation Project ng PENRO-LGU na may layuning protektahan at palaguin ang sampung ektaryang lupain sa pamamagitan ng pagtatanim ng iba’t-ibang mga punong pang-kagubatan (forest trees) kasama na rin ang mga namumungang punong-kahoy.

Samantala, ipagdiriwang naman ng Provincial Tourism Office ang Earth Day sa araw mismo ng selebrasyon nito sa Abril 22, araw ng Linggo. Ayon kay Provincial Tourism Officer Cris Racelis isang coastal clean-up ang gagawin nila sa Brgy. Dancalan sa Donsol partikular sa mga dinarayong lugar panturismo doon.

Katuwang naman nila sa gagawing aktibidad ang mga tauhan ng pamahalaang bayan ng Donsol, mga mangingisda at Scubasurerong kasapi ng Municipal Police Station ng Donsol.

Bago ang aktwal na coastal clean-up ay magsasagawa ang mga lalahok ng isang Fun Run activity sa palibot ng lugar kung saan sila magsasagawa ng clean-up drive. Ang malilikom na pondo ay idadagdag sa pagmantini ng Tourism Center sa Donsol. (BArecebido, PIA Sorsogon)

Gubatnon hinikayat na boluntaryong magturo ng pagbabasa sa mga bata

Ni: Bennie A. Recebido

LUNGSOD NG SORSOGON, April 19 (PIA) – Patuloy pa ring hinihikayat ni Gubat Municipal Mayor Ronnel Lim ang mga Gubatnong nais gamitin ang kanilang bakasyon sa produktibong paraan na boluntaryong sumali sa inilunsad nilang programa, ang Municipal Reading Recovery Program.

Ang Municipal Reading Recovery Program ay sinimulan nang ipatupad ngayong buwan ng Abril at magtatagal hanggang sa buwan ng Mayo.

Ayon kay Lim, isa itong programa para sa mga batang hindi pa marunong magbasa o kaya’y kinakailangan pang linangin ang kanilang kakayahan na magbasa.

Aniya, ang programa ay binuksan nila para sa mga Gubatnon na nakatira sa Sorsogon o yaong balak magbakasyon sa bayan ng Gubat ngayong summer na nais magboluntaryo at nais ibahagi ng libre ang kanilang serbisyo at kakayahan upang matuto sa pagbasa ang mga kabataan sa kanilang lugar.

Ang programang ito ng lokal na pamahalaang bayan ng Gubat ay bahagi din ng kanilang pagpupugay sa tanyag na manunulat ng Gubat na si Delfin Fresnosa.

Mayaman din ang bayan ng Gubat pagdating sa kultura at sining kung saan ilang mga Gubatnon na rin ang naging tanyag hindi lamang bilang manunulat kundi bilang stage performer, historian at cultural worker.

Ang mga interesadong magboluntaryo ay magsadya lamang umano sa tanggapan ng Municipal Mayor upang malaman ang iba pang detalye sa pagsasakatuparan nito. (BARecebido, PIA Sorsogon)

Bagong TESDA provincial office pasisinayaan; TESDA General Secretary Villanueva bibisita sa Sorsogon

Ni: Bennie A. Recebido

LUNGSOD NG SORSOGON, April 18 (PIA) – Matapos ang mahabang panahong paghihintay ng Technical Education and Skills Development Authority (TESDA) Sorsogon para sa pagkakaroon ng sariling provincial office, masayang inihayag ni TESDA Provincial Director Rodolfo Benemerito na sa wakas ay mayroon na silang sariling gusali na matatagpuan sa City Hall Complex, Brgy. Cabid-an, Sorsogon City.

Ayon kay Benemerito, pasisinayaan at pababasbasan ang bagong TESDA Sorsogon Provincial Office bukas, April 18, 2012, ala-una y medya ng hapon kung saan magiging espesyal na panauhin si TESDA General Secretary Joel Villanueva na nakatakda ring bumisita sa rehiyon ng Bikol simula ngayon, April 18 hanggang sa Biyernes, April 20, para sa mga kaganapang may kaugnayan sa operasyon ng Technical Vocational Education and Training (TVET) sa buong rehiyon.

Alas nueve ng umaga bukas ay darating sa tanggapan ni Sorsogon Governor Raul R. Lee si Gen. Sec. Villanueva kasama ng mga opisyal ng TESDA Regional Office V para sa kanyang courtesy call at agad na magtutungo sa bayan ng Prieto Diaz para sa paglulunsad ng Integrated Eco-Wellness Program kasama na ang pirmahan ng memorandum of Agreement, turn-over ng mga kagamitan tulad ng Video Compact Disc (VCD) at iba pang mga reference material para sa pagpapatupad ng TVET. Magkakaroon din ng Opening program para sa hilot wellness massage at hairdressing sa kaparehong lugar.

Ala-una ng hapon ay magsasagawa naman ang mga opisyal ng courtesy call sa tanggapan ni Sorsogon City Mayor Leovic Dioneda at pakikipagdayalogo sa mga stakeholder ng TVET upang mabigyan pa ng pagkakataon ang magkabilang panig na makapagtalastasan at makapagpaabot ng mga usapin at isyung may kaugnayan sa TVET sa Sorsogon.

Matapos ang dayalogo ay susundan ito ng pagbabasbas at pasinaya ng bagong tanggapan ng TESDA Sorsogon at tree planting activity bago tuluyang bumalik ang grupo sa Naga City.

Inaasahang ang pagbisita ni Gen. Sec. Villanueva at iba pang mga matatas na opisyal ng TESDA ay magbubukas pa ng mas maraming oportunidad para sa technical-vocational development sa lalawigan ng Sorsogon. (BARecebido, PIA Sorsogon)