Sorsogon Water District Office pinaiigting pa ang kanilang environmental campaign

By: Bennie A. Recebido

Sorsogon City, May 20 (PIA) – Patuloy ang Sorsogon City Water District (SCWD) sa pagsasagawa ngayon ng mga aktibidad na makakatulong upang mabawasan ang pag-iinit ng temperatura na nagiging sanhi ng pagkakatuyo ng mga water sources.

Ilan sa mga aktibidad na ginagawa ngayon ng SCWD ay ang tree planting, reforestation at restoration program sa Sitio Bagong Sirang sa Brgy. Macabog at sa ilan pang mga barangay na siniserbisyuhan ng SCWD upang maiwasan ang patuloy pang pang-aabuso sa kalikasan.

Ayon kay SCWD general manager Ronaldo Barbonio, nais nilang makapagtatag ng magandang relasyon at partnership sa mga residente lalo na sa malapit sa mga watershed areas upang makatuwang nila sa pagpapaigting pa ng kanilang environmental campaign alinsunod na rin sa ipinatutupad na environmental protection program ng pamahalaang Aquino.

Isa diumano sa mga suliraning kinakaharap nila ngayon ay ang walang tigil na pagpuputol ng kahoy ng mga mag-uuling.

Sinabi ni Barbonio na naiintindihan nila ang uri ng hanapbuhay ng mga mag-uuling subalit dapat lamang aniya na palitan ng mga ito ang mga kahoy na pinuputol nila.

Kaugnay nito, iminungkahi ni Barbonio sa mga mag-uuling na pag-aralan din ang teknolohiyang green charcoal kung saan sa halip na kahoy ay mga dahon ang gagamitin sa pag-uuling.

Sa mga high end restaurant naman, iminumungkahi niya ang paggamit ng mga volcanic rocks bilang panggatong sapagkat mas matagal diumano ang silbi ng baga nito. (PIA Sorsogon)

Sorsogon nakakuha ng average rating sa pagpapatupad ng DRMM

By: Bennie A. Recebido

Sorsogon City, May 20 (PIA) – Average ang nakuhang rating ng lalawigan ng Sorsogon sa larangan ng pagpapatupad ng Disaster Risk Reduction and Management base sa assessment na isinagawa ng World Food Programme (WFP) at Earthquake Megacities Initiative (EMI).

Sa ipinalabas na press release ng ng Sorsogon Provincial Disaster Risk Management Office (PDRMO), nakuha ang katamtamang grado dahilan sa pagiging aktibo diumano ng Provincial Disaster Risk Reduction and Management Council (PDRRMC) sa mga pagpaplano at pagtugon nito sa panahong may kalamidad, gayundin ang mahusay na pagganap ng Provincial Disaster Risk Management Office (PDRMO), ang secretariat ng PDRRMC.

Kinumpirma din sa rating na nagsasagawa ang lalawigan ng Sorsogon ng panayang contingency planning para sa volcanic eruption at mga pagbaha.

Sa apat na pilot provinces ng WFP at EMI, ang Sorsogon umano ang nagpakita ng mabilis na pagsulong sa pamamagitan ng pagsasakatuparan nito ng Philippine Disaster Risk reduction and Management Act of 2010.

Matatandaang ang Sorsogon ay isa sa mga most vulnerable provinces na nalalantad sa sari-saring panganib partikular na ang volcanic eruption, bagyo, tsunami, pagbabaha, at landslides.

Sinabi naman ni Provincial Information Officer Von Labalan na dahilan sa marami nang naging karanasan ang lalawigan sa mga bagay na mayroong kinalaman sa iba’t ibang uri ng panganib ay ipinapakita nito ang pagpursige at pagsulong sa DRRM.

Suportado din aniya ng Pamahalaang Panlalawigan ng Sorsogon ang mga serye ng capacity building na isinagawa dito maliban pa sa iba’t-ibang mga disaster preparedness assistance mula sa national, civil society, mga international institutions at organizations.

Hamon din sa ngayon sa PDRRMC ang naging rating na ito ng WFP at EMI upang higit pang patatagin ng mga sangkot na ahensya ang Disaster Risk Reduction program ng lalawigan ng Sorsogon. (PIA Sorsogon)

Bagyong Bebeng pinerwisyo ang mga road shoulder sa 2nd district ng Sorsogon

By: Francisco B. Tumalad Jr.

Sorsogon City, May 19 (PIA) – Malaking perwisyo ang iniwan ng nagdaang bagyong Bebeng sa lalawigan ng Sorsogon hindi lamang sa mga pananim, sakahan at alagang hayop kundi maging sa mga pampublikong imprastrasktura na kinakailangang maisaayos agad.

Sa ipinalabas na Infra Assessment Damage Report ng Department of Public Works and Highways – Sorsogon 2 District Engineering Office (DPWH-S2DEO), naperwisyo ang bahagi ng kalsada ng Daan Maharlika sa Brgy. Casini sa bayan ng Irosin, Sorsogon kung saan nakapagtala ng 6.60m high eroded shoulder doon.

Nasira din ang konkretong lakaran at rip-rap sa Juban-Magallanes road na matatagpuan sa Brgy. Binanuahan, Juban at bumagsak naman ang 6.0 high road shoulder ng Maharlika Highway sa Brgy. Jagusara sa Juban, habang ang 2.5 metrong road shoulder sa Brgy. Lajong, Juban, Sorsogon ay naperwisyo at bumagsak din.

Ayon pa sa ulat ng DPWH-S2DEO, nasira rin ang Binanuahan River Control sa Brgy. Binanuahan, Juban kung saan inanod ng napakalakas na agos ang dike doon.

Sa bayan ng Bulan ay nakapagtala din ng ilang mga infrastructure damage sa Gate-Bulan airport road kung saan bumagsak ang 1.7 metrong taas ng road shoulder sa Brgy. San Isidro, 1.80 metrong taas ng road shoulder sa Brgy. Fabrica at 2.5 metrong taas ng road shoulder sa Brgy Pawa.

Dagdag pa ni DE Alamar na bago pa man dumating ang bagyong Bebeng sa lalawigan ay binigyan na nya ng deriktiba si DPWH Maintenance Section Chief Engr. Jose Gigantone na ihanda ang mga tauhan nito para sa mga gagawing clearing operation sa mga  pambansang lansangan na sakop ng ikalawang distrito.

Nagsasagawa na rin si DE Alamar ng malawakang pag-aaral para sa pagsasaayos sa lalong madaling panahon ng mga pampublikong imprastrakturang nasira ng bagyong bebeng. (PIA Sorsogon)

DPWH 2nd district Sorsogon, nagsumite ng kanilang finished infrastructure projects report

By: Francisco B. Tumalad Jr.

Sorsogon City, May 19 (PIA) – Ipinalabas kamakailan ni Department of Public Works and Highways (DPWH) 2^nd District Engineer Juanito Alamar ang mga proyektong pangimprastrukturang nakumpleto o natapos nang maipatupad ng kanilang tanggapan tulad ng pagsasaayos ng mga kalsada, farm to market roads, pagtatayo ng mga pumping stations, flood control projects at school building sa ibat-ibang mga barangay sa siyam na bayan ng Sorsogon.

Sa ulat na ibinigay ng DPWH 2^nd district sa PIA Sorsogon, pitong mga barangay ang nabebenipisyuhan na ng farm to market roads partikular ang Brgy. Bulawan at San Isidro sa Pto. Diaz, Brgy. Tigkiw at Cabiguhan sa Gubat, Brgy. Poblacion sa Bulusan at Brgy.Marihab sa Bulan.

Kumpleto na rin ang artesian well, pumping station at iba pang water supply system sa Brgy.Culasi at Pawa sa bayan ng Matnog, Brgy.Sta. Lourdes at Carayat sa Pto.Diaz at Brgy. Bacolod sa Juban, Sorsogon at pinapakinabangan na ng mga residente doon.

Sa barangay naman ng North Poblacion, Juban, Sorsogon ay tapos na rin ang konstruksyon ng drainage system, maging ang pagpapagawa ng school library hub sa Gubat South Central School at concreting ng multi-purpose pavement sa Brgy San Roque, Sta. Magdalena, Sorsogon.

Ayon kay Eng. Alamar, ang naturang mga proyekto ay ipinatupad base na rin sa ipinalabas na Special Allotment Release order (SARO) ng Department of Budget and Management (DBM) at agad ding agad natapos bago pa man dumating ang nakatakdang panahon ng patrabaho nito.

Matatandaang una nang nagpalabas ng kautusan si Pangulong Benigno Aquino III kay DPWH Secretary Rogelio L. Singson na kinakailangan nilang magsumite bawat linggo ng mga kaganapan ng kanilang tanggapan upang ipagbigay alam sa publiko ang mga proyekto, programa at opisyal na mga aktibidad ng DPWH. (PIA Sorsogon)

‘Kalikasan para sa Kalusugan’ inilunsad

By: Bennie A. Recebido

Sorsogon City, May 19 (PIA) – Sa pangunguna ng DWOL ‘Padaba’ – FM radio station, nagkaroon ng launching ng ‘Kalikasan para sa Kalusugan’ alas tres ng hapon kahapon, May 18, sa Brgy. Tugos, Sorsogon City.

Ayon kay Grace Boca, coordinator ng DWOL, layunin ng aktibidad na matulungan ang mga mahihirap na mga mag-aaral na mabigyan ng mga kagamitan sa kanilang pag-aaral.           

Aniya, lalahukan ito ng mga mag-aaral mula sa iba’t-ibang mga barangay kung saan magdadala sila ng mga recyclable waste materials tulad ng plastic, bote, dyaryo at iba pa na iipunin at ipagbibili.

Ang halagang malilikom ang siyang ipambibili ng mga kagamitang ipamamahagi sa mga mag-aaral sa iba’t-ibang mga barangay.

Ang nasabing programa ay naisakatuparan sa pagtutiulungan ng Department of Education (DepEd) City Division, LGU-Bulusan, LGU-Sorsogon City, iba pang mga lokal na opisyal ng pamahalaan ng Sorsogon, Energy Development Corporation at mga concerned agencies. (PIA Sorsogon)