Ilegal quarrying makakapinsala sa Cawayan Bridge

Tagalog News

Sorsogon City, January 25 – Kapag hindi pa natigil ang illegal quarrying sa ilalim at palibot ng Cawayan Bridge, tiyak na magiging dahilan ito ng pagbagsak nito at magpaparalisa sa land transportasyon patungong Visayas at Mindanao.

Ito ang obserbasyon ng nakakararaming mga Sorsoganong nakakaalam sa walang tigil na quarrying sa ilalim na bahagi ng tulay.

Una na rito ay naging laman na rin ng privelege speech ni Sangguniang Panlalawigan member Benito Doma ang agarang pagpapatupad ng mga kaukulang ordinansa na poprotekta sa paligid ng Cawayn Bridge.

Ang Cawayan Bridge ang nagdudugtong sa Brgy. Guinlajon at Basud sa kanlurang distrito ng lungsod ng Sorsogon. Ito rin ang tinatayang pinakamatanda at pinakamahabang tulay sa lalawigan ng Sorsogon. Dito rin dumaraan ang lahat ng uri ng sasakyang panlupa, pribado man o pampubliko na patungong Visayas at Mindanao.

Ayon kay Department of Public Works and Highways Sorsogon 1^st District Engineer Romeo Doloiras, ang posibilidad ng pagbagsak ay laging mangyayari, lalo pa aniya’t hindi lamang illegal quarrying ang kalaban kundi maging ang patuloy at lakas na buhos ng ulan na nakababawas sa tibay ng tulay. Nilinaw din ni Doloiras na wala sa kanilang hurisdiksyon ang magpatigil o manghuli ng mga sangkot sa ilegal quarrying.

Kakulangan naman sa mga tauhan ang itinuturong suliranin ni Provincial Environment and Natural officer Maribeth Fruto kung kaya’t hindi regular na nababantayan at namomonitor ang mga lugar na tulad ng Cawayan Bridge. Sa katunayan, nanghiram na diumano si Fruto ng tauhan mula sa ibang departamento ng provincial government upang mamonitor ang lugar.

Naniniwala naman si Basud Brgy. Captain Leonida Dionela na alternatibong pangkabuhayan ang para sa pamilyang sangkot sa quarrying ang dapat na ibigay nang sa gayon ay tuluyan nang iwanan ng mga ito ang illegal na hanapbuhay na kanilang ginagawa.

Sorsogon binisita ng World Food Program ng UN

Tagalog News

Sorsogon City, January 25 – Dumating dito sa lalawigan ng Sorsogon noong Huwebes ang ilang kinatawan ng World Food Program ng United Nations upang talakayin kay Sorsogon Provincial Management Office (SPMO) Executive Director Sally A. Lee ang tulong na nais nilang ipaabot sa mga lugar ditto na apektado ng mga nagaganap na kalamidad.

Sa pahayag ni Lee sa kanyang Sa Kapitolyo week-end report, kasunod ng kahilingang tulong na ipinaabot sa World Food program ng Department of Social Welfare and Development (DSWD), ay agad itong nakipagkita sa kanya upang alamin at pag-aralan ang naging resulta ng matinding pag-uulan nitong mga nakaraang lingo para sa kanilang gagawing hakbang.

Ayon kay Lee, kasalukuyang nakatuon ang programa ng WFP sa kalagayan at hanapbuhay ng mga pamilyang apektado ng kalamidad lalo na ang mga magsasaka at mangingisda. Nakahanda din diumano itong magbigay ng kaukulang tulong lalo na ang pagkain para sa mga apektado.

Batay na rin sa ibinigay na rekomendasyon ng DSWD, partikular nilang pagtutunan ng kaukulang tulong ang mga bayan ng Juban at Magallanes.

Isa ang Juban sa dalawang bayan dito sa lalawigan ng Sorsogon na sa ngayon ay nasa ilalim ng state of calamity dala ng baha at madalas na pag-agos ng lahar sa mga ilog dito simula pa nang mag-alburuto ang Bulkang Bulusan noong nakaraang taon. Habang highly-vulnerable area naman ang Magallanes dahilan sa madalas na pagkakaroon ng landslide dito.

Ayon kay Lee, malugod na tatanggapin ng provincial governemnt ang anumang tulong na magmumula sa WFP, bagama’t ayaw naman aniya ng lokal na pamahalaan na malabisin ang pagiging “good samaritan” ng mga nagnanais na tumulong, kung kaya’t pinagsisikapan din ng lalawigan na matutong tumayo sa sariling mga paa at turuan din ng ganitong uri ng prinsipyo ang mga mamamayan nang sa gayon ay sila maituturing na kawawa sa tuwing mayroong nagaganap na mga kalamidad.

Pinuri naman ng WFP ang lalawigan sa kahandaan at katatagan nito sa harap ng mga pagsubok na dulot ng mga pagbabago ng panahon.

Ang WFP ang siyang sangay na food aid program ng United Nations at ang pinakamalaking humanitarian organization na nakatuon sa mga bansang nakararanas ng pagkagutom at malnutrsiyon bunsod ng mga iba’t-ibang uri ng emerhensya na nagaganap sa alin mang sulok ng mundo. VLabalan/PIA Sorsogon)

PANGALAWANG GRUPO NG US MEDICAL MISSION NA MAGBIBIGAY NG LIBRENG OPERASYON PARA SA MGA SORSOGANON, DUMATING NA SA SORSOGON

TAGALOG NEWS

SORSOGON CITY (January 24) – Matapos ang pagbibigay ng libreng serbisyong medikal ng unang grupo ng US medical mission group nitong nakaraang lingo, sinimulan na rin kahapon ng pangalawang grupo ng mga surgeons ang 2^nd batch ng libreng gamutan ditto sa Sorsogon.

Ayon kay provincial Health Officer Dr. Edgar Garcia, magandang oportunidad ang ibinibigay ngayon ng grupo ng US based D’ Bicolanos and Friends Foundation Incorporated na nakabase sa Washinghton, DC para sa lahat na mga mayroong suliranin sa kalusugan na kailangang ma-operahan subalit kapos sa perang gagastusin para dito.

Mula kahapon, magtatagal ang libreng operasyon ng mga ekspertong doktor hanggang sa January 28 kung saan manginginabang ditto ang mga pasyenteng may cleft palate, myoma, at iba pang mga gynecological related problems.

Para sa mga walk-in patients, maaari silang dumirekta sa Sorsogon Provincial Hospital subalit nilinaw ni Garcia na ikakategorya sila sa waiting list dahil bibigyan muna ng prayoridad yaong mga una nang nakipag-ugnayan sa kanilang mga Rural Health Unit o sa district hospitas.

Matatandaang katatapos lamang magbigay ng libreng operasyon ng unang grupo ng mga doktor na kabilang sa D’ Bicolanos and Friends Foundation Incorporated nitong nakaraang Enero 17-21, 2011.

Paalala ni Garcia sa mga pasyente na nagnanais na maka-benepisyo ng libreng operasyon, maliban sa mga cleft patients, na kailangang mayroon itong kasamang dalawang blood donors.

Ang aktibidad ay isa mga pilot projects ni Sorsogon Governor Raul R. Lee na may mithiing patuloy na mapangalagaan ang kalusugan ng mga Sorsoganon. (BARecebido with reports from VLabalan, PIA Sorsogon)

MAHIGIT P40M DANYOS SA AGRIKULTURA NAITALA NG OPA SORSOGON

SORSOGON PROVINCE – Umabot sa P40,739,672 ang halaga ng mga binhi ng palay na napinsala sa lalawigan ng Sorsogon dahilan sa walang tigil na pag-ulan na nagdulot naman ng mga pagbaha.

Ito ang ipinalabas na ulat ng Office of the Provincial Agriculture kung saan walong munisipyo ang nasalanta kabilang na ang Bulan na may pinakamataas na napinsalang mga pananim na umaabot sa P20,579,405.

Sumunod dito ang mga bayan ng Pilar, Castilla, Barcelona, Matnog, Juban at Bulusan, habang ang Sta. Magdalena naman    ang may pinakamababang pinsala na umaabot lamang sa P126,060 ang halaga.

Ayon sa isinumiteng validated report ng emergency response team sa OPA ng bawat munisipyo, may kabuuang 2,994.81 ektarya ng palayan ang mga nasira. 1,933.49 ektarya naman ang may tsansa pang mailigtas habang ang iba naman ay wala nang tsansa pang makarecover.

Ayon kay Assistant Provincial Agriculturist Ma. Teresa Destura, 3,420 na magsasaka ang apektado ng walang tigil na pag-uulan. Subalit sinabi ni Destura na matutulungan pa rin nila ang mga magsasaka sa pamamagitan ng kanilang rehabilitation program.

Aniya, magbibigay ng full seed subsidy ang Department of Agriculture sa mga magsasakang nakaranas ng total damage sa kanilang pananim. Nagkakahalaga ng P1,200 ang binhi o ”certified seeds” na ipamimigay ng DA.

Para naman sa mga bahagyang napinsala, kalahati lamang ang ibibigay na subsidy sa mga ito.

Nilinaw ni Destura na kinakailangang kasama sa ’Masterlist of farmers Affected’  ang magsasakang nais makabenipisyo sa subsidy.

Dagdag pa ni Destura na malaking tulong na rin ito upang muling makapagsimula ang mga naapektuhang magsasaka. (PIA Sorsogon)

SORSOGON CITY SCHOOLS NAGPADALA NG KINATAWAN SA SEMINAR WORKSHOP ON SPED TEACHERS

Tagalog News Release

SORSOGON CITY – Tatlong Special Education (SPED) Teachers ang ipinadala ng Sorsogon City Schools Division sa lungsod ng Naga upang dumalo sa isinagawang serye ng Seminar Workshop on SPED teachers.

Dalawa sa tatlong guro ay mula sa Sorsogon East Central School habang ang isa naman ay mula sa Sorsogon National High School.

Ipinadala ang nasabing mga guro upang magsanay doon at maiangat pa ang antas ng kanilang kaalaman sa pagtuturo at paghawak sa mga batang may espesyal na pangangailangan.

Sa pamamagitan ng Rotary Club of Naga at sa pakikipagtulungan ng College of Education of De la Salle university at ng lokal na pamahalaan ng Lunsod ng Naga ay naisakatuparan ang nasabing seminar na sa ngayon ay isinasagawa sa Naga Youth Center, Naga City.

Sinimulan ang tatlong araw na unang yugto ng nasabing workshop kahapon na magtatagal hanggang sa Sabado, Jan 22. Nakatakda naman ang pangalawang module sa Pebrero 11 hanggang 13, habang ang pangatlong module ay sa Marso 10 hanggang 12 ng taong kasalukuyan naman gagawin.

Sa DepEd Memorandum Order No. 164 series of 2010, dapat na tapusin ng tatlong guro ang three-quarter modules upang hindi sila madisqualify sa nasabing seminar at mabayaran din sila ng kaukulang halaga ng pamasahe at iba pang gastusin sa training.

Pagkatapos ng three-quarter modules ay kinakailangan nilang magsumite ng kopya ng kanilang action plan sa kanilang school heads, schools division superintendent at DepEd regional director. Kinakailangan ding maipatupad nila ang ginawa nilang action plan sa lugar kung saan sila nagtuturo. (Jun Tumalad, PIA Sorsogon)