Bird Flu sinusubaybayan ng City Veterinary Office

Ni: Bennie A. Recebido

Lungsod ng Sorsogon, October 4 (PIA) – Sinabi ni Sorsogon City Veterinarian Dr. Alex Destura na bagamat wala pa namang naitatalang kaso ng bird flu virus sa bansa ay masusi pa rin nilang sinusubaybayan ang posibleng pagpasok nito sa lungsod ng Sorsogon.

Ayon kay Dr. Destura, aminado siyang ilang mga lugar sa lungsod ang palagiang dinadagsa ng mga migratory birds o mga ibong nagmumula sa ibang bansa.

Ilan sa mga lugar na ito ay ang Brgy. Cabid-an sa East District at Brgy. Gimaloto sa West District at kadalasang sa mga ganitong buwan ito dumadayo dito.

Pinaniniwalaang ang mga dayuhang ibong tulad nito ang carrier o nagdadala ng bird flu virus na delikado sa mga alagang manok, apto, itik at mga kauring hayop at maging sa mga baboy din.

Kaugnay nito, nanawagan si Dr. Destura sa publiko na sakaling may mapansing kakaiba sa kanilang mga alagang hayop ay kaagad na ipaabot ito sa kanilang kaalaman upang makagawa rin sila ng mabilisang aksyon at upang huwag nang lumala at kumalat pa ang pinangangambahang bird flu. (PIA Sorsogon)

DTI hinikayat ang publiko na bisitahin ang Kasanggayahan Trade Fair

Ni: Bennie A. Recebido

Lungsod ng Sorsogon, October 4 (PIA) – Hinikayat ni Marnela Hernandez, division chief ng Department of Trade and Industry (DTI) Sorsogon ang publiko particular ang mga Sorsoganon na bisitahin ang ginagawang Kasanggayahan Trade Fair 2011 sa Balogo Sports Complex, Sorsogon City.

Ayon kay Hernandez, labing-dalawang Local Governmen Units (LGUs) sa lalawigan ang lumahok ditto kung saan nakadisplay sa kani-kanilang mga booth ang iba’t-ibang mga produktong ipinagmamalaki nila pati na rin ang mga magagandang lugar at tanawin na maari ding bisitahin ng mga turista, dayuhan man o lokal.

Maging ang mga armored vehicles at iba pang mga kagamitan at mga larawan ng mga programa at aktidad ng Philippine Army sa Sorsogon ay makikita sa napakalaking booth nito.

Sakaling makaramdam ng gutom ang mga bibisita sa Balogo Sports Complex ay may mga food and drinks stalls na maaaring pagpilian ayon na rin sa mga uri ng pagkain at inuming nais ng mga ito.

Kabilang pa sa mga makikita sa trade fair ay ang mga kakaibang handicrafts na gawa sa lokal na material ng Sorsogon tulad ng mga ladies at men’s bags, laptop at cellphone cases, mga pandekorasyon sa bahay at opisina, mga pagkaing gawa sa seaweeds tulad ng ice candy at noodles, mga kakaibang pagkaing gawa sa pili, mga pangregalo at marami pang iba.

Ang nasabing trade fair ay magtatagal hanggang sa huling araw ng Oktubre, 2011. (PIA Sorsogon)

Consolidated damage report kaugnay ng bagyong Pedring inilabas na ng SPDRMO

Ni: Bennie A. Recebido

Lungsod ng Sorsogon, October 3 (PIA) – Siyam na mga bayan at isang lungsod sa lalawigan ng Sorsogon ang nagsumite na ng kanilang damage report matapos na dumaan ang bagyong Pedring noong Setyembre 26 hanggang 27.

Sa pinagsamang ulat ng Sorsogon Provincial Disaster Risk Management Office (SPDRMO), pitong barangay sa lungsod ng Sorsogon ang nakapagtala ng mga evacuees na umabot sa kabuuang 459 na pamilya na pawang nabigyan naman ng kaukulang atensyon ng kani-kanilang mga barangay-LGU (Local Government Unit).

Walong mga mangingisda mula sa Brgy. Cambulaga ang naiulat na nawala subalit lahat ng mga ito ay narekober ng buhay habang apat na mga bangka dito ang tuluyang nasira.

Isang bahay ang nasunog sa bayan ng Magallanes dahilan sa pagkaputol ng isang poste ng Sorsogon Electric Cooperative (SORECO) doon.

Pawang mga naistranded lamang ang naitalang naapektuhan ng bagyo sa bayan ng Pilar at maging sa Matnog at Bulan ay may mga naistranded din.

Naperwisyo naman ang ilang kabahayan at imprastruktura sa bayan ng Matnog at Bulan dahilan sa storm surge. Isa ang naitalang nasugatan sa bayan ng Bulan.

Maliban sa nasirang bahay, nakapagtala din ang Pto. Diaz ng 62 pamilyang evacuees. Habang nailigtas naman sa Donsol ang tatlong mangingisdang napadpad mula sa Claveria, Masbate.

Sa panig ng agrikultura, umabot sa P210,275.52 ang napinsala sa bayan ng Casiguran at 428.68 ektaryang taniman ang naapektuhan at 374 na magsasaka naman ang napinsala sa bayan ng Juban, habang kakaunti lamang ang naitalang pinsala sa niyog sa bayan ng Bulusan.

Sa kabila ng damage report na ito, nagpasalamat pa rin ang mga awtoridad at mas nakakaraming residente dito dahilan sa hindi gaanong hinagupit ang Sorsogon ng nagdaang bagyo. (PIA Sorsogon)

“Walk for Peace” isinagawa sa bayan ng Castilla, Sorsogon

Ni: Bennie A. Recebido

Lungsod ng Sorsogon, October 3 (PIA) – Bilang bahagi ng pagdiriwang ng National Peace Consciousness Month noong tumalikod na buwan, isang aktibidad na tinaguriang “Walk for Peace” ang isinagawa ng mga mag-aaral at mga guro ng San Isidro Elementary School sa Brgy. San isidro, Castilla, Sorsogon at ilang mga piling mag-aaral ng Bicol University sa pakikipagtulungan nito sa Bicol Consortium for Peace and Development sa ilalim ng Office of the Presidential Adviser for Peace Process (OPAPP), 903^rd Infantry Brigade ng Philippine Army sa pamumuno ni Col. Felix J. Castro, Jr. at ng lokal na pamahalaan ng Castilla noong Biyernes, September 30.

Layunin ng aktibidad na imulat ang kamalayan ng mga mag-aaral at ng publiko ukol sa kahalagahan ng kapayapaan at sa mga pamamaraan upang mamantini ang isang mapayapang komunidad.

Sa ginanap na maikling programa matapos ang “walk for peace” sa palibot ng bisinidad ng barangay San Isidro, binigyang-diin ni Lt. Col. Lenart Lelina, Brigade Executive Officer ng 903^rd Infantry Brigade ng Philippine Army, na nagsisimula ang kapayapaan sa pagmamahal sa sarili upang maipadama ito sa kapwa at sa bayan. Dagdag pa ng opisyal na pangunahing karapatang pantao ang pagsusulong ng kapayapaan sa bawat isa.

Ipinaliwanag din niya sa publiko ang bagong kampanya ngayon ng Armed Forces of the Philippines (AFP) kung saan lahat umano ng aksyon ng AFP ay nakatuon sa tao o yaong tinatawag na ‘people-centered action’ at panguahing misyon ng AFP ang maipanalo ang kapayaan laban sa mga naghahasik ng mga kaguluhan sa komunidad at terorismo sa bansa.

Tiniyak naman ni Dr. Herbert Rosana, director ng Bicol Consortium for Peace and Development ng Bicol University at siya ring kinatawan ng OPAPP na suportado nila ang lahat ng mga paaralang nagsusulong ng mga adbokasiya at programang may kinalaman sa kapayapaan.

Nagpasalamat naman ang punong-guro ng nasabing paaralan, parokya at lokal na pamahalaan ng barangay San isidro at ng bayan ng Castilla. Ayon kay Castilla Mayor Olive Bermillo, maliban sa buong suportang ibinibigay nila sa mga programang pangkapayapaan ng pamahalaan, nakatakda rin umano silang gumawa ng mga proyektong higit pang magbubuklod-buklod sa lahat ng sektor ng komunidad. Nanawaagn din ito sa lahat ng nakilahok sa ‘Walk for Peace’ na suportahan din ang gagawin nilang tree planting activity sa darating na mga araw.

Ang San Isidro Elemetary School sa Castilla ng napiling Pilot School for Peace ng OPAPP sa rehiyon ng Bicol. (PIA Sorsogon)

ECo-Friendly Kids

KIDS PLAY. Schoolmates from Puro Elementary School shift their weekend play hours to an eco-friendly kids play during the International Coastal Clean Up Day last Saturday (September 17). Scores of marine debris are hauled out from Albay Gulf by hundreds of Legazpeño volunteers which attended the weekend coastal cleanup, and among them are 56 students from the said school. (Photo by JESSEL S. BASANTA, DENR-EMB/PIA Sorsogon)