Kasanggayahan Presscon matagumpay na naidaos kahapon

Ni: Bennie A. Recebido

LUNGSOD NG SORSOGON, September 27 (PIA) –Matagumpay na naidaos kahapon ang press conference kaugnay ng gagawing pagdiriwang ng Kasanggayahan Festival sa darating na Oktubre 8 hanggang 17 ngayong taon.

Dalawampu’t-anim na mga kasapi ng lokal na tri-media ang dumalo sa nasabing aktibidad habang naroroon naman ang mga coordinator ng halos lahat ng mga aktibidad na gagawin kaugnay ng gagawing pagdiriwang.

Ipinaliwanag ni Assistant Provincial Agriculturist Ma. Teresa Destura ang tema ng pagdiriwang, “Kasanggayahan 2012: Sorsogon Paunlarin, Agrikultura’t Industriya Pasiglahin”, kung saan aniya itatampok sa sampung araw na pagdiriwang ang mga natatanging produktong agrickultural ng Sorsogon at mga taong may malaking papel sa agrikultural na pag-unlad ng lalawigan.

Tiniyak din niya ang buong partisipasyon ng mga magsasaka sa buong lalawigan lalo pa’t nagkaroon ng maayos na koordinasyon sa mga Municipal Agriculturist ng 14 na bayan at isang lungsod ng lalawigan.

Ayon naman kay Sorsogon Provincial Management Office Executive Director Sally A. Lee at siyang kumatawan kay Governor Raul R. Lee, maliban sa itatampok ang mga produktong agrikultural tulad ng bigas, abaca, rootcrops at niyog, nais din nilang makilala ang iba pang mga yamang mineral ng lalawigan tulad aniya ng pumice, limestone, buhangin, ceramics at iba pa, kasama na rin ang cottage industry dito tulad ng handicraft, pottery at food preservation.

Sinabi din niyang ito ang magsisilbing panimulang taon sa gagawing 5-year development plan ng Kasanggayahan Festival kung saan bawat taon ng pagdiriwang ay may itatampok na natatanging produkto, serbisyo o katangian ng mga Sorsoganon hanggang sa tuluyang magkaroon ng sariling pagkakakilanlan ang lalawigan.

Matapos na iprisinta ang kabuuang aktibidad ng Kasanggayahan Festival 2012, binigyan na ng pagkakataong magbigay suhestyon, makapagtanong at malinawan ang mga kasapi ng media at ilan sa mga lumabas na paglilinaw ay ang tungkol sa mga kumakalat na solicitation gamit ang Kasanggayahn Foundation, Inc.

Nilinaw ng mga organizers na walang sinusuportahang popularity contest ang KFI o ang provincial government tulad ng Search for Ms. Kasanggayahan. Nanawagan din sila sa publiko kung sakaling may matatanggap na mga solicitation ay berepikahin muna ito sa KFI o sa provincial government.

Nanawagan din si Msgr. Monje sa mga media na suportahan ng buo ang Kasanggayahan Festival lalo pa’t festival ito ng buong lalawigan at ng mga mamayan ng Sorsogon. (BARecebido, PIA Sorsogon)