KARAGDAGANG TULONG PARA SA DREDGING OPERATIONS SA BRGY. IROSIN, KAILANGAN

 Tagalog News

SORSOGON CITY – Karagdagang tulong ang hinaing ng lokal na pamahalaan sa bayan ng Irosin upang matapos na ang kanilang dredging operations sa barangay Cogon upang hindi na magdulot ng malaking pinsala sakaling magkaroon ng malalakas na pag-uulan at umagos ang lahar sa dalawang ilog ng barangay Cogon.

Lahar flow in Brgy. Cogon, Irosin/BFP Irosin

Matatandaang ang nakadepositong lahar simula pa noong 2006 ang siyang inilluuwa ng Mt. Bulusan sa naging pag-aalburuto nito ngayon at ang barangay Cogon ang siyang pinakamalapit na lugar sa paanan ng nasabing bulkan.

Photo courtesy: PDRRMC

Sa pakikipagpulong ni Irosin Municipal Disasater Risk Reduction and Management Council (MDRRMC) action officer Edelberto Elorza Jr. sa Provincial DRRM Office, napag-alaman ditong umaabot sa labinlimang libong piso ang ibinabayad bawat araw sa walong oras na operasyon ng backhoe machine na gamit nila sa dredging operations bukod pa sa pagkaing ibinibigay sa driver nito. Aniya, hindi sasapat ang pondo ng lokal na pamahalaan at nangangamba silang baka maubos na ang kanilang pondo.

Pinayuhan naman siya ng mga opisyal ng Sorsogon Provincial Disasater Risk Management Council na gumawa ng request upang maiindorso na agad  ng PDRRMC sa Office of the Civil Defense Bikol at OCD national office para sa kaukulan at agarang aksyon. (Bennie A. Recebido, PIA Sorsogon)

PROVINCIAL AGRICULTURE OFFICE HINIHINTAY ANG AKSYON NG DA HINGGIL SA SUSPENSYON NG HIGH VALUE CROP SEEDS

Tagalog News

SORSOGON PROVINCE – Hinihintay na lang sa ngayon ng Provincial Agriculture Office ng Sorsogon ang resulta ng ipinatawag na pulong ni Department of Agriculture Secretary Proceso J. Alcala at ng mga matataas na opisyal ng DA noong Biyernes ukol sa magiging aksyon nito sa pagsuspinde sa distribusyon ng mga High Value Crop Seeds para sa mga magsasaka hindi lamang sa lalawigan ng Sorsogon kundi sa buong bansa.

Ayon kay Assistant Provincial Agriculture Officer Tess Destura, una na nilang ipinaabot kay Sen. Panginilan sa pagbisita nito dito kamakailan, ang kasalukuyang estado ng agrikultura ng lalawigan.

Ayon kay Destura bagama’t hindi naman gaanong naapektuhan ang mga palayan at ibang produktong agrikultural, karamihan naman sa mga puno ng saging at coconut plantations ay napuno ng abo, subalit dahilan sa malimit na pag-uulan ay madali ding nahuhugas ang mga ito.

Kung kaya’t mas pinagtuunan nila sa kanilang rekomendasyon ang petisyon na muling ibalik ang programa ng pamahalaan sa distribusyon ng HVC seeds na siyang hinahanap at hinihingi ngayon ng mga magsasaka dito sa lalawigan.

Matatandaang sa naging pagbisita kamakailan dito ni Senate Committee Chair on Agriculture and Food Sen. Francis Pangilinan ay nangako itong ipararating niya kay DA Secretary Proceso Alcala ang mga rekomendasyong ipinaabot ng mga opisyal ng lalawigan ng Sorsogon.

Nagbigay katiyakan din si Pangilinan na maliban sa isang milyong pisong tulong na ibinigay nya ay magpapadalang muli ng tulong ang kanyang tanggapan upang maiangat pa ang agrikultura sa lalawigan at muli ding maibangon ang mga kabuhayang nasira dahilan sa pag-alburuto ng bulkan sa ilang mga lugar dito. (Bennie A. Recebido, PIA Sorsogon)

BFAR PINAG-IINGAT PA RIN ANG PUBLIKO SA PAGKAIN NG MGA LAMANG-DAGAT

Tagalog News

SORSOGON PROVINCE – Sa pagpasok ng mga kali-kaliwang selebrasyon at kainan ngayong Disyembre, muling ipinanawagan ng Bureau of Fisheries and Aquatic Resources sa publiko na mag-ingat sa pagkain ng mga lamang-dagat.

Ang panawagan ay bunsod pa rin ng nakataas na shellfish ban sa buong lalalawigan sanhi ng red tide at ang ilang insidente ng pagkakamatay ng mga isda na apektado ng pagbuga ng abo ng Mt. Bulusan nitong mga nakaraang araw.

Sa pinakahuling shellfish Bulletin ng BFAR, positibo pa rin ang Sorsogon Bay sa nakalalasong red tide kung kaya’t mahigpit pa ring pinag-ingat ang publiko.

Ayon kay BFAR Sorsogon Fisheries Officer Gil Ramos, tanging ang badoy lamang ang pinapayagan nilang maibenta at kainin subalit dapat pa ring dumaan ito sa kaukulang clearing. Muli din niyang idiniin na bawal kainin ang baloko at ang iba pang mga shellfish mula Sorsogon Bay. Subalit nilinaw nitong kung talagang nais kumain ng baloko, tanging ang tinga lamang nito ang maaari nilang irekomendang kainin at hindi ang ibang bahagi nito.

Aniya, masusing pinag-aaralan din sa ngayon ng BFAR kung nararapat nga ang pagdedeklara ng state of calamity dahilan sa matagal nang pamamalagi ng red tide dito. Regular din nilang minomonitor ang Sorsogon Bay upang matukoy kung hanggang saan na umaabot ang toxicity level dito.

Nilinaw din niyang ang mga isda mula Sorsogon Bay ay ligtas pa ring kainin ngunit kinakailangang linisin lamang ito ng mabuti.

Samantala, inamin ni Ramos na may ilang mga LGUs at mga indibidwal na mangingisda ang nagpaabot na sa kanilang tangapan ng request ng mga fingerlings bilang pamalit sa mga nangamatay na isda sanhi ng pagbuga ng abo ng Mt. Bulusan.

Ngunit sinabi ni Ramos na hindi pa sila maaaring magbigay ng mga fingerlings hanggat hindi pa tuluyang humuhupa ang pag-aalburuto ng bulkan sapagkat aniya’y mawawalang say-say din lamang ito.

Sinabi ni Ramos na natural lamang na mamatay ang mga isda kung nadadaluyan ng lahar ang mga tubig na tirahan ng mga ito. Sinabi niyang sa ngayon ay dapat pa ring mag-ingat ang mga residente sa pagkain ng mga isda na galing sa mga ilog na dinadaluyan ng lahar kahit pa nga ilang araw na ring nanahimik ang Mt. Bulusan, sapagkat maaaring hindi pa tuluyang ligtas sa kontaminasyon ng sulfur ang mga ilog na siyang nagiging dahilan upang mamatay ang ilang mga isda.

Payo nila’y maaari pang kainin ang mga isda kung buhay pa ito kahit pa naghihingalo na, subalit mahigpit nilang ipinagbabawal ang pagkain ng mga isda kung patay na ito bago pa mahuli.(BARecebido, PIA Sorsogon with reports from Von Labalan, PIO)

SEN. PANGILINAN HANDS P1-M TO MT. BULUSAN’S VICTIMS

News Release

PROVINCE OF SORSOGON (December 6) – Disaster sometimes provide us opportunities to look into our elected officials.

Senator Francis Pangilinan, Senate Committee Chair on Agriculture and Livelihood Development paid a visit to the municipalities of Juban and Irosin who were greatly affected by the last explosion of Mt. Bulusan on Nov. 21.

In a briefing recently conducted by Ma. Theresa Destura, Assistant Provincial Agriculturist of Sorsogon at the Police Provincial Headquarters here, she presented the agricultural scene of the three affected municipalities – Irosin, Juban and Casiguran.

While as to her report, no immediate heavy damage were reported by the Municipal Agriculturists in these three municipalities, Senator Pangilinan saw the need to provide a 1million-peso assistance to evacuees who were displaced and are not yet able to have produce from their crops, mostly planted within the 4-km area Permanent Danger Zone.

Pangilinan personally conducted an ocular inspection in Brgy. Cogon, municipality of Irosin and have had a dialogue with no less than Governor Raul R. Lee, Mayor Eduardo Ong of Irosin and mayor Jimmy Fragata of Juban, who also presented to him a power-point graphic presentation of the footages/pictures taken of the impact to the agricultural situation of his municipality.

Casiguran Mayor Ester Hamor in like manner gave Pangilinan a report of the situation of the barangays affected by the successive ash ejections of Mt. Bulusan, particularly Brgy. Inlagadian.

Pangilinan also visited the proposed relocation site in Brgy. Salvacion and promised to provide assistance in the construction of core shelters, through the Department of Social Welfare and Development (DSWD).

He also stated to provide Department of Agriculture (DA) Secretary Proceso J. Alcala the inputs and updates provided to him by the Local Chief Executive of the province and the reports tendered by the three mayors so that immediate intervention will be provided. (Irma A. Guhit, PIA Sorsogon)

CODE OF ETHICS ORDINANCE PARA SA MGA PUV DRIVERS NG SORSOGON CITY, APRUBADO NA

Tagalog News

SORSOGON CITY – Positibo si City Councilor Victorino Daria III na di maglalaon ay maipapasa din sa Sangguniang Panlunsod ng Sorsogon ang Code of Ethics Ordinance na isinusulong niya para sa mga tricycle drivers na nag-ooperate sa kabisera ng syudad ng Sorsogon.

Ayon kay Daria, layunin ng nasabing Code of Ethics Ordinance na mabigyang kaalaman, matuto,madisiplina ang mga namamasadang drayber at maging presentable at magalang ang mga ito sa pagtrato ng mga pasahero ng sagayon ay maitaas  ang antas ng impresyon sa transportasyon ng mga bisitang napupunta sa Sorsogon City.

Matatandaang maraming reklamo na rin ang naipaabot sa tanggapan ni Daria ukol sa pagiging bastos at walang modo ng ilan sa mga drayber dito maliban pa sa ilang mga drayber na sobrang maningil, patuloy na paninigarilyo sa behikulo kahit bawal na ito, pagiging madungis at pamimili ng mga pasahero.

Kaugnay nito, isang Code of Ethics and Values Formation Seminar ang nakatakdang ganapin sa Disyembre 4-5, 2010 sa Provincial Gymnasium ng Sorsogon.

Habang ang 2^nd phase naman ay gagawin sa Disyembre 18, 2010 sa magkaparehong lugar. Pangungunahan ang seminar ng mga kinatawan ng Bureau of Fire protection, provincial Disaster Risk Reduction and management Office at Philippine red Cross.

Maliban sa code of conduct ay nakatakda ring bigyan ng kaukulang impormasyon ang mga tsuper ukol sa tamang pagbibigay ng mga pangunang lunas sakaling may mga pasaherong nakakaranas ng discomfort o di kaya’y nagkakaroon ng mga aksidente sa daan. (Jun Tumalad, PIA Sorsogon)

MABILISANG PAGLILITIS SA MGA KASO NG BILANGGO SA SPJ IPINAG-UTOS

Tagalog News

SORSOGON PROVINCE – Ipinag-utos ni Sorsogon Governor Raul Lee sa mga abogado at huwes dito ang mas mabilisang paglilitis sa mga kaso ng mga nakapiit sa Sorsogon Provincial Jail.

Ayon kay Provincial Jail Warden Major Josefina Lacdang, matapos ang pakikipagpulong niya kay Gov. Lee, tiniyak nito sa kanya na mas bibilis na ngayon ang paglilitis sa kaso ng mga bilanggo lalo’s nagbigay na rin ng direktiba ang gobernador sa mga abogado aat huwes na bigyang prayoridad ang kanilang mga kaso.

Ayon kay Lacdang hindi rin makatao at makatarungan sa isang tao na magdusa sa loob ng bilangguan ng lampas sa dapat sana’y hatol sa kanya kung nalitis agad ang kanilang kaso.

Sinabi din ni Lacdang na labingdalawang bilanggo din ang hindi maipagpatuloy ang paglilitis dahilan sa pagkakaroon nito ng diperensya sa pag-iisip sanhi ng mga pinagdadaanan nilang depresyon, subalit matapos ang mahigit isang buwang regular at maayos na medikasyon ay maaari na muling humarap sa hukuman ang mga ito.

Sa ngayon aniya ay mayroon na silang 326 na bilanggo kung saan 14 ang mga babae at 312 naman ang mga lalaki.

Lahat diumano ito ay mga detention prisoners, ibig sabihin on-going ang paglilitis sa kanilang kaso, habang ang mga nahatulan ay naipadala na lahat sa muntinlupa upang doon na nito tapusin ang kanilang hatol.

Kaso sa droga, murder at rape ang tatlong nagungunang kaso ng mga bilanggo habang pang-apat at panglima naman ang homicide at robbery.

Mga kaso sa droga at estafa naman ang karamihan sa mga kasong kinakaharap ng mga babaeng bilanggo. (Bennie A. Recebido, PIA Sorsogon)                            

MT. BULUSAN UPDATES

Tagalog News

SORSOGON PROVINCE – Patuloy na nananahinik ang Mt. Bulusan at bumababa ang bilang ng mga nairerehistrong volcanic quakes sa paligid ng nito.

Subalit ayon sa Phivolcs, kahit pa nga walang gaanong aktibidad ito nananatili pa rin sa Alert Level 1 ang estado ng bulkan.

Mahigpit pa rin ang kanilang abiso sa publiko na bawal pumasok sa itinalagang 4-km Permanent Danger Zone.

Pananim na nabansot na dahilan sa abo. (PDRRMC

)

Samantala, inamin naman ng LGU-Irosin at Juban na nagsisimula nang umepekto sa mga pananim at hayop ang mga ibinugang abo ng Mt. Bulusan. Ayon sa mga magsasaka, nababansot na ang kanilang mga pananim habang ang ilan naman ay hindi na produktibo. May mga nangamamatay na ring mga alagang hayop doon.

Rekomendasyon naman ng Provincial Veterinary Office na obserbahan nila ang mga alagang hayop at agad na sumangguni sa kinauukulan sakaling may nakikita silang kakaibang galaw o pagkakasakit ng mga ito.

Tiniyak naman ng tanggapan ng Provincial Agrculture na handa sila at mayroon silang sapat na resources upang tulungan ang  mga apektadong sector. (BARecebido, PIA Sorsogon)