Motorist assistance center at special operation team ng PNP muling binuhay

Ni: Bennie A. Recebido

Sorsogon City, April 13 (PIA) – Sinimulan na ngayong linggo ng Philippine National Police ang pagpapatupad sa direktibang ipinalabas ni PNP police provincial director PSSupt Heriberto Olitoquit kung saan muli nilang binuhay ang PNP motorist assistance center at pagpapakalat ng mga special operation team sa mga matataong lugar.

Sinabi ni Olitoquit na inatasan na niya ang mga chief of police sa buong lalawigan at Provincial Public Safety Company na magsagawa ng mga pagroronda at check-point.

Bahagi din aniya ng kanilang Oplan Semana Santa ang pagpapaigting ng police visibility sa mga well-populated areas tulad ng simbahan, resorts, beaches at tourist destinations.

Maging ang mga bus terminal at malalaking pantalan dito ay may mga nakadeploy na ring special operation team ng PNP.

Layunin nitong maiwasan ang mga krimen tulad ng snatching, pandurukot at salisi operation lalo na sa mga matatao at pampublikong lugar o makapambiktima ng mga turista at bakasyunista. (PIA Sorsogon)

Eco-tourism sa Juban isinusulong sa kabila ng mga naging epekto ng kalamidad

Ni: Bennie A. Recebido

Sorsogon City, April 12 (PIA) – Positibo si Juban Mayor Jimmy Fragata na isulong ang eco-tourism sa Juban matapos ang mga nagdaang kalamidad na nagdulot ng malaking epekto sa kanilang bayan.

Ayon kay Mayor Fragata, nais niyang makilala ang bayan ng Juban sa magagandang mga katangian, historical features at ecological tourism destinations nito kaysa sa maging pamoso bilang disaster-stricken municipality.

Maliban sa mga historical relics tulad ng Bicol translation ng “Mi Ultimo Adios” o Huring Paaram ni Gov. Jose Figueroa at Gorospe, Guarin, Olondriz, Alindogan at Lasala Heritage Homes o mas kilala sa Bahay Bato old houses, ipinagmamalaki din ni Mayor Fragata ang tahimik na isla ng Sablayan sa Brgy. Sablayan, Juban, dalawampung minutong sakay sa bangka mula sa Brgy. Tinago, Juban.

Makikita sa isla ng Sablayan ang iba’t-ibang mga uri ng lamang-dagat at magandang lugar din para sa mga bakasyunistang makakalikasan at naghahanap ng tahimik na lugar.

Sinabi pa ni Mayor Fragata na nais niyang maalala ng publiko ang kanilang bayan bilang isa sa mga magagandang eco-tourist destinations sa bansa. (PIA Sorsogon)

Kakulangan sa coco lumber ramdam na sa Sorsogon

Ni: Bennie A. Recebido

Sorsogon City, April 12 (PIA) – Aminado si Philippine Coconut Authority provincial manager Alejandro Olaguera na nararamdaman na ngayon ang kakulangan sa suplay ng mga coco lumber sa mga construction firms dito sa lalawigan ng Sorsogon.

Kinumpirma din ni Olaguera na nakarating na rin sa kanilang tanggapan ang mga hinaing ng mga coco lumber dealers at ng mga kontratistang nangangailangan ng mga coco lumber para sa scaffolding ng kanilang mga patrabaho.

Ayon sa mga coco lumber dealer at kontratista dito, nagsimula nilang maramdaman ito matapos ang halos ay dalawang taon simula nang ipatupad ng pamahalaan ang total ban sa pagputol, pagbyahe at pagbebenta ng mga puno ng niyog alinsunod na rin sa Republic Act 8048 na epektibong ipinatupad noong March 10, 2008.

Dahilan sa paghihigpit na ito, sinabi ng mga kontratista na talagang nalagay sa alanganin ngayon ang mga kontrata nilang gumagamit ng mga coco lumber dahilan sa wala na umano silang maapuhap na gagamitin sa kanilang patrabaho.

Ayon naman sa PCA, pinag-aaralan nila ngayon ang mga hinaing na ito maging ang posibilidad ng pag-aalis ng cocolumber ban, subalit wala umano silang ipinapangako sa mga ito dahilan sa kailangan pa ito ng masusing pag-aaral. (PIA Sorsogon)

Mineral sa anim na bayan sa Sorsogon balak minahin

Ni: Bennie A. Recebido

Sorsogon City, April 11 (PIA) – Anim na mga bayan dito sa lalawigan ng Sorsogon ang iminumungkahing minahin ng dalawang mining firms dahilan sa malaking mining potentials ng mga ito.

Ayon kay Olven Guemo ng LGU – Provincial Environment and Natural Resources Office, matagal nang nagsumite ang Peniel Resources Mining Corporation ng Greenhills, San Juan City ng aplikasyon para sa exploration permit ng magnetite sand at iba pang kahalintulad na mga mineral sa tatlumpong siyam na mga barangay sa munisipalidad ng Bulan, Matnog, Sta Magdalena at Bulusan, lahat dito sa Sorsogon, at ang UBS Marketing Corporation ng Quezon City upang makakuha ng mineral agreement para sa exploration, development at utilization ng pumice stone, pumicite at iba pang non-metallic minerals sa labingwalong mga barangay sa bayan ng Gubat at Casiguran, dito rin sa Sorsogon.

Subalit, ayon kay Guemo, patuloy pa ring nasa ilalim ito ng ebalwasyon ng Mines and Geo-Sciences Bureau regional office V at ilang mga rekomendasyon ng mga barangay ang inaasikaso pa ng dalawang mining firms na ito bago at sa oras diumano na makapagsumite na ito ng mga kakulangan pang mga rekisitos ay agad na rin namang aaprubahan ito. (PIA Sorsogon)

HB 4407 poprotekta sa National Film Archive

Ni: Bennie A. Recebido

Sorsogon City, April 8 (PIA) – Isinusulong ngayon ni Sorsogon 2^nd district congressman Degoracias Ramos, Jr. ang pagbuo ng isang ahensya ng pamahalaan na magmamantini sa National Film Archive.

Sa isang on line press statement, sinabi ni Ramos na hindi epektibong nakakapagpatayo ng film archive ang mga ahensya ng pamahalaan na nagsusulong at nangangalaga sa sining at arte ng bansa dahilan sa mga isyu sa pondo, responsibilidad at kakulangan ng kasanayan ng mga taong sangkot.

Sa ilalim ng House Bill 4407, bubuuin ang National Film Preservation Commission kung saan ang tanging layunin nito ay pagsama-samahin, mantinihin at pangalagaan ang mga mahahalagang pelikula ng bansa lalo na ang mga cultural at historical Filipino films.

Ang National Film Board ang magpapatakbo sa komisyon at magiging kasapi nito ang kalihim ng Department of education, chairperson ng Film Development Council of the Philippines , Commissioner ng National Commission on Culture and the Arts, mga kinatawan mula sa film directors association, film producers association, theater owners association at screenwriters association.

Ayon sa Society of Film Archivists, nasa walong libong pelikulang Filipino ang nagawa mula noong 1919, subalit pinaniniwalaang nasa tatlonglibo at limang-daan lamang ang natatagong kopya. (PIA Sorsogon)