FIDA Sorsogon pinaiigting pa ang industriya ng abaka, project launching cum training isasagawa

Ni: Bennie A. Recebido

Lungsod ng Sorsogon, November 24 (PIA) – Kaugnay ng kampanya sa pagpapalakas pa ng industriya ng abaka sa Sorsogon, isang project launching cum training program ang nakatakdang gawin ngayong araw ng Fiber Industry and Development Authority (FIDA).

Sinabi ni FIDA Sorsogon manager Daniel Lachica na layunin ng aktibidad na maipakita sa mga lalahok ang kahalagahan ng industrtiya ng abaka bilang mapagkukunan ng kabuhayan at ang kontribusyon nito sa ekonomiya.

Nakatakda ring magsagawa ng demonstrasyon ukol sa mga natatanging istratehiya laban sa pagkontrol sa mga virus, peste at sakit na dumadapo sa mga abaka.

Pormal na sisimulan ang aktibidad ngayong umaga sa pamamagitan ng isang simpleng programa na pangungunahan ng pamahalaang bayan ng Irosin sa patnubay ni Municipal Mayor Eduardo Ong, Jr. at ni FIDA Sorsogon Manager Daniel Lachica.

Ang nasabing seminar ay gagawin sa Ecological Park sa Brgy. Patag, Irosin, Sorsogon. (PIA Sorsogon)

Comelec muling nanawagan sa mga botante na i-validate ang kanilang voter’s registration

Ni: Bennie A. Recebido

Lungsod ng Sorsogon, Nobyembre 23 (PIA) – Dapat na i-validate ng mga botante ang kanilang mga datos sa Commission on Election (Comelec) kung saan sila rehistrado.

Ito ang apela ni Sorsogon City Election Supervisor Atty. Ryan Filgueras sa sakop na mga rehistradong botante ng Commission on Election.

Aniya ang validation ay bahagi ng pagsasaayos ng sistema ng botohan sa bansa sa pamamagitan ng sistemang biometrics registration of voters kung saan aayusin ang mga datos, thumbmark, pirma at larawan ng botante sa pamamagitan ng biometrics machine.

Ayon kay Filgueras, mahalagang personal na magsadya sa kanilang tanggapan at magpa-validate ang mga rehistradong botante upang matiyak na mapapabilang ang mga ito sa database ng Commission on Election at matitiyak na makaboboto silang muli sa susunod na eleksyon.

Sa datos, 74,088 ang bilang ng mga rehistradong botante ng Sorsogon City Comelec subalit sa kanilang tala noong Oktubre 2011 ay may 36,826 pa ang dapat na ma-validate. Kung kaya’t mahigpit ang panawagan ng City Comelec na agad nang bumisita sa kanilang tanggapan yaong hindi pa nakakapagpa-validate hanggang sa ngayon.

Itinakda ang huling araw ng validation sa Oktubre 31, 2012 alinsunod sa Comelec Resolution No. 9168 subalit sinabi ni Filgueras na hindi na dapat pang hintayin ang deadline o makipagsiksikan para lamang makahabol sa deadline. Aniya, tamang panahon na ngayon na bumisita ang mga botante at magpa-validate sa mga tanggapan ng Comelec.

Maliban sa validation ng mga botante, patuloy din ang Comelec sa pagtanggap ng magpapatalang mga bagong botante na may edad na labingwalong taong gulang, pagpalipat ng registration record, re-activation, pagbago at pagtatama sa mga datos sa registration record ng mga botante at iba pa. (PIA Sorsogon)

PRC Sorsogon Chapter hinikayat ang publiko na suportahan ang Million Volunteer Run

Ni: Bennie A. Recebido

Lungsod ng Sorsogon, Nobyembre 23 (PIA) – Kaugnay ng deklarasyon ng United Nations na gawing International Year of Volunteers ang 2011, itinakda ng Philippine Red Cross (PRC) ang Red Cross Million Volunteer Run sa ika-4 ng Disyembre, 2011 upang pukawin ang ispiritu ng bolunterismo ng bawat mamamayang Pilipino.

Ayon kay PRC Sorsogon Chapter Board of Director Chair Atty. Arnulfo Perete, ang Million Volunteer Run ay gagawin sa mga pangunahing lungsod at sa 1,494 na mga bayan sa buong bansa sa Disyembre 4.

Aniya, sa Sorsogon, napagkasunduan ng mga board of directors ng PRC Sorsogon Chapter na magsagawa ng limang kilometrong takbo ng kasiyahan o fun run sa palibot ng pangunahing lansangan ng Sorsogon City kung saan magtitipon-tipon ang mga lalahok alas singko y medya ng umaga sa Provincial Capitol Park. Eksaktong alas-sais ng umaga naman sisimulan ang fun run.

Limang-daang piso umano ang registration fee ng bawat tatakbo o sponsor runner na makakatanggap din ng Corporate Humanitarian Certificate mula sa Red Cross at Million Volunteer Kit na naglalaman ng registration rorm, race bib, race map at Red Cross 143 ID card na may Disaster Leader’s Guide, runner shirt, pito o whistle at red cross membership na may isang taong bisang accidental benefit.

Itatampok din sa Million Volunteer Run ang programang 143 ng Red Cross kung saan inihayag ni Perete na ang Pilipinas ay kabilang sa mga bansang may organisadong PRC 143 program. Ang 143 PRC volunteers na binubuo ng isang lider at apatnapu’t-tatlong kasapi sa bawat barangay sa bansa ay sinanay upang makaagapay sa pagpapababa ng mga panganib sa komunidad dala ng kalamidad.

Lahat umano ng malilikom na halaga sa gagawing Million Volunteer Fun Run ay ibibigay sa mga bansang labis na naapektuhan ng paghagupit ng mga natural na kalamidad.

Samantala, sinabi din ni Perete na suportado ng pamahalaang panlalawigan ng Sorsogon ang international statement vision ng Philippine Red Cross na gawing Red Cross Volunteer Capital of the World ang Pilipinas. (PIA Sorsogon)

Ikalawang anibersaryo ng Maguindanao massacre gugunitain

Ni: Bennie A. Recebido

Lungsod ng Sorsogon, Nobyembre 23 2011 – Sa paggunita ng ikalawang taon ng Maguindanao massacre, nakatakdang magtipon-tipon ngayon, Nobyembre 23, ang mga kasapi ng lokal na tri-media dito sa Sorsogon upang maglunsad ng torch parade at magsagawa ng isang misa at maikling programa   sa Provincial Capitol Compound, alas-kwatro y medya ng hapon.

Ayon kay National Union of Journalists in the Philippines (NUJP) Sorsogon Chapter Chair Bobby Labalan na siya ring nag-organisa ng aktibidad, layunin nitong ipaabot ang kanilang panawagan para sa kaparusahan ng mga may sala at hingin sa pamahalaan na mabigyang proteksyon ang mga mamamahayag laban sa ganitong mga uri ng brutalidad.

Inimbitahan nila umano ang mga paaralan, cross-oriented groups, religious organizations, lahat ng mga kasapi ng lokal na media, at bukas din ito sa lahat ng mga nais makiisa sa kanilang adhikain.

Dagdag din niya na hindi lamang sa Sorsogon magkakaroon ng aktibidad sa paggunita sa ikalawang anibersaryo ng Maguindanao massacre kundi maging sa iba pang bahagi ng bansa sa pangunguna rin ng mga media organization.

Matatandaang ang Maguindanao massacre ang pinakanotoryus na insidente ng pagpaslang na naganap sa kasaysayan ng bansa kung saan limampu’t walong mga sibilyan ang sapilitang kinuha at brutal na pinatay dahil sa pulitika sa Maguindanao. Tatlumpu’t-dalawa sa mga pinaslang ay mga kasapi ng media dahilan upang mabansagan ang Pilipinas bilang pinakamapanganib na bansa sa buong mundo para sa mga mamamahayag noong 2009.

Sa usad pagong na paggalaw ng kaso, limampu’t walong kaso ng murder ang naisampa, isang-daan siyamnapu’t pito ang naakusahan at limang-daan ang iprinisintang witness na nakatakda pa ring magbigay ng kanilang testimonya.

Sa ikalawang taong anibersaryo ngayong araw, patuloy pa ring naghihintay ang lahat lalo na ang mga kamag-anak ng biktima ng hustisya sa brutal na pagpatay at paglabag sa karapatang pantao ng mga biktima ng Maguindanao massacre. (mah/PIA Sorsogon)

Aquamarine project in Casiguran town continues under the National Convergence Initiatives

by Irma A. Guhit

SORSOGON CITY, NOVEMBER 21 (PIA)….. Casiguran town Mayor  Maria Esther Hamor in an interview here last week said that the National Convergence Initiative (NCI) programs in her town is now in place and trainings of fisherfolks have been  going on specially in the aquamarine culture technology.

Mayor Hamor said that the careful selection of their beneficiaries was a great consideration since the success of the project depends on the attitude of these beneficiaries, their active participation and commitment to make the project profitable, sustainable and the full cooperation to follow the local government’s fishery rules and policies should be addressed.

“As local chief executive it is my desire to alleviate poverty in our town but at the same time fully implement the sustainable conservation of our environment from land to sea and inland water resources”, she said.

Benigno Bejison, municipal agriculture officer of Casiguran and Gil B. Ramos of the Bureau of Fisheries and Aquatic Resources (BFAR) have conducted the trainings and the identified fishermen from Barangay Somal-ot were provided  the needed materials to include 5 fishnets, 4 bundles of nylon rope, 150 bamboo poles for their crab production.

According to Ramos, BFAR has provided the hands on training to on aqua-silvi culture technology to 61 fisherfolks in the said barangay.

It has also conducted the validation of the site selection process and  most of the areas identified were mangrove area sites , a very good potential for the sustainability of the project.

Demonstration on the actual preparation of the area was done according to Bejison while the construction of crab cages were shown and process of harvesting were also explained.

The topics that were discussed included feeding management of crabs, record keeping, harvesting and post harvest activities, marketing and the continuous monitoring and evaluation of the project.

Ramos said that mud crab production will only take four months to wait and that proper management should be followed so that the quality, quantity and price of the produce will be competitive in the market.

Mayor Hamor explained that the LGU in partnership with the three converging agencies, the Department of Agriculture, Department of Environment and Natural Resources and Department of Agrarian Reform will continually coordinate in the implementation of the NCI projects in their municipality. (PIA-SORSOGON)

Surgical Mission para sa mga may bingot gaganapin sa Nobyembre 22-23

Ni: Bennie A. Recebido

Lungsod ng Sorsogon, Nobyembre 21 (PIA) – Isang surgical mission nag nakatakdang gawin sa Dr. Fernando B. Duran, Sr. (DFBDSM) Hospital o mas kilala bilang Sorsogon Provincial Hospital mula bukas, Nobyembre 22 hanggang Nobyembre 23 para sa mga Sorsoganong may lip at cleft palate o may mga bingot.

Ayon kay Provincial Health Officer Dr. Edgar Garcia, target nilang mabenepisyuhan ng libreng operasyon ang apatnapung mga pasyenteng mula edad tatlong taon hanggang labinlimang taon sa dalawang araw na surgical mission na ito.

Ipinaliwanag ni Garcia na inabisuhan din nila ang mga dating pasyenteng may bingot na isinailalim sa nakaraan nilang surgical mission na bumalik para sa follow-up check-up. Maging yaong mga hindi natuloy maoperahan noong nakaraang operasyon ay inabisuhan na rin nilang kumpletuhin na ang mga rekisitos na kailangan upang maoperahan na ang mga pasyente ngayon.

Habang ang mga bagong nagpalista at magpapalista pa ngayong araw ay isasailalim nila sa screening upang matiyak na nasa maayos na kondisyon ito bago operahan.

Dagdag pa ni Garcia na hindi isasailalim sa operasyon ang pasyenteng may lagnat, ubo at sipon.

Bukas din umano sila para sa mag nais makipagsapalaran o walk-in patient subalit dapat na maintindihan ng mga ito na kailangang unahin nila ang mga nauna nang nagpalista sa kanila bago sila makakuha ng slot.

Ang nasabing surgical mission ay inisyatiba ng Provincial Health Office sa tulong ng pamahalaang lokal ng Sorsogon.

Samantala, sinabi ni Garcia na maraming mga kadahilanan kung bakit nagkakaroon ng lip at cleft palate ang isang tao. Aniya, maaaring genetic o namana ito at kadalasang posibilidad din ang hindi maaayos na nutrisyon at hindi tamang pangangalaga sa nagbubuntis na mga ina.

Kaugnay nito ay pinayuhan niya ang mga buntis na sumailalim sa pre-natal upang nasusubaybayan ang nagaganap sa kanilang mga sanggol habang ipinagbubuntis pa lamang nila ito. (PIA Sorsogon)