BFP may kasanayan sa pagsalba ng buhay at ari-arian sa mga panahong may sakuna o kalamidad

Ni: Bennie A. Recebido

         

LUNGSOD NG SORSOGON, Hulyo 17 (PIA) – Taliwas sa ordinaryong kaalaman ng publiko na pag-apula lamang ng apoy o sunog ang ginagawa ng Bureau of Fire Protection (BFP), ipinaliwanang ni SInsp Walter B. Marcial ng BFP Sorsogon City Central Fire Station na may kaukulan din silang kasanayan sa larangan ng pagsalba ng buhay o rescue sa panahong may sakuna at aksidente.

Aniya, sinanay din sila sa pag-pakalma ng mga may bali sa alinmang bahagi ng katawan at nakahanda umano silang rumisponde sakaling may pangangailangan kabilang na kung may mga aksidente sa kalsada.

Aminado man ang opisyal na may kakulangan sila pagdating sa ilang kagamitang pang-rescue lalo na kung may baha, tiniyak naman nito na lahat ng mga tauhan ng BFP ay may kaalaman at kasanayan pagdating sa pagliligtas ng buhay at ari-arian.

Bukas din si SInsp Marcial sa ideyang iturn-over sa kanila ang ambulansya ng Local Government Unit (LGU) sa mga araw na walang pasok o holiday at bigyan ng karapatang gamitin ito sa panahong may emerhensya o sakaling kailanganin ito.

Samantala, muling nanawagan ito sa publiko na mag-ingat lalo na sa sunog sapagkat wala itong pinipiling panahon kahit pa tag-ulan na ngayon.

Sa tala ng BFP Sorsogon City, dalawang insidente ng sunog ang nairehistro nila noong 2012 habang umabot naman sa lima ang naitala nilang sunog mula Enero hanggang kalagitnaan ng Hunyo ngayong 2013.

Maliban sa pinakahuling sunog na naitala ngayong Hunyo, maliliit lamang aniya ang iba pang insidente ng sunog na naitala sa lungsod at minimal lamang ang naging danyos na dala nito, subalit hindi pa rin ito dapat na ipagsawalang-bahala sapagkat sunog pa rin ang kategorya nito at mahirap nang maibalik ang anumang nawala dahilan sa ganitong uri ng kalamidad. (BARecebido, PIA Sorsogon)