SEAGRASS benepisyaryo ng mga programa ng BFAR, CENRO at City LGU

Ni: Bennie A. Recebido

LUNGSOD NG SORSOGON, May 2 (PIA) – Iba’t-ibang mga proyekto ng pamahalaang lokal at nasyunal ang pinakikinabangan na at pakikinabangan pa ng mga kasapi ng Seaweed Grower and Aquaculture Association of Sorsogon, Inc. (SEAGRASS) sa Brgy. Gimaloto, lungsod ng Sorsogon.

Ang SEAGRASS ay isang people’s organization na binubuo ng mga mangingisda at magsasaka ng Brgy. Gimaloto sa kanlurang distrito ng lungsod ng Sorsogon.

Ayon kay Bureau of Fisheries and Aquatic Resources (BFAR) Sorsogon Provincial Fishery Officer Gil Ramos, kasalukuyang benepisyaryo ang SEAGRASS ng aquasilvi culture project na bigay ng BFAR tulad ng sakahan ng gulaman at produksyon ng tahong. Ang proyekto ay nagkakahalaga umano ng P150,000 at bago matapos ang buwan ng Mayo ay aanihin na ang mga produktong galing dito.

Dagdag pa ni Ramos na nagtayo din ng “hilay”ang BFAR, isang lugar pangitlugan at tirahan ng mga isda, na magbibigay din ng proteksyon laban sa mga ilegal na aktibidad sa karagatan. Nagbigay din umano sa SEAGRASS ang BFAR ng isang 6.5 horse power na bangkang de motor at bahay kubo upang magamit ng organisasyon at mga kasapi nito.

Samantala, ayon naman kay Community Environment and Natural Reources (CENR) Officer Krisanta Marlene P. Rodriguez, sa pakikipag-uganayan ng CENRO sa City Agriculture Office kaugnay ng ipinatutupad na National Greening Program ng pamahalaang nasyunal, ang SEAGRASS din ang napiling magiging benepisyaryo ng 100 ektaryang mangrove site sa Brgy. Gimaloto.

Aniya, ang SEAGRASS ang magiging tagapangalaga at tagabantay ng nasabing mangrove site sa loob ng 25 taon matapos ang pirmahan ng Memorandum of Agreement (MOA).

Ayon kay SEAGRASS president Redentor Lasay, ang 100 ektaryang lupain ay kasalukuyang natataniman na ng iba’t-ibang mga mangrove species tulad ng bakhaw, pagatpat, miyapi, lapis-lapis, nipa, at iba pa.

Kasama umano sa inisyal na napagkasunduan na ang SEAGRASS ang siyang mangangasiwa sa pangangalaga at pagpapaunlad pa ng lugar. Maaari din umano silang makabenepisyo sa mga itatanim na puno ng bakawan kung saan papayagan ang mga kasapi na kumuha ng sanga ng bakawan at nipa at iba pang ani mula sa aquasilvi culture project sa ilalim ng patnubay ng Department of Environment and Natural Resources (DENR) at ng BFAR.

Dagdag pa nito na nakatakda na rin umanong magsagawa ng assessment at survey ang BFAR at CENRO ngayong linggo upang matukoy ang uri ng bakawan na maaaring itanim sa lugar.

Ang mga propagules na itatanim sa lugar ay bibilhin na rin mula mismo sa mga kasapi ng SEAGRASS, sila na rin ang magtatanim, susubaybay at mag-aalaga hanggang sa lumaki ang mga ito sa loob ng anim na buwan.

Sinabi naman ni City Agriculturist Adeline Detera nakatakda ring magtayo sa Brgy. Gimaloto ang City Agriculture Office ng isang ektaryang Mangro-vetum, isang nursery ng mangrove propagule upang matustusan ang nasabing mangrove project at upang maipakita din sa publiko ang iba’t-ibang mga uri ng mangrove sa species na matatagpuan dito. (BARecebido, PIA Sorsogon)