Public Hearing sa inirerekomendang klasipikasyon ng Pilar Bay isinagawa ng DENR-EMB

Ni: Bennie A. Recebido

LUNGSOD NG SORSOGON, Nobyembre 27 (PIA) – Iprisinta kahapon ng Department of Environment and Natural Resources – Environment Management Bureau (DENR-EMB) sa isang public hearing ang resulta ng ginawa nilang assessment at quarterly water quality monitoring sa Pilar Bay ngayong taon. Ito ang naging basehan ng DENR-EMB upang matukoy ang klasipikasyon ng Pilar Bay.

Matatandaang sa ilalim ng Waterbody Classification Program ng DENR-EMB, isinasailalim nila sa pagsusuri at pagsubaybay ang mga katubigan sa rehiyon ng Bicol upang malaman ang kasalukuyang uri ng tubig at ang aktwal na maaaring paggamitan nito. Ang resulta ay gagamitin ng DENR-EMB bilang gabay sa tamang pamamahala at proteksyon ng lahat ng mga katubigan sa rehiyon. Ang hakbang ay alinsunod din sa Clean Water Act of 2004 (RA9275).

Ayon kay EMB Regional Director Roberto D. Sheen, ang pagkakaroon ng public hearing ay kinakailangan upang malaman ng publiko ang dahilan, proseso ng pagsagawa at resulta ng klasipikasyon o pag-uuri ng isang katubigang tulad ng Pilar Bay, at upang makuha rin ang saloobin ng publiko at ng lokal na pamahalaan ng mga apektadong lugar ukol sa irerekomendang klasipikasyon ng EMB.

Ngayong taon isinailalim ang Pilar Bay sa classification process upang matukoy kung saang klasipikasyon maibibilang ang look ng Pilar.Ang pagtukoy ay ginawa ng EMB sa pamamagitan ng periodic sampling, quarterly assessment at field survey.

Labing-dalawang sampling stations ang itinayo sa Pilar Bay at upang matukoy ang uri ng tubig dito ay gumamit ang EMB ng mga sumusunod na criteria: Water Temperature, PH level, Dissolved Oxygen, Total Suspended Solids, Oil and Grease, Nitrates at Phosphorous content.

Ayon sa EMB, karamihan sa nakapalibot sa Pilar Bay ay lupang agrikultural at mayroon din itong isang bahaging malaki ang populasyon habang ang iba pang bahagi ay dinadaanan ng barko. Mayroon ding mga kabakawanan o mangrove area para sa aqua-culture at pangingisda.

Mayroong apat na kategorya ang klasipikasyon ng coastal at marine waters, ang Class SA (Salinity A), Class SB, Class SC at Class SD.

Base sa resulta ng isinagawang pagsusuri, klasipikadong Class SC ang look ng Pilar, na nangangahulugang ito ay maaaring gamitin sa pamamangka, commercial fishing at ang mga kabakawanan dito ay maaaring gawing fish and wildlife sanctuaries. (BARecebido, PIA Sorsogon)