Mga awtoridad naka-alerto at handa na sa pagsalubong sa Bagong Taon

LUNGSOD NG SORSOGON, Disyembre 28 (PIA) – Nananatiling nasa “Heightened Alert Status” ang Bureau of Fire Protection (BFP) Sorsogon kaugnay pa rin ng pagdiriwang ng kapaskuhan at bilang paghahanda rin sa pagsalubong sa bagong taon.

Tuloy din ang ginagawa nilang bandillo partikular sa bisinidad ng Sorsogon upang higit pang paigtingin ang kamalayan ng publiko ukol sa tamang pag-iingat at pag-iwas sa sunog.

Makikita din ang presensya ng kanilang mga tauhan at ang pag-iikot ng BFP fire truck bilang bahagi pa rin ng kanilang Fire Safety Information Drive.

Ayon kay BFP Sorsogon City Fire Marshal SInsp Walter Marcial, magtatagal ang pagsasagawa ng bandillo sa huling araw ng Disyembre habang ang deklarasyon ng alert status ay hanggang sa ikalawang araw ng Enero 2013.

Umani din ng pagpuri ang libreng blood pressure monitoring at BFP public assistance sa mga malalaking shopping mall sa lungsod ng Sorsogon na sinimulan nilang gawin noong Disyembre 24 upang matiyak ang kaligtasan ng mga mamimili lalo pa’t dumagsa ang mga ito dahilan sa kabi-kabilang mga Christmas Sale at Discount. Magtatagal din ang kampanyang ito ng BFP Sorsogon City hanggang sa huling araw ng Disyembre.

Samantala, ang mga malalaking ospital at district hospital sa lalawigan ay isinailalim sa “Code White Alert Status” bago pa man magsimula ang pagdiriwang ng pasko.

Matatandaang nakipag-ugnayan din sa mga pribadong ospital sa Sorsogon ang Department of Health (DoH) upang magsanib pwersa at magtulungan sa pagpapatupad ng “Code White Alert” mula Disyembre 21, 2012 hanggang Enero 5, 2013.

Ang “Code White Alert Status” ay itinataas sa mga panahong tulad nito bilang paghahanda ng lahat lahat ng mga pampublikong ospital upang agad na malapatan ng lunas ang mga taong itatakbo sa pagamutan sanhi ng paggamit ng iba’t-ibang uri ng malalakas na paputok.

“On call” naman ang lahat ng mga resident doctor sa Dr. Fernando B. Duran, Sr. Memorial Hospital o mas kilala sa tawag na Sorsogon Provincial Hospital anumang oras na kailanganin ang serbisyo ng mga ito lalo na kung nakababahala at dagsa ang bilang ng mga pasyente at biktima ng paputok. (BARecebido/FBTumalad, PIA Sorsogon)