Sorsogon State College, isinusulong na maging isang Unibersidad

Ni: FB Tumalad

LUNGSOD NG SORSOGON, Abril 25 (PIA) – Upang higit pang mapataas ang antas ng kalidad nito at makahikayat ng maraming mag-aaral ang Sorsogon State College (SSC) isinusulong ng Sangguniang Panlalawigan ang pagiging unibersidad nito.

Matatandaang una nang naghain ng isang resolusyon kamakailan sa Department of Education at Commission on Higher Education (CHED) si 2^nd District Provincial Board Member at Committee on Culture Chairman Benito Doma na humihiling na gawing unibersidad ang SSC.

Nagsagawa na rin ito ng Committee Hearing at base sa resulta ng mga napagkasunduan at rekomendasyon hinggil sa upgrading ng Sorsogon State College na inerekomenda ni Doma ang agarang pagpasa sa isang resolusyon ng konseho.

Maging ang mga tumatakbong kandidato sa pagkakongresista ng una at ikalawang distrito ay pumapabor din na maging unibersidad na ang SSC.

Ayon naman sa pamunuan ng SSC, sa oras na maging unibersidad na sila ay maari na silang mag- alok ng mga advance courses at iba pang mga kurikulum.

Sa kasalukuyan ang mga kurso na maaring kunin sa SSC ay Education, Technology, Engineering, Architecture, Public Administration, Accountancy, Economics and Finance, Agriculture, Forestry and Fishery at ang Arts and Sciences.

Nitong tumalikod na pasukan umabot sa 8,605 ang populasyon ng mga mag-aaral sa SSC.

Nagbigay din ng katiyakan si SSC President Antonio Fuentes sa pamamagitan ng tagapagsalita nito na si Vice-president Ritselda Deri na hindi sila magtataas ng tuition fee sa oras na ma-upgrade ang paaralan at tuluyan itong maging isang university. (FB Tumalad, PIA Sorsogon)