‘No Collection Policy’ mahigpit na ipinatupad sa mga pampublikong paaralan sa Sorsogon City

Ni: FB Tumalad

Lungsod ng Sorsogon, Hunyo 6 (PIA) –Matapos magpalabas ng derektiba kamakailan si Education Secretary  Armin Luistro  sa mga opisyal ng Deped sa buong bansa hinggil sa  istriktong implementasyon ng pagbabawal sa pangungulekta ng anumang halaga sa elementarya sa mga pampublikong paaralan.

Nanawagan naman ng nakalipas na araw si Sorsogon City Schools Division Superintendent Ma. Socorro De La Rosa sa lahat ng mga school heads na nasa ilalim ng kanyang nasasakupan dito sa lungsod ng Sorsogon lalo na sa mga pampublikong paaralan na sundin ang No Collection Policy sa mga mag-aaral at magulang .

Sinabi pa ni Dr. Socorro na mahigpit ang panawagan sa mga regional directors, Provincial, Municipal at City Superintendent ni Sec. Luistro na sundin ang kautusang nakapalaman sa DepEd Memorandum Order# 41 series of 2012 o ang Revised Guidelines on the Opening of Classes.

Ayon pa sa kaniya, ibinaba ang derektiba noong nakaraang taon at muli itong binuhay ngayon ng kalihim upang maibsan ang alalahanin ng mga magulang dala ng kahirapan at mabawasan ang gastusin ng mga ito lalo pa’t malaki ang gastusin sa mga gamit pa lamang ng mga mag-aaral.

Walang koleksyon sa mga mag-aaral mula kinder hanggang Grade 3 mula Hunyo 3 hanggang sa taong 2014 at wala ring koleksyon sa Grade 4 pupil hanggang Grade 6 simula Hunyo hanggang Hulyo ngayong taon.

Sakali aniyang may mga magulang na sapilitang pinagbayad ng anumang halaga para sa kontribusyon sa paaralan ay maaring magsumbong sa School Supervisor, principal o di kaya’y sa City Schools Superintendent upang mabigyan ng agarang atensyon o aksyon. (FB Tumalad,PIA Sorsogon)

Mga kasundaluhan nakiisa sa pagbubukas ng klase; pagmamahal sa bayan binigyang-diin

Ni: Bennie A. Recebido

LUNGSOD NG SORSOGON, Hunyo 5 (PIA) – Nakiisa ang 903^rd Infantry Brigade sa naging pagbubukas ng klase noong Lunes, Hunyo 4, 2013 sa Castilla East Central School sa Brgy. Poblacion, Castilla, Sorsogon.

Ginawa nila ito sa pamamagitan ng pagsabay sa ginawang Flag Raising Ceremony at paglalahad ng Panatang Makabayan kung saan binigyang-diin nila ang kabayanihan, sakripisyo at dignidad ng mga unipormadong kababaihan at kalalakihan na nasa serbisyo. Kasama din dito ang pagpapahalaga sa ginawang serbisyo at pagpapasakit ng mga kasundaluhan upang depensahan ang teritoryo at maprotektahan ang kasarinlan ng bansa.

Ayon kay 903^rd Infantry Brigade Commanding Officer Joselito E. Kakilala bahagi ito ng kanilang kampanya na magbigay ng impormasyon sa publiko sa pamamagitan ng pagbisita sa iba’t-ibang mga organisasyon, academe, at civil society group sa lalawigan ng Sorsogon sa ilalim ng Internal Peace and Security Plan (IPSP)-Bayanihan ng Sandatahang Lakas ng Pilipinas.

Isa din umano ito sa isinusulong ng brigada na maturuan ang publiko ng kanilang mga papel na ginagampanan sa pagsusulong ng kapayapaan at kaunlaran at mapigilan ang mga masasamang elemento sa patuloy na ginagawang pagrerekrut sa mga kabataan na gumawa ng mga lihis sa tamang landas.

Sa bagong IPSP, kung saan isinusulong nito ang bagong istratehiya ng “winning the peace” advocacy ng Sandatahang Lakas ng Pilipinas, binabago nito ang pananaw ng publiko sa pagtugon sa problema ng insurhensiya mula sa solusyong militaristic patungo sa istratehiyang “people-centered security”.

Naniniwala si Col Kakilala na sa pamamagitan ng hakbang na ito ay tuluyan nang mamumulat ang kamalayan ng publiko na nasa kanilang mga kamay ang pagsusulong ng tunay na kapayapaan sa bansa. (BARecebido, PIA Sorsogon)

Shifting ng klase, solusyon sa malaking bilang ng populasyon ng SNHS

Ni: Bennie A. Recebido

LUNGSOD NG SORSOGON, Hunyo 5 (PIA) – Sa kabila ng naging paglobo ng bilang ng populasyon ng mag-aaral sa Sorsogon National High School (SNHS), nakaisip pa rin ng paraan ang pamunuan ng paaralan upang hindi masakripisyo ang kalidad ng edukasyon na makukuha ng mga mag-aaral.

Ayon kay Dr, Blanca Rempillo, principal ng SNHS, minabuti nilang gawing dalawang shifting ang iskedyul ng pagpasok ng mga mag-aaral sa lahat ng antas nang sa gayon ay hindi maapektuhan ang pag-aaral ng mahigit limang libong mga mag-aaral na naka-enrol ngayon sa kanilang paaralan.

Layunin din ng shifting scheme na maiwasan ang pagsisiksikan ng mga mag-aaral sa loob ng klase na malaking hadlang sa maayos at tamang pagkatuto ng mga mag-aaral.

Ang first shift ay gagawin nila mula alas-sais ng umaga hanggang alas-dos ng hapon habang ang second shift naman ay mula 11:45 ng umaga hanggang alas-sais ng gabi.

Maliban sa ganitong iskema, 38 mga bagong guro din ang nadagdag ngayong taon sa kanilang teaching force na malaking tulong upang mabawasan ang malalaking bilang ng mga mag-aaral sa bawat seksyon at makapagbukas sila ng mga panibagong seksyon.

Sinabi din ni Dr. Rempillo na sa pagbubukas ng klase noong Lunes ay umabot na sa 114 ang kabuuang bilang ng seksyon na binuksan nila kung saan bawat seksyon ay may lamang 45 mag-aaral. Maaari pa umano itong tumaas depende sa bilang ng mga tatanggapin pa nilang late enrollees hanggang sa Agosto ngayong taon.

Ang SNHS ay isang pampublikong paaralan na may pinakamalaking bilang ng populasyon sa Sorsogon. (BARecebido, PIA Sorsogon)

100 mag-aaral nakatanggap ng gamit pang-eskwela mula sa SPPO

Si PSSupt Ranara habang nagpapaliwanag sa mga mag-aaral.

Ni: Bennie A. Recebido

LUNGSOD NG SORSOGON, Hunyo 4 (PIA) – Hindi maipinta ang tuwang naramdaman ng mga mag-aaral pati na ng mga magulang nito matapos na makatanggap ang mga mag-aaral ng libreng gamit pang-eskwela handog ng mga kapulisan ng Sorsogon Police Provincial Office (SPPO) sa pamumuno ni Sorsogon Police Provincial Director PSupt Ramon S. Ranara.

Isangdaang mga mag-aaral mula grade one hanggang grade three ng Our Lady’s Village (OLV) Bibincahan Elementary School ang nabiyayaan ng libreng school supplies na kinabibilangan ng mga kwaderno, lapis, papel at iba pang mga kagamitang pang-eskwela sa pagbubukas ng school year 2013-2014 kahapon.

Ayon kay SPPO Public Information Officer PCI Nonito F. Marquez nakatakda rin silang mamigay pa ng kaparehong mga kagamitan sa pag-aaral sa 48 mga mag-aaral sa grade four hanggang grade six sa nasabi ding paaralan.

Aniya, ang hakbang na ito ay bahagi ng programang “Oplan Balik-Eskwela” ng kanilang Police Community Relations (PCR) Division. (BARecebido, PIA Sorsogon)

------------------------------------------------------------

Opening of Classes 2013-2014. The Sorsogon Police Provincial Office spearheaded by Provincial Director PSSUPT Ramon Sopeña Ranara, DSC conducted school visitation and distribution of school supplies at Our Lady’s Village Elementary School, Bibincahan, Sorsogon City on June 3, 2013, in time with the opening SY 2013-2014.100 pupils from Grades 1 to 3 receives free school supplies. PD Ranara encouraged the pupils to study hard and be a law abiding citizen at all times. School Proncipal Mrs Ana B. Llaneta, expressed thanks to the PNP personnel of SORPPO for choosing their school to be recipient of such noble effort. (BARecebido, PIA Sorsogon/NFMarquez, SPPO)

Unang araw ng klase maayos na naipatupad; police visibility lalong pinaigting

Ni FB Tumalad

LUNGSOD NG SORSOGON, Hunyo 4 (PIA) – Maayos ang kinalabasan ng pagbubukas ng unang araw ng klase sa Sorsogon kahapon sapagkat walang anumang naitatalang kaguluhan o anumang negatibong pangyayaring maaaring nakaapekto sa unang araw ng School Year 2013-2014.

Ayon sa mga obserbador, ito ay sanhi na rin ng pinaigting na police visibility sa mga istratehikong lugar at sa kooperasyon na rin ng publiko partikular na ang libo-libong mga mag-aaral na nagsipasukan na sa lahat ng antas ng paaralan kahapon.

Mayroon ding inilagay na Police Assistance Desk (PAD) na makikita mismo sa harapan ng malalaking mga pampublikong paaralan na magtatagal ng buong linggo.

Sinabi ni Sorsogon City Police Chief PSupt. Edgardo Ardales na mahalaga ang Police Assistance Desk sa mga paaran lalo pa’t abala ngayon ang lahat ng mga paaralan mula preparatory school hanggang sa kolehiyo. Aniya, maaring lapitan ninuman ang inilagak na Police Assistance Desk sa oras na kailangan ng tulong ng mga mag-aaral at magulang at tiniyak ng hepe na makakaasa sila ng asistensya mula sa mga unipormadong pulis.

Ayon sa opisyal limitado man sya sa mga tauhan ang City Police Office subalit tiniyak nito na mananatiling naririyan ang kanilang presensya para magbigay ng kanilang serbisyo at mapanatili ang kaayusan sa mga kalsada at mga paaralan sa lahat ng panahon.

Panawagan din ni Ardales sa mga magulang na huwag papayagan ang kanilang mga anak na magdala ng anumang mamahaling kagamitan o gadget sa paaralan nang sa gayon ay maiwasan ang mga problema at posibleng kapahamakan ng kanilang mga anak.

Kabilang din sa binabantayan ng mga ito ay ang mga internet café at mga bilyarang malapit sa mga paaralan. Binalaan na rin nila umano ang mga may-ari nito na huwag tatanggap ng mga estudyante sa oras ng klase sapagkat malimit ginagawang tambayan at palipasam ng oras ng mga mag-aaral na nahuhumaling sa mga online games sa halip na pumasok sa kanilang mga klase.  

Dagdag pa ni Ardales na magiging abala sila hanggang sa kapistahan ng lungsod ng Sorsogon sa darating na Hunyo 28-29, 2013.

Kabilang din sa preparasyong pinaghahandaan ng City PNP ang oath-taking ceremony ng mga bagong uupong opisyal ng lungsod sa Hunyo 30 ngayong taon para sa panibagong tatlong taong termino. (FBTumalad, PIA Sorsogon)