Kabalikat Civicom Bacon Chapter, nakatakdang magsagawa ng Fun Run at Fun Walk para sa Kalikasan

Ni: FB Tumalad

LUNGSOD NG SORSOGON, Mayo 19 (PIA) – Nakatakdang magsagawa ng Fun Run, Fun Walk ang Kabalikat Civicom Bacon Chapter bukas, Mayo 21, 2013 , alas singko ng umaga na sisimulan sa Sorsogon State College, Lungsod ng Sorsogon.

Ang Fun Run at Fun Walk  ay naisakatuparan sa pamamagitan ng pangulo nito na si Ruel Atutubo kabilang na ang 30 aktibong kasapi ng  Kabalikat.

Para sa kapakanan ng mga susunod pang henerasyon, layunin  nilang maitaas pa ang antas ng kamalayan ng publiko sa tamang pangangalaga ng ating likas na yamang dagat .

Inaasahang lalahukan ang sama-samang mithiing ito ng sektor ng mga propesyunal, akademya, kinatawan ng mga Non-Government Organization at ng iba pang sektor ng komunidad.

Ang kabalikat  Civicom Bacon Chapter ay  palaging nakaantabay sa anumang oras upang umalalay sa mga panahong may kalamidad, sakuna at krimen ng walang hinihinging kapalit.

Sa halagang P250 na registration fee ay mayroon nang libreng singlet at sertipiko Bukod sa singlet ay may P1,000  ibibigay sa unang makakarating sa Bacon East Central School kung saan naroroon ang finish line na may distansyang walong kilometrong layo.

Ang pangalawang makararating sa finish line ay makakatanggap ng P500 habang P250 naman sa 3rd placer. Hindi rin uuwing luhaan ang ika-apat hanggang ika-sampung makakarating sa finish line sapagkat bibigyan din ang mga ito ng tig-P100.

Ang unang makakarating naman sa 5 kilometrong finish line ay makakatanggap ng P500; P300 para sa 2nd placer at P200 para sa 3rd placer.

Ayon kay Atutubo, ang nasabing aktibidad ay  hindi nakatuon sa anumang halaga subalit sa pamamagitan nito ay maipapakita ng bawat isa na sila  ay nais makatulong  sa pamamagitan ng pagbibigay panahon at ambag upang malabanan ang patuloy na pang–aabuso at pagkasira ng ating likas na yaman. (FB Tumalad, PIA Sorsogon)