“Diskwento Caravan – Balik Eskwela Edition” inilunsad ng DTI

Ni: Bennie A. Recebido

LUNGSOD NG SORSOGON, Mayo 21 (PIA) – Halos dalawang linggo na lamang ang natititira bago ang pasukan kung kaya’t abala na naman ang mga mag-aaral at magulang sa pagbili ng mga kagamitan bilang paghahanda sa pagbubukas ng mga paaralan.

Kaugnay nito, muli na namang nakaalalay ang Department of Trade and Industry (DTI) upang matulungan ang mga mag-aaral at magulang sa kanilang mga gastusin sa kagamitan sa pag-aaral sa pamamagitan ng kanilang “Diskwento Caravan – Balik Eskwela Ediiton”.

Ayon kay DTI Sorsogon Information Officer Senen Malaya, inilunsad ng DTI ang isang pambansang proyektong tinagurian nilang “Diskwento Caravan” nang sa gayon ay matulungan ang mga kunsumidor na makabili ng mga kagamitan at produkto sa mas mababang halaga nang hindi nasasakripisyo ang kalidad nito.

Aniya, para sa lalawigan ng Sorsogon, ang “Diskwento Caravan – Balik Eskwela Edition” ay isasagawa sa pakikipagtulungan sa Department of Educatio (DepEd) kasabay ng pagsasagawa nito ng “Brigada Eskwela”, sa Sorsogon Consumers Association at sa iba-ibang mga establisimyentong nangakong makikilahok dito tulad ng Centro Department Store, Duka Variety Store; Goodluck Commercial; at Jeanee’s Supermarket.

Kabilang sa mga ibebenta sa may diskwentong halaga ay mga kagamitang tulad ng kwaderno, papel, lapis, pambura, pangtasa, bag, sapatos at uniporme, mga pambaon at iba pa.

Ang dalawang araw na aktibidad ay gagawin simula sa Miyerkules, ika-22 ng Mayo hanggang sa Huwebes, Mayo 23, 2013 sa Distrito ng Bacon, Lungsod ng Sorsogon.

Sa Mayo 22, 2013, gagawin ang “Diskwento Caravan – Balik Eskwela” alas otso hanggang alas-onse y medya ng umaga sa Bonga Integrated High School; ala-una hanggang alas-kwatro y medya ng hapon sa Rawis National High School; at sa Mayo 23, 2013,gagawin naman ito alas-otso hanggang alas-onse y medya ng umaga sa Gatbo Integrated High School; habang ala-una hanggang alas-kwatro y medya naman ng hapon sa L. Martinez Memorial High School.

Subalit nilinaw ni Malaya na hidi nila nililimithan ang “Diskwento Caravan” sa mga nabanggit lamang na barangay kundi bukas umano ito sa mga katabing mga barangay at sa sinumang interesadong makabili ng mga kagamitan sa murang halaga. (BARecebido, PIA Sorsogon)