Friday, February 5, 2010

News Release

ORDINANSANG MAGPAPATUPAD NG EFFECTIVE SOLID WASTE MANAGEMENT ISINUSULONG

SORSOGON PROVINCE (February 3) – Isa sa mga naging resulta ng isinagawang review ng Republic Act 9003 o mas kilala bilang Solid Waste Management Act of 2000 ay ang pagsusulong ng isang ordinansang magtitibay at magsasakatuparan ng mga mekanismong makatutulong upang epektibong maipatupad ang sistematiko at komprehensibong pamamahala ng mga itinatapong basura.

Kaugnay nito, pinag-aaralan ngayon ng Sangguniang Panlalawigan sa pangunguna ni Provincial Board Member Arze Glipo, chair Committee on Agriculture and Fisheries ang pagsusulong ng isang ordinansang magmamaximize sa land use plan ng mga pamahalaang bayan at pamahalaang lungsod dito sa lalawigan.

Tampok sa isinusulong na provincial ordinance ang inter-local government unit cooperation, clustering mechanism at gender equality kaugnay ng solid waste management.

Ayon kay Glipo, iminungkahi ng Provincial Government sa pamamagitan ng Provincial Solid Waste Management Board ang clustering o pagsasama-sama ng mga munisipyo upang makapagpatayo ng sanitary landfill, material recovery facility, alternative technologies at iba pang mga kaugnay na pasilidad upang makaya ng mga ito ang malaking halagang gugugulin sa pagpapatayo ng mga ito.

Ipinaliwanag ni Glipo na apat na cluster ang iminumungkahi alinsunod sa geographical location at magkakatulad na pangangailangan sa solid waste management.

Kabilang sa Cluster 1 ang mga bayan ng Bulan, Irosin, Matnog at Sta. Magdalena; sa Cluster 2 ay ang mga bayan ng Castilla, Donsol at Pilar; sa Cluster 3 naman ang Casiguran, Juban at Sorsogon City habang sa Cluster 4 naman nakabilang ang Barcelona, Bulusan, Gubat at Prieto Diaz.

Sinabi ni Glipo na maliban sa clustering ay isaalang-alang din ang pangangailangan at pananaw ng mga kababaihan sa usapin ng solid waste management lalo na’t lahat ng gawaing kaugnay ng pag-unlad ay may gender impact at mahalagang mabiyayaan dito ng pantay ang lalaki at babae.

"Kung kaya’t dapat lamang na maunawaan ng mga waste managers ang tinatawag na gender relation upang makapagdisenyo sila ng isang gender sensitive solid waste program sapagkat mas malaki ang tsansa nito pagdating sa sustainability," pahayag pa ng opisyal.

Dagdag pa niya na malaki din ang maiaambag ng hakbang na ito sa pagbibigay solusyon sa suliranin sa Climate Change kung kaya’t umaasa siyang buong-buong susuportahan ito ng mga kasamahan niya at maging ng publiko. (Bennie A> Recebido, PIA Sorsogon)

News Release

DALAWANG KAMPUS NG SORSOGON STATE COLLEGE TINAGURIANG PROV’L INSTITUTES FOR AGRI-FISHERIES

SORSOGON PROVINCE (February 1)– Konsiderado na ngayong Provincial Institutes for Agri-Fisheries ang dalawang kampus ng Sorsogon State College (SSC) dito sa lalawigan ng Sorsogon.

Ito ay matapos na bigyang akreditasyon ng Commission on Higher Education (CHED) ang SSC campus sa bayan ng Castilla at Magallanes ng provincial institute status bago magtapos ang tumalikod na taong 2009.

Ayon kay SSC President Antonio Fuentes sa pamamagitan ng Programs and Standards Office ng CHED, nagsagawa ito ng field evaluation and validation sa mga campus ng Castilla at Magallanes noong mga unang buwan ng 2009 alinsunod na rin sa mga mahahalagang probisyon sa ilalim ng Republic Act (RA) No. 7722, o mas kilala sa tawag na “Higher Education Act of 1994”.

Layunin nitong isulong at pataasin ang kalidad ng edukasyon ng mga paaralang pangkolehiyo na nagbibigay ng mga kursong may kaugnayan sa agrikultura at pangisdaan sa bansa tulad na nga nitong mga kampus ng Sorsogon State College sa Castilla at sa Magallanes.

Matapos itong ideklara bilang Provincial Institutes for Agri-Fisheries, ang Castilla at Magallanes campus ay kapwa nakatanggap ng grant na nagkakahalaga ng kalahating milyon na magmumula sa General Appropriations Act fund upang pondohan ang taunang priority projects nito.
Samantala, tatlong programa ng Castilla campus ang binigyan ng akreditasyon ng Accrediting Agency of Chartered Colleges and Universities of the Philippines (AACCUP).

Ang tatlong programa o kursong ito ay ang Bachelor in Agricultural Technology, Bachelor of Science in Agricultural Development, and Bachelor of Science in Veterinary Technology na nakakuha ng status na may bisa mula July 16, 2009 hanggang July 15, 2011 sa isinagawang preliminary survey ng AACCUP.

Una na rito ay binisita na ng AACCUP, early 2009 ang Castilla campus at dahilan sa impressive performance ng tatlong programang nabanggit ay nakuha nito ang nasabing akreditasyon.

Sinabi ni Fuentes na dahilan dito at sa pagkakadeklarang Provincial Institute for Agri-Fisheries ng Castilla at Magallanes campus, mas maraming mga mag-aaral ang sa ngayon ay nakatitiyak ng de-kalidad na edukasyon na dapat nilang makuha nang hindi na pumupunta pa sa malalayong paaralan o unibersidad, kung kaya’t hinikayat din niya ang mga mag-aaral na mag-enrol na sa nasabing mga kampus. (Bennie A. Recebido, PIA Sorsogon)