Thursday, March 25, 2010

PIA Sorsogon Infocen, Sorsogon Provincial-LGU ink MOA with Phivolcs

PIA Sorsogon Infocen, Sorsogon Provincial-LGU ink MOA with Phivolcs

PIA Sorsogon Infocen, Sorsogon Provincial-LGU ink MOA with Phivolcs

MOA SIGNING WITH PHIVOLCS DIRECTOR RENATO SOLIDUM

PIASorsogon Infocen, Sorsogon Provincial-LGU ink MOA with Phivolcs

PANG-AABUSO SA KABABAIHAN DAPAT NA MATULDUKAN

Tagalog News Release

SORSOGON PROVINCE (March 24) – Kaugnay ng isinasagawang pagdiriwang ng Women’s Month ngayong buwan ng Marso, nanawagan si Sorsogon City Gender and Development Chief Rose Abay sa lahat ng mga kababaihan na huwag matakot magsuplong sa mga kinauukulan sakaling maharap sila sa sitwasyon ng anumang uri ng pang-aabuso.

Aniya, nakahanda ang kanilang tanggapan na tumulong anumang oras na may dumulog sa kanila nang sa gayon ay matuldukan ang mga pang-aabuso sa mga kababaihan.

Sinabi ni Abay na sa kanilang tala, noong nakaraang taon, umabot sa isanglibo ang bilang ng naitalang biktima ng pang-aabuso sa mga kababaihan, at sa pagpasok naman ng 2010 ay nakapagtala na sila ng tatlong kaso ng incest, dalawang kaso ng rape at patuloy pa ring nakakatanggap ng iba pang uri ng kaso ng pang-aabuso sa mga kababaihan sa Sorsogon City.

Ayon kay Abay, ang pagdami ng bilang ng mga lumalapit sa kanilang tanggapan ay bunga na rin ng malawakang information and education campaign na ginagawa nila sa mga Barangay kung saan binibigyang-diin nila ang kahalagahan ng respeto sa dignidad ng bawat kasapi ng pamilya partikular ang mga kababaihan at ang pantay na distribusyon ng mga gawain sa pagitan ng mag-asawa pagdating sa pag- aalaga ng mga anak, paghahanap-buhay at paggawa sa loob ng tahanan.

Hiniling din ni Abay sa mga kalalakihan na suportahan nito ang kanilang panawagan upang maisulong, madinig at maipaabot sa kanilang tanggapan ang mga hinaing na may kaugnayan sa mga pang-aabuso sa loob ng tahanan nang sa gayon ay matugunan ito at mabawasan ang mga paglabag sa mga karapatan ng bawat kasapi ng pamilya.

Nilinaw din ni Abay na pantay ang pagbibigay nila ng atensyon sa kalalakihan at kababaihan sa pagsusulong nila ng gender advocacy and development program. (Benneie A. Recebido, PIA SOrsogon)

TAX MOTORCADE ISINAGAWA NG BIR SORSOGON

Tagalog News Release
SORSOGON PROVINCE (March 24) – Isang tax motorcade ang isinagawa kahapon ng mga tauhan ng Bureau of Internal Revenue Sorsogon District Office na naglalayong pukawin ang kamalayan ng publiko ukol sa tamang pagbabayad ng buwis.

Ang nasabing tax motorcade na may temang “Making the Public Know” ay dinaluhan din ng ibang mga taga-media at iba pang mga suportador ng BIR partikular upang ipanawagan din sa publiko ang deadline ng pagsumite ng income tax sa darating na April 15.

Ayon kay Sorsogon Revenue District Officer Arturo Abenoja, nakatuon ngayon ang BIR sa pagpapalawak ng kanilang tax monitoring campaign at sa pagpapalakas pa tax collection efficiency.

Aniya, pinaghahandaan din ng kanilang tanggapan ang pagpapaigting ng Run After Tax Evaders o RATE program upang mapababa ang mga tax evasion cases at mapasigla ang revenue collection ng pamahalaan.

Sinabi din niyang nakikipag-ugnayan ang BIR sa iba't-ibang ahensiya at mga pribadong kumpanya upang matulungan silang makakuha ng impormasyon kaugnay ng mga kinita at lifestyles ng mga taxpayers, pati na rin yaong mga negosyong may kaugnayan sa election campaign gaya ng pag-imprinta ng mga fliers, posters at iba pa.

Kasabay din ng mga hakbang na ito ay ang pagpapatupad ng BIR ng kanilang transparency program kung saan tiniyak niya sa publiko na bukas ang kanilang tanggapan sa sinumang nagnanais na makita ang mga programa, proyekto at gawain ng BIR upang maiwasan ang anumang mga pagdududa.

Samantala, matatandaang kamakailan ay naging matagumpay din ang isinagawang Tax Wizard Quiz ng BIR Sorsogon kung saan nilahukan ito ng mga mag-aaral mula sa pribado at pampublikong kolehiyo sa lalawigan.

Ayon kay Abenoja, balak din nilang gawin ito sa susunod pang mga pagkakataon sapagkat aniya, sa ganitong hakbang man lang ay mapukaw din ang kamalayan ng mga kabataan ukol sa tamang pagbabayad ng buwis nang sa ganon ay malinang na sa mga ito ang pagiging responsableng tax payers sa hinaharap. (Bennie A. Recebido, PIA Sorsogon)

MGA LOOK SA REHIYON NG BIKOL LIGTAS NA SA RED TIDE

SORSOGON PROVINCE (March 22) – Ligtas na sa nakalalasong red tide ang mga look sa rehiyon ng Bikol na dati ay naging positibo dito.

Ito ang nakalap na impormasyon ng PIA Sorsogon mula sa Bureau of Fisheries and Aquatic Resources (BFAR) Regional Office V na nakabase sa Pili, Camarines Sur nito lamang umaga.

Base sa pinakahuling Shellfish Bulletin na ipinalabas ng BFAR, ang shellfish bulletin no. 6 na may petsang March 17, 2010, lumalabas dito na negatibo na sa red tide toxin at paralytic shellfish poisoning ang Sorsogon Bay sa Sorsogon City, Juag Lagoon sa Matnog, Sorsogon at mga kostal na katubigan ng Mandaon at Milagros sa lalawigan ng Masbate.

Sa kasalukuyan ang mga sumusunod na lamang na mga katubigan sa bansa ang positibo sa red tide at paralytic shellfish poisoning: ang Dumanquillas Bay sa Zamboanga del Sur, Bislig Bay sa Bislig City sa Surigao del Sur, Murcielagos Bay sa Zamboanga del Norte at Misamis Occidental. Idinagdag na rin ngayon sa listahan ng mga positibo sa red tide toxin ang Matarinao Bay sa Eastern Samar.

Subalit, inihayag naman ni Gil Adora, Officer In Charge ng laboratory ng BFAR Diliman sa Quezon City na kahit pa nga deklaradong negatibo na sa red tide ang ilang mga katubigan at lifted na ang shellfish ban sa ilang lalawigan sa bansa, patuloy pa ring pinag-iingat ang publiko sa pamamagitan ng paglilinis ng mabuti ng mga lamang-dagat na kanilang kakainin partikular ang mga shellfish.

Dapat din aniyang lutuin ito ng mabuti nang sa gayon ay maiwasan ang mga negatibong idudulot nito sa kalusugan ng tao.

Binigyang-diin din niya na lalo’t may El NiƱo ngayong nararanasan sa bansa, malaki din ang posibilidad na muling mamukadkad ang organismo ng red tide anumang oras kung kaya’t makabubuti aniyang laging subaybayan ng publiko ang pinakahuling mga kaganapan at resulta ng isinasagawang monitoring ng BFAR. (Bennie A. Recebido, PIA Sorsogon)

WOMEN’S MONTH CELEBRATION IDARAOS NGAYON SA SORSOGON

SORSOGON PROVINCE (March 18) – Isasakatuparan ngayong araw ng Provincial Gender and Development Council sa pakikipagtulungan nito sa Sorsogon Women’s Network for Development ang pagsasama-samang muli ng mga kababaihang lider sa buong lalawigan ng Sorsogon.

Bibigyang-tuon sa gagawing forum ang mga mahahalagang kontribusyong nagawa ng Gender and Development Program sa mga naging benepisyaryo nito sa ilalim ng pagpapatupad ng PGADC.

Ayon pa kay Provincial Board Member Committee Chair on Women and Family Relations Rosario Diaz, ang pagdiriwang ng buwan ng mga kababaihan ay hindi lamang nakatuon sa pagbibigay-pugay sa kanila kundi para sa bawat pamilya at para na rin sa komunidad.

Aniya, natutuwa siyang marami nang kababaihan ang ngayon ay lumalabas at nakikilahok na sa mga panlipunang aktibidad.

Patunay lamang aniya ito na maraming mga kababaihan na ngayon ang empowered at nagiging equal partners na ng mga kalalakihan sa pagbuo ng matatag na bansa.

Pinatotohanan din niya bilang babae na ang pagkakapasok niya sa public service ay nagdala din ng malaking ambag upang makamit ang minimithing pagkilala sa mga kababaihan at sa tulong nito sa pag-unlad ng Sorsogon.

Kaugnay nito, hinikayat niya ang mga kababaihan na makiisa sa pagdala ng pagbabago sa pamamagitan ng aktibong pakikilahok ngayong darating na halalan.

Samantala, buo naman ang suportang ipinapakita ni Sorsogon Gov. Sally Lee sa grupo ng mga kababaihan sa lalawigan sa pangunguna ng Sorsogon Womens Network for Development.

Ayon sa gobernador, suportado niya ang mga aktibidad ng mga kababaihan dito at ang mga programang higit na makakatulong upang mapalago pa ang kakayahan ng mga ito tungo sa mas higit pang pag-unlad. (Bennie A. Recebido, PIA Sorsogon)