Friday, May 7, 2010

2010 Election Updates

Tagalog News Release

SORSOGON PROVINCE (May 7) – Nanawagan ang pamunuan ng Commission on Election (Comelec) sa mga opisyal ng Barangay na tulungan silang bantayan ang mga Precinct Optical Scan o PCOS machine na ilalagay sa kani-kanilang mga Barangay.

Ayon kay Provincial Election Supervisor Calixto Aquino, ngayon higit kailanman nila kailangan ang kooperasyon ng bawat isa, nang sa gayon ay makamit ang minimithing maayos at matagumpay na halalan sa Lunes.

Matatandaang sinimulan na kahapon, May 6, ang distribusyon ng mga PCOS machines sa iba’t-ibang mga polling precincts sa lalawigan at nagpapatuloy pa ang distribusyon hanggang sa kasalukuyan.

Samantala, ang dapat sana ay election dry-run ngayon ay ipinagpaliban sa darating na Linggo, May 9 ayon na rin sa Memo Resolution 8825 na ipinalabas ng Comelec.

Umaasa ang Comelec Sorsogon at SMARTMATIC na tuloy-tuloy na nga ito sa linggo at wala na ring anupamang mga mabibigat na suluraning kakaharapin pagdating ng halalan sa Lunes. (Bennie A. Recebido, PIA Sorsogon)

MAAYOS AT MAPAYAPANG HALALAN TINIYAK NG PNP AT COMELEC SORSOGON

Tagalog News Release

SORSOGON PROVINCE (May 6) – Apat na araw lang at halalan na kung kaya’t tiniyak ni Sorsogon Police Provincial Director PSSupt. Heriberto Olitoquit sa mga tauhan ng Commission on Election, mga Board of Election Inspectors at mga kinauukulan na magiging maganda at maayos ang sistema ng halalan sa darating na Lunes.

Ayon kay Olitoquit nagpalabas na siya ng direktiba sa kanyang mga tauhan na huwag makisawsaw at umiwas sa anumang mga aktibidad politikal at mantinihin ang integridad at kredibilidad ng mga kapulisan.

"Pawang nakauniporme ang lahat ng mga pulis na ilalagay sa mga polling precints katuwang ang Armed Forces of the Philippines," pagtitiyak pa ng opisyal.

Samantala, simula noong Miyerkules ay inilagay na sa full alert status ang buong pwersa ng mga kapulisan ayon na rin sa kautusan ni PNP Chief Director General Jesus Verzosa bilang bahagi na rin ng pagmamantini ng peace and order situation kaugnay ng halalan sa Lunes.

"Mayroon ding Security Assistance Desk na ilalagay ang PNP limampung metro ang distansya mula sa loob ng lugar na pagbobotohan kung saan maaaring humingi ng tulong ang mga BEI, Comelec officials at maging ang mga mamamayan sakaling magkaroon ng mga untoward incidences.

Samantala, tiwala naman si Provincial Election Supervisor Atty. Calixto Aquino na hindi magkakaroon ng problema sa mga gagamiting Precinct Count Optical Scan o PCOS machine sa araw ng halalan.

Matatandaang dumating ang anim na raan siyamnapu’t dalawang PCOS machines noong nakaraang linggo at sisimulan na ang pamamahagi sa iba’t-ibang mga bayan bilang paghahanda sa gagawing dry-run sa Biyernes.

Tiwala din si Aquino na magiging maganda ang takbo ng halalan sa Mayo dahilan sa ginawa nilang paghahanda nitong mga nakalipas na buwan.

Tiniyak din niyang well-coordinated na ang lahat at sa kasalukuyan ay nasa monitoring stage na lamang ang Comelec. (Bennie A. Recebido)

ENERGY CAMP 2010 NG MGA KABATAAN NAGING MATAGUMPAY

Tagalog News Release

SORSOGON PROVINCE (May 5) – Naging matagumpay at makabuluhan para sa animnapu’t apat na mga kabataan ang isinagawang Energy Summer Youth Camp sa Base Camp ng Energy Development Corporation noong nakaraang linggo.

Ang aktibidad ay orihinal na konsepto ni EDC Vice Chairman at CEO Mr. Paul Aquino pitong taon na ang nakakaraan kung saan binibigyan nila ng pagkakataon ang mga scholars ng EDC-Bacon Manito Geothermal Production Field mula sa mga host communities nito sa Albay at Sorsogon na sumailalim sa mga natatanging pagsasanay.

Ayon sa mga kabataan, sa walong araw na inilagi nila sa base camp, iba’t-ibang mga kasanayan at responsibilidad ang kanilang natutunan, mula sa mga gawaing bahay hanggang sa pagmamahal sa pamilya at sa kalikasan.

Namulat diumano ang mga kabataan sa katotohanan na kailangan ding kumilos ang mga katulad nila upang maisalba sa higit na pagkasira ang mundo at nalaman din nila diumano kung gaano kalaki ang naiaambag nila sa pagkakasira ng kapaligiran.

Ayon naman kay Ferdinand De Vera, ang Public Relations Officer ng EDC, mga incoming fourth year students ang pinipili nilang kalahok sa kanilang taunang E-camp.

"Malaking tulong ang E-camp upang lubusang makilala ng mga kabataan ang mahalagang gamit ng geothermal plant at kung ano ang papel na ginagampanan nito," pahayag pa ni De Vera.

Dagdag din niyang nakatakda ring tulungan ng EDC ang mga kabataan sa mga susunod nilang E-camp ukol sa pagdiskubre ng kanilang mga kakayahan at tamang pagpili ng mga kursong may mataas na employment potential nang sa gayon ay madesisyunan nila ng tama ang kursong kanilang kukunin pagtuntong nila sa kolehiyo. (Bennie A. Recebido, PIA Sorsogon)

MGA AGAM-AGAM UKOL SA PAGTRANSMIT NG ELECTION RETURNS PINAWI NG SMARTMATIC

Tagalog News Release

SORSOGON PROVINCE (May 5) – Pinawi ni SMARTMATIC Regions Management Unit Head Sonia Lariosa ang mga agam-agam ng iilan ukol sa posibilidad ng pagkakaroon ng mga aberya na may kinalaman sa mga gagamiting Precinct Count Optical Scan o PCOS machine sa araw ng halalan.

Ayon kay Lariosa, kumpleto na ang mga gagamiting paraphernalia at handa na rin ang kanilang mga tauhan at ang anim na raan siyamnapu’t dalawang makina para sa Lunes. Ang bawat makina ay may kasamang charger at ekstrang baterya na maaaring tumagal ng hanggang labing-anim na oras.

Tiniyak din niyang kung sakaling hindi rin talaga maiiwasang magkaroon ng aberya ay may mga itinalaga na silang stand-by supervisors at technicians upang agad na rumisponde.

Muli niyang ipinaalala na naging matagumpay din ang ginawang simulation testing kung saan tested and proven nila na kayang itransmit ang mga election returns sa mga destinasyon nito nang maayos.

"Limang pamamaraan ang maaring gamitin sa pagpadala ng resulta ng halalan: ito ay ang Broadband Global Area Network o BGAN transmittal system, USB o modem transmittal system, ang Very Small Aperture Terminal o VSAT, landline at network transmittal system," ayon sa kanya.

"Sa lalawigan ng Sorsogon, ang VSAT, USB at BGAN transmittal procedures ang epektibong gamitin," pahayag pa ni Lariosa.

Sinabi din niya na ang makina na rin ang magpapadala o magtatransmit ng election returns sa tatlong pre-configured servers na kinabibilangan ng municipal server, comelec backup server at isa pang server para sa mga media at iba pang concerned parties.

"Hindi konektado sa anumang network ang makina habang patuloy pa ang botohan. Kakabitan lamang ito ng modem para sa transmission kapag nabilang na ng makina ang mga boto at muling tatanggalin ang network connection matapos na maipadala na sa tatlong configured servers ang election result," dagdag pa niya.

Tiwala ang SMARTMATIC at ang Commission on Election (Comelec) na magiging maayos din at matagumpay ang gagawing election dry-run sa darating na Byernes, ika-pito ng Mayo at maging ang halalan sa darating na Lunes. (Bennie A. Recebido, PIA Sorsogon)

BFP SORSOGON CITY ININSPEKSYON ANG MGA PAARALAN

Tagalog News Release

SORSOGON CITY (May 4) - Nagsagawa ng sunud-sunod na inspeksyon sa mga paaralan dito sa lungsod ang Sorsogon City Fire Station bilang paghahanda sa darating na halalan sa Lunes.

Ayon kay City Fire Marshall Chief Inspector Renato B. Marcial, ang inspeksyon ay bahagi ng kanilang “Oplan Halalan” upang tiyaking lahat ng mga silid-aralang gagamitin ay ligtas mula sa anumang panganib.

Aniya, sinimulan nila ang inspeksyon noong huling linggo ng Abril kung saan tatlong malalaking paaralan sa lungsod ang natapos na nilang inspeksyunin.

Sa pahayag pa ni Marcial, sinabi nitong nais din nilang matiyak na mahigpit ding susundin ang nakasaad sa Fire Code of the Philippines upang matiyak ang kaligtasan ng lahat sa araw ng halalan. (BFP/PIA)

Thursday, May 6, 2010

MATAAS NA COLLECTION NG BIR SORSOGON MAGANDANG SENYALES

Tagalog News Release

SORSOGON PROVINCE (May 4) – Malaki ang itinaas ng koleksyon sa buwis dito sa lalawigan ngayong taon kumpara noong 2009 ayon sa pahayag ni Arturo Abenoja, District Revenue Officer ng Sorsogon.

Sinabi ni Abenoja na lumagpas ito sa inaasahan nilang target kung saan umabot na sa dalawampu’t-pitong milyong piso sa unang kwarter pa lamang ng 2010 ang kanilang naging koleksyon.

Aniya, 40% ang idinagdag sa unang bugso ng kanilang revenue collection mula Enero hanggang Marso.

"Magandang senyales ito upang mapabilang ang BIR Sorsogon District Office sa mga top performers ng highest collection sa buong rehiyon ng Bikol kahit man lang sa taong ito," pahayag ng opisyal.

Dagdag din niya na hindi lamang ang kanilang koleksyon ang positibo ang naging resulta kundi pati na rin ang kanilang filing system at hindi na rin nagsisiksikan ang mga taong pumupunta sa kanila.

"Naging maganda rin ang epekto ng panibagong sistemang ipinatupad namin kung saan binuksan namin ang aming tanggapan sa araw ng Sabado at nakipagkawing din kami sa mga bangko upang makapagbigay ng serbisyo sa mamamayan," ayon pa sa kanya.

Kaugnay nito, hiniling ni Abenoja sa lahat ng mga tax payers na ugaliin ang pagbabayad sa tamang oras at hinikayat din nya ang lahat ang mga mamamayan na ugaliin ang paghingi ng resibo sa tuwing bibili sa alinmang establisimiyento upang higit pang mapataas ang koleksyon sa buwis at mapalakas ang kaban ng bayan. (Bennie A. Recebido, PIA Sorsogon)