Friday, September 24, 2010

SORSOGON CITY NAKIKIISA SA WORLD ANTI-RABIES DAY

Tagalog News Release

SORSOGON PROVINCE (Sept 24) – Nakikiisa ang lungsod ng Sorsogon sa gagawing pagdiriwang ng world anti-rabies day sa darating na Martes sa susunod na linggo. Ang World Rabies Day ay ginugunita tuwing ika-dalawampu’t walo ng Setyembre sa halos ay pitumpu’t-apat na bansa sa buong mundo kabilang na ang Pilipinas.

Layunin ng taunang paggunita na itaas ang kamalayan tungkol sa rabis at hikayatin ang mga amo na pabakunahan ang kanilang mga alaga kontra sa bagsik nito.

Ang rabis ay isang sakit na tumatama sa mga hayop partikular sa mga aso kung saan naaapektuhan ang kanilang utak.

Maliban sa aso, maari ding magkaroon ng virus na ito ang mga pusa, baboy, kambing, tupa, kalabaw, baka at unggoy. Nalilipat ito sa tao sa pamamagitan ng kagat ng hayop o paghalo ng laway nito sa bukas na sugat.

Sa lungsod ng Sorsogon patuloy pa rin ang malawakang pagbabakuna sa mga aso at paghuhuli ng mga galang aso na nagbibigay ng sakit ng ulo sa mga residente at maging sa mga motorista.

Sinabi ni Sorsogon City Veterinarian Dr. Alex Destura na bilang pakikiisa sa world rabies day celebration, nagsasagawa sila ngayon ng dog castration at nagpapalabas ng mga pelikulang may kaugnayan sa rabis sa iba’t-ibang mga paaralan dito sa lungsod.

Nagbibigay din diumano sila ng mga training samplers sa pag-aalaga ng iba’t-ibang uri ng mga hayop.

Patuloy din ang kanilang panawagan sa mga dog owners na maging responsable sa pag-aalaga ng kanilang mga aso upang maiwasan ang pagkakalat o paglalaboy ng mga ito sa kalye at maiwasan din ang pagtaas ng bilang ng mga kaso ng rabis dito.

Sinabi din nito na sa kasalukuyan ay nakikita na rin ang bunga ng pagpapaigting nila ng kanilang rabies elimination program kung saan contained na ang mga kaso nito dito sa lungsod.

Dagdag din niya sa ilang mga kasong naitala, hindi dito sa lungsod nakagat ng aso ang mga biktima kundi sa ibang lugar at dito na lamang sila inatake ng bagsik ng rabis. (Bennie A. Recebido, PIA Sorsogon)

Thursday, September 23, 2010

NATIONWIDE PHILHEALTH REGISTRATION DAY ORIENTATION ISINAGAWA

Tagalog News Release

SORSOGON PROVINCE – Bilang bahagi ng pagpapatupad ng balakin ng Pangulong Benigno Aquino III na mabigyan ang lahat ng mga Pilipino ng akses sa de-kalidad na serbisyong pangkalusugan sa loob ng tatlong taon, isinagawa dito sa lalawigan ng Sorsogon noong Martes ang isang araw na oryentasyon at organizational meeting ukol sa nakatakdang Nationwide Philhealth Registration Day sa darating na Oct. 2, 2010.

Ayon kay Jindra Mingoy, Philhealth Bicol focal person for Sorsogon, marami pang mga mahihirap na mamamayan at mga nasa informal sector ang hindi pa maka-akses sa mga serbisyong pangkalusugan ng pamahalaan dahilan na rin sa kakulangan ng kamalayan ng publiko ukol sa tamang pamamaraan at proseso ng pag-aplay bilang kasapi ng Philhealth.

Aniya, sa pamamagitan ng programang ito ng Pangulo, mas malaki ngayon ang tsansang masagutan ang kakulangang ito.

Ayon pa sa kanya, inaasahang dito sa lalawigan ng Sorsogon ay aabot sa 40, 726 na mga mahihirap ang dadagsa sa Sorsogon Provincial Gymnasium sa Oct. 2 upang magpa-enrol.

Ang nasabing mga Philhealth enrollees ay natukoy sa pamamagitan ng isinagawang National Household Targeting System – Proxy means test (NHTS-PMT) ng Department of Social Welfare and Development (DSWD) kung saan ilang mga enumerators din ang kumuha ng datos sa mga kabahayan.

Sa pamamagitan ng isang makina ay tinasa ang mga datos na nakalap upang matukoy nito kung sino nga ang totoong mahihirap na mga pamilyang kwalipikado upang magpaenrol sa indigent membership program ng Philhealth.

Samantala, bilang suporta naman sa programa, gumawa ang PIA Sorsogon ng canned radio plug na ipinamahagi sa mga local media dito upang maipaabot sa publiko ang hakbanging ito ng pamahalaan.

Naging katuwang naman ng Philhealth at DOH ang DILG sa pagpagalaw sa mga local chief executives upang tuluyan nang mai-enrol ang mga kwalipikadong sasapi sa kani-kanilang mga lugar, habang tumulong naman ang DepEd sa pagsagawa ng Information Education Campaign sa mga magulang sa pamamagitan ng kanilang Parent-Teachers Association upang hikayatin ang mga ito na mag-enrol at maging miyembro ng Philhealth. (Bbennie A. Recebido, PIA Sorsogon)

KINATATAKUTANG BAHA, MAKAKATULONG SA PANANIM NA PALAY

Tagalog News Release

SORSOGON PROVINCE – Ang kinatatakutang pag-uulan at pagbaha ay maaari din palang gamitin bilang teknolohiya sa taniman ng palay kung saan nakapagpapaganda ito ng ani at kayang kontrolin ang pagdami at pagsibol ng mga pesteng damo na kadalasang sakit ng ulo ng mga magsasaka.

Ito ang pinatunayan sa ginawang pananaliksik ng University of the Philippines Los Banos – International Rice Research Institute sa pangunguna nina Lucy Estioko, guro sa Bicol University; Aurora Baltazar, Florinia Merca, Abdelbagi Ismail at ni David Johnson, na sila ring may-akda ng “Submergence during germination and early growth, differentially affects growth and carbohydrate metabolism in barnyard grass and contrasting rice genotypes”.

Ang pag-aaral na ito ay nanalo bilang Best Paper na pinarangalan ng Weed Science Society of the Philippines ng Pest Management Council of the Philippines.

Ayon sa mga may-akda, sa prosesong ito, ang pagpapabaha o flooding ay ginagawa na bahagyang atrasado upang mahintay sumibol ang mga palay upang maging epektibong pangkontrol sa damo.

Tinukoy din nila ang angkop na panahon sa pagsasailalim sa flooding ng mga direct-seeded rice nang sa gayon ang kumpetisyon ay papabor sa binhi ng palay kaysa sa damo.

Ang pag-aaral na ito ay nasubok na nila sa dalawang uri ng palay – ang IR42 at ang Khao Hlan On (KHO) kasabay ng pagpapatubo ng damo. Habang nakababad, ang dalawang uri ng palay ay bahagyang nababawasan ng mga ugat at umusbong ang talbos kaysa sa damo. Ang dalawang araw matapos ang pagtatanim ang pinaka-epektibong panahon upang isailalim sa flooding kung saan dito sumibol ang binhi ng palay gayundin ay epektibong panahon upang mapigilan ang pagtaas ng mga damo.

Ito ang nagsilbing daan upang mapatunayan nilang may kakayanan din palang mabuhay ng palay kahit sa baha.

Samantala, kinatigan naman ito ng Provincial Agriculture Office dito sa Sorsogon kung saan ayon kay Acting Provincial Seed Coordinator Angel Tadle, Jr., totoong kaya pa ring tumubo at makakuha ng magandang ani ng palay sa kabila ng pagbaha.

Sa katunayan, ilang mga magsasaka na rin ang nakapagpatunay dito gamit ang NSIC-RC 194 submerge rice variety subalit nananatiling nasa trial stage pa rin ito at patuloy pang inaalam ang iba pang mga katangiang higit pang makapagpapalago ng ani ng mga magsasaka. (Bennie A. Recebido, PIA Sorsogon)

PDCC PATULOY NA NAKAALERTO SA PAGDATING NG LA NINA; MGA RESIDENTE PINAG-IINGAT

Taglog News Release

SORSOGON PROVINCE (Sept 23)– Dahilan sa sunud-sunod nang mga pag-uulan ngayon, nakaalerto ang Provincial Disaster Coordinating Council upang matiyak na hindi ito magdudulot ng higit na malalaking pinsala sa mga buhay at ari-arian ng mga residente dito.

Nananatili ang abiso ng PDCC sa mga opisyal at residente ng mga barangay na high-risk sa pagbaha at landslides na pag-ibayuhin ang pag-iingat sa lahat ng oras.

Tuloy-tuloy din ang pagbibigay nila ng kanilang technical expertise sa ginagawang mga pagsasanay sa iba’t-ibang mga barangay sa lalawigan lalo na sa mga lugar na malaki ang panganib sa baha at mga landslides.

Matatandaang sa pag-aaral ng Climate Change Congress of the Philippines (CCCP) isa ang Sorsogon sa animnapu’t-siyam na mga lalawigan sa bansa na vulnerable sa mga pagbaha at pagguho ng lupa sakaling maranasan na dito ang matinding pag-uulan o ang La Nina phenomenon.

Habang sa taya naman ng Mines and Geosciences Bureau Bicol, pitong mga bayan dito sa lalawigan ng Sorsogon ang lantad sa panganib ng pagguho ng lupa kung saan kinabibilangan ito ng mga bayan ng Bulan, Irosin, Juban, Magallanes, Matnog, Sta. Magdalena at Sorsogon City.

Subalit, binigyang-diin ng pamunuan ng MGB na bilang pag-iingat na rin, yaong mga residente sa mga lugar na hindi nabanggit ay hinihikayat pa rin na pag-ibayuhin ang pag-iingat at gawin ang kaukulang mga paghahanda sakaling ipag-utos ang paglilikas tungo sa mas ligtas na mga lugar. (Bennie A. Recebido, PIA Sorsogon)

DEPED-SOR NANINIWALANG MAPAPATAAS NG KASALUKUYANG ADMINISTRASYON ANG KALIDAD NG EDUKASYON SA BANSA

Tagalog News Release

SORSOGON PROVINCE – Nagpahayag ng tiwala si School Division Superintendent Marilyn Dimaano ng DepEd Sorsogon na masosolusyunan ng administrasyong Aquino ang mga kinakaharap na suliranin ng kanilang kagawaran gaya ng kakulangan sa aklat, mga silid-aralan at mga guro.

Ayon kay Dimaano, ang mga kakulangan nito ang nagsisilbing prime factors kung bakit patuloy na bumababa ang kalidad ng public education sa bansa.

Dagdag pa niya na sa pagbibigay prayoridad ngayon ng Pangulong Aquino sa edukasyon, naniniwala siyang may magandang bukas na naghihintay sa Kagawaran g Edukasyon sa bansa.

Tiniyak din niya sa publiko na patuloy din ang ginagawang pagsisikap ng DepEd Sorsogon upang solusyunan ang suliranin sa kalidad ng edukasyon at mapaangat ang kaalaman ng mga mag-aaral lalong-lalo na sa mga pampublikong paaralan.

Matatandaang kamakailan ay diretsahang inamin ng DepEd Sorsogon Division Office na naging bagsak ang kalidad ng edukasyon dito sa lalawigan matapos na lumabas na panghuli ang lalawigan sa buong rehiyon sa mga may magandang kalidad ng edukasyon.

Sinabi ni Dimaano na 86% lamang ang pinakamataas na gradong nakuha ng isang mag-aaral mula sa isang paaralan sa Juban sa pinakahuling national achievement examination.

Kaugnay nito, inatasan na rin niya ang mga supervisors at mga prinsipal sa buong lalawigan na bigyan ito ng higit na malaking atensyon at ituon sa pagpapaangat ng kalidad ng edukasyon ang lahat ng kanilang mga pagsisikap.

Samantala, sinabi rin niya na wala silang magagawa sakaling pormal nang ipag-utos ng Deped Central Office ang pagkakaroon ng 12-year basic education sa bansa.

Subalit, binigyang-diin din niya na sana ay masusi pang pag-aralan ito partikular ang magiging epekto nito sa lahat bago tuluyang ipatupad. (Bennie A. Recebido, PIA Sorsogon)