NGP ng pamahalaang nasyunal regular na ipinatutupad ng CENRO

Ni: Bennie A. Recebido

Lungsod ng Sorsogon, Nobyembre 11 (PIA) – Simula Oktubre ngayong taon ay regular nang ipinatutupad ng Community Environment and Natural Resources (CENRO) ang National Greening Program na isinusulong ng kasalukuyang administrasyon alinsunod sa nilagdaang Executive Order No. 26 ni Pangulong Benigno S. Aquino III.

Matatandaang sa direktiba ng Pangulong Aquino idineklara nito ang NGP bilang prayoridad na programa ng pamahalaan kung saan dapat na makapagtanim ng 1.5 bilyong puno sa 1.5 milyong ektarya ng lupa sa bansa pagdating ng 2016.

Ayon kay Community Environment and Natural Resources Officer-In-Charge Forester Crisanta Marlene P. Rodriguez, hanggang Disyembre ngayong taon ay target nilang mataniman ang 300 ektaryang lupain sa napili nilang mga lugar sa pitong mga bayan dito sa lalawigan.

Ang mga lugar na ito ay ang Lahug sa bayan ng Juban, Naburacan sa Matnog, San Roque at San Francisco sa Bulusan, Mapaso sa Irosin, Incarizan sa Magallanes at Lipata Saday sa bayan ng Bulan kung saan kabilang sa mga punong itatanim ay ang pili, narra, mahogany, gemelina at iba pang mga punong pangkagubatan.

Ginawa naman nilang NGP model site ang Brgy. Amomonting sa bayan ng Castilla dahilan sa malapit lamang ang lugar sa lungsod ng Sorsogon at mas marami din umanong mga manananim maliban pa sa mga residente ng barangay ang maari nilang imbitahang makilahok.

Ayon pa sa opisyal prayoridad nila ang mga lugar na ito dahilan sa pagkakakalbo na nito at sa dami din ng mga illegal na namumutol ng kahoy dito.

At upang matiyak umano ang paglaki ng mga puno ay nagkaroon ng pirmahan ng Memorandum of Agreement sa pagitan ng CENRO at mga barangay para sa pagmantini at proteksyon ng mga itinanim na mga puno.

Binibigyan din nila umano ang mga manananim ng isanglibo’t dalawangdaang piso (P1,200) bawat ektarya bilang bayad para sa gagawing paghahanda sa lugar at sa mga gastusin sa pagtatanim. Ang nasabing bayad ay nagmumula sa pondong itinalaga ng CENRO para sa nasabing proyekto.

Samantala, target naman ngayong araw ng CENRO at partner local government units (LGUs) nito na makapagtanim dito sa Sorsogon ng 111,111 mga puno sa inisyatiba na rin ni Sorsogon 2^nd District Congressman Deogracias B. Ramos, Jr. bilang bahagi rin ng pagpapaigting pa ng NGP.

Mga bakawan ang itatanim sa mga bayan ng Gubat, Prieto Diaz at Barcelona habang mga puno naman ng pili, mahogany at iba pang mga namumungang puno ang itatanim sa mga bayan ng Bulan, Bulusan, Matnog at Juban. (PIA Sorsogon)

Kaso ng mina sa Matnog, Sorsogon dinala na sa Korte Suprema

Ni: Bennie A. Recebido

Lungsod ng Sorsogon, Nobyembre 11 (PIA) – Tuluyan nang dinala sa Korte Suprema ng mga komokontra sa operasyon ng small-scale mining sa Balocawe, Matnog, Sorsogon ang kanilang petisyon para sa “Continuing Mandamus Damage and Attorney’s Fees with prayer for Issuance of Temporary Environment Protection Order”.

Ito ay matapos na idismis noong Oktubte 18, 2011 ang motion for reconsideration ng Civil Case No. 2011-8338 na isinampa sa sala ni Hon. Victor C. Gella, Executive at Pairing Judge ng Branch 53, Regional Trial Court 5^th Division, Sorsogon City ng mga complainant.

Matatandaang mahigpit na kinukundena ng mga environmentalist group, simbahan at ilang mga residente ang operasyon ng mina sa Balocawe, Matnog, Sorsogon sa pagsasabing may mga ginawa itong paglabag sa batas pangkalikasan lalo’t kung titingnan umano ang uri ng sistema at mga kagamitang ginagamit sa operasyon nito ay hindi ito maikukunsiderang small-scale mining.

Ayon sa mga petitioner, mayroon silang nakikitang mabibigat na mga rason upang hingin sa korete suprema ang muling pagsuri at pagbaligtad sa dismissal order ng RTC dito sa isinampa nilang petisyon. Nais din nila umanong hingin sa Korte Suprema ang totoong interpretasyon ng batas ukol sa kasong ito.

Sa kabilang dako, sinabi ni Sorsogon Governor Raul R. Lee na wala na siyang anumang gusto pang sabihin sapagkat karapatan ng mga petitioner ang paghingi ng repaso sa Korte Suprema sa naging desisyon ng lokal na korte dito.

Subalit tiniyak niya na kung ano man ang paglabag na makikita ng lokal na pamahalaan sa operasyon ng nasabing pagmimina ay agad niyang bibigyan ng kaukulang aksyon. Sinabi din niya na kung hindi kumbisido sa desisyon ng lokal na korte ang mga petitioner ay malaya silang dalhin ito sa alin mang korte sa bansa na sa tingin nila ay makapagbibigay sa kanila ng linaw at tamang desisyon.

Matatandaang si Gov. Raul Lee kasama ni Department of Environment and Natural Resources (DENR) Secretary Ramon Paje at siyam na iba pa ay kinasuhan din sa paglabag sa batas ng pagmimina kaugnay ng pagbigay permiso sa operasyon ng pagmimina sa Balocawe, Matnog. (PIA Sorsogon)

Council for the protection of children tenders accomplishment report for the third quarter

By Irma A. Guhit

SORSOGON CITY, NOVEMBER 10 (PIA)….. In the meeting of the Provincial Council for the Protection of Children (PCPC) held here yesterday at the Sorsogon Provincial Management Office (SPMO) , Myra Relativo, assistant provincial head of the Sorsogon Provincial Social Welfare and Development Office (PSWDO) tendered  the accomplishment report for the 3rd  quarter of the council to the member-agencies.

Relativo said that the just concluded Children Congress held at the Aemilianum College last October 15 was participated in by almost a hundred of children coming from the different places in the province.

The event was a rousing success where  children were provided a lecture on the ten rights of a child. They  were also formed into groups to join in the poster making contest  focusing on the theme "Local Council for the Protection of Children para sa Bright Child : Pakilusin, Palakasin, Pagtulungan Natin".

A program highlighting the different skills and talents of children in singing, dancing and drama was also well participated in where the children rendered their prepared numbers  focusing on children issues.

Three non-governmental organizations with child focused advocacies convened also at the PSWDO last month to discuss programs and projects and where each can provide areas of complementation and fund sharing in the  several activities scheduled next year Relativo explained.

Josephina  B. Deri, federation manager of FACE, a non-governmental organization that provides assistance to children spearheaded the Children’s Month celebration and was one of the accomplished activities of the council to celebrate children’s month.

Meanwhile Rico Guarino, Local Government Operations Officer V (LGOO ) of the Department of the Interior and  Local Government  (DILG) also reported that their agency will be conducting a reorientation program to local officials about the utilization of the 1% budget allocation for the council in the barangays.

Part of the PCPC accomplishment this quarter was the inter visitation conducted also in several municipalities to monitor the functionality of the Barangay Council for the Protection of Children (BCPC) with the Department of Education and  Green Valley Development Program , both members  of the council providing assistance.

Relativo also shared to the members of the council that she attended a meeting on feed backing of the implementation of the Early Childhood and Development held at Manila Hotel last Aug. 31, 2011.

The recommendation during the conference was to construct a Child Development Center here where a paid Child Development Worker will be trained and will be the regular staff of the center.

In the meeting , a team building activity was also scheduled this January to provide all the members of the council added skills in the functionality of the organization to be conducted by the Local Government Academy. (PIA-SORSOGON)

111,111 mga puno target maitanim sa Nobyembre 11, 2011

Ni: Bennie A. Recebido

Lungsod ng Sorsogon, Nobyembre 10 (PIA) – Bilang pagpapaigting pa ng National Greening Program (NGP) ng pamahalaang nasyunal sa ilalim ng administrasyon ni Pangulong Benigno Aquino III, magkakaroon ng massive tree planting activity dito kung saan target na maitanim ang 111,111 na mga puno.

Ayon kay Community Environment and Natural Resources Officer In charge Forester Crisanta Marlene P. Rodriguez, inisyatiba ito ni Sorsogon 2^nd District Congressman Deogracias B. Ramos, Jr. kung saan ang bilang ng itatanim na puno ay halaw sa numerong 11-11-11 o Nobyembre 11, 2011 na nilalayong makapagtanim ng 111,111 mga puno sa lalawigan ng Sorsogon.

Tatlong mga barangay sa bayan ng Gubat, Prieto Diaz at Barcelona ang tataniman ng mga bakawan habang mga puno naman ng pili, mahogany at iba pang mga namumungang puno ang itatanim sa anim na barangay na sakop ng mga bayan ng Bulan, Bulusan, Matnog at Juban.

Kaugnay nito, inanyayahan ni Rodriguez ang publiko na makiisa sa gagawing massive tree planting activity bukas kung saan pangungunahan ito ng CENRO, Local Government Unit at mga residente sa barangay ng mga target na lugar. (PIA Sorsogon)

‘Round-the-clock’ na suplay ng tubig sa Sorsogon City, tiniyak

Ni: Bennie A. Recebido

Lungsod ng Sorsogon, Nobyembre 10 (PIA) – Totoo sa pangako nitong bigyan ng maayos na serbisyo ang mga kunsumidor ng tubig sa lungsod, inihayag ng pamunuan ng Sorsogon City Water District (SCWD) na sinimulan na nila ang kanilang operasyon ng ‘round-the-clock water production’ noong Oktubre 15, ngayong taon.

Alinsunod sa inilabas na memorandum ni SCWD general manager Engr. Ronaldo G. Barbono, inatasan nito si SCWD production head Engr. Jonathan G. Fortades na mag-iskedyul ng dalawampu’t-apat (24) na oras na operasyon sa suplay ng tubig upang maisulong ang magandang kalidad ng tubig at maayos na serbisyo ng SCWD sa mga kunsumidor.

Matatandaang bago pa man ipalabas ang direktiba, nagkaroon na ng malawakang inspeksyon ng mga pipeline at water meter sa nasasakupan ng SCWD at lahat ng mga luma, sira at mga hindi na gumaganang mga kagamitan ay pinalitan na.

Malaking tulong din sa 24/7 operasyon ng suplay ng tubig ang pagkakalagay ng Variable Frequency Drive (VFD) sa Bibincahan Pumping Station. Ito ang ikaapat na pumping station dito na nalagyan ng VFD.

Ayon kay Fortades bago ang pagpapatupad nila nito, labing-walong oras lamang na serbisyo sa tubig ang nakakayang isuplay ng SCWD, subalit sa ngayon, maliban sa dalawampu’t-apat na oras na ang suplay nito ay nakakatiyak pa ang mga kunsumidor ng mas malinis pang suplay ng tubig dito. (PIA Sorsogon)