Wednesday, May 26, 2010

AGRICULTURAL ACTIVITIES SA SORSOGON BALIK NA SA NORMAL

Tagalog News Release

SORSOGON PROVINCE (May 26) – Sa kabila ng mainit pa ring panahon ngayon dito sa lalawigan, balik na halos sa normal ang paghahanapbuhay ng mga magsasaka at mangingisda dito matapos na maapektuhan ang kanilang hanapbuhay ng tinatawag na water stress.

Sinabi ni Provincial Agriculture Office Supervising Agriculturist Narciso Cayetano na bagama’t hindi kabilang ang lalawigan ng Sorsogon sa mga direktang apektado ng matinding tagtuyot dala ng El Niño, ilang mga bayan din dito ang naapektuhan naman ng tinatawag na water stress.

Ang water stress ay isang kondisyong nangyayari kapag higit ang pangangailangan sa tubig kaysa sa inaasahang suplay nito.

Nilinaw ni Cayetano na sa rehiyon ng Bikol, tanging ang lalawigan lamang ng Masbate ang idineklarang direktang naapektuhan ng El Niño at hindi dito kabilang ang Sorsogon.

Ipinaliwanag niya na konsideradong tinamaan ng El Niño ang isang lugar kung hindi ito nakaranas ng pag-uulan sa loob ng isa hanggang dalawang buwan.

Taliwas ito sa karanasan ng lalawigan ng Sorsogon kung saan nakaranas dito ng sunud-sunod na pag-uulan nitong mga nakalipas na buwan.(Bennie A. Recebido, PIA Sorsogon)

Tuesday, May 25, 2010

MGA TEKNOLOHIYANG PAMPANGISDAAN TINALAKAY SA DALAWANG ARAW NA FISHERIES FORA

Tagalog News Release

SORSOGON PROVINCE (May 26) – Naging matagumpay ang isinagawang Provincial Fisheries Technology Fora noong nakaraang Huwebes at Biyernes sa bayan ng Prieto Diaz, Sorsogon.

Kinapalooban ito ng pagtalakay sa iba’t-ibang mga teknolohiyang pampangisdaan na makatutulong upang maiangat ang kabuhayan ng mga mangingisda sa kabila ng nararanasang pagbabago ng temperatura hindi lamang sa Sorsogon kundi maging sa buong mundo.

Ilan sa mga teknolohiyang ito ay ang induced breeding of hito, breeding and culture of pangasius, mangrove aquaculture o aqua-silvi, abalone culture and breeding, at ang polyculture method ng alimango, grouper at tilapia sa brackish water.

Tinuruan din ang mga kalahok ng freshwater aquaculture tulad ng tilapia culture sa mga tangke at fishpond at ulang culture.

Aktibong nakilahok at naghayag ng interes ang mga Agricultural Technicians mula sa iba’t-bang mga bayan sa lalawigan pati na rin ang mga Municipal Agriculturists sa Sorsogon.

Naging panauhin at nagbigay ng mga mahahalagang mensahe sa nasabing aktibidad ang mga kinatawan mula sa Bureau of Fisheries and Aquatic Resources national at regional office na kinabibilangan nina Filipina Gojar, coordinator ng National Fisherfolks Operations Center, Ginalyn De Leon ng National Anti-Poverty Commisssion, National Fisherfolk Director Ronaldo Paglicawan at ni Chief Fisheries Extension Training Division ng BFAR Regional Office V Melchor Deramas. Naroroon din ang national at regional fisherfolk representatives bilang mga facilitators.

Ang dalawang araw na fora ay isinagawa sa bayan ng Prieto Diaz, Sorsogon bilang pagkilala na rin sa tagaroong si Romen Diones, ang nakaupong Regional Fisherfolk Director ngayong buwan ng Mayo, 2010. (Bennie A. Recebido, PIA Sorsogon)

MGA MANGINGISDA HINIKAYAT NG BFAR NA SUBUKAN ANG FISH PEN AT FISH CAGES

Tagalog News Release

SORSOGON PROVINCE (May 24) – Sa patuloy na pagbabago ng temperatura ng panahon, hinikayat ng Bureau of Fisheries and Aquatic Resources (BFAR) ang mga mangingisda na sa halip na umasa sa kapalaran ay maglagay sila ng mga hawla o kulungan upang i-culture ang mga biyaya ng dagat gaya ng isda at iba pang mga lamang-dagat.

Ayon kay Bureau of Fisheries and Aquatic Resources Director Malcolm Sarmiento, sa pamamagitan ng iba’t-ibang mga teknolohiya sa pagpapalago ng mga isda at lamang-dagat ay mas nakatitiyak ang mga mangingisda na mayroon silang kikitain sa halip na umasang sa paglalaot lamang sila makakahuli ng ikabubuhay.

Aniya ang paglalagay ng mga fish pens at fish cages ay isa umanong pamamaraan upang makaagapay sa epektong dulot ng climate change.

"Nakahanda rin kaming turuan ang mga mangingisda na palaguin ang iba’t-ibang mga marine species tulad ng abalone, sea cucumber, sea urchin at iba pang mga uri ng lamang-dagat na maaaring mabuhay kahit na pabago-bago ang klima," ayon pa sa kanya.

"Kaugnay pa nito, nagpatupad rin ang BFAR sa tulong ng mga lokal na pamahalaan ng paglalagay ng mga seaweed nurseries, mariculture zones at mariculture parks sa iba’-ibang bahagi ng bansa kung saan isa ang lalawigan ng Sorsogon sa nabiyayaan nito," dagdag pa ng opisyal.

Umaasa ang BFAR na mamamantini ng pamahalaang lokal ang tatlong mariculture zones na inilagay sa Sorsogon City, Magallanes at Matnog, Sorsogon nang sa gayon ay maprotektahan ang unti-unting pagkakaubos ng mga isda na siyang papatay din sa kabuhayan ng mga taong umaasa dito sakaling mapabayaan ito. (Bennie A. Recebido, PIA Sorsogon)