Friday, March 2, 2012

PNP-SPPO, DENR-PENRO nagpirmahan ng MOA kaugnay ng pagpapatupad ng NGP

Ni: Bennie A. Recebido

Lungsod ng Sorsogon, Marso 2 (PIA) – Kaugnay ng komprehensibong pagpapatupad ng National Greening Program (NGP) sa ilalim ng administrasyon ng Pangulong Benigno S. Aquino III, nagkaroon ng pirmahan ng Memorandum of Agreement (MOA) sa pagitan ng Department of Environment and Natural Resources Provincial Office (DENR-PENRO) sa pangunguna ni Provincial ENR Officer Forester Rene P. Camacho at ng Philippine National Police Sorsoogn Police Provincial Office (PNP-SPPO) sa pangunguna naman ni Provincial Director PSSupt John CA Jambora.

Ayon kay Police Senior Inspector Romeo M. Gallinera, hepe ng Police Community Relations at Public Information Officer (PIO) ng Sorsogon Police Provincial Office, ang pirmahan ng MOA na ginanap sa loob ng Conference Hall sa Camp Salvador Escudero, Sr. noong Miyerkules, Pebrero 29, ay kaugnay ng pagtatanim ng mga puno ng kahoy sa lalawigan ng Sorsogon alinsunod sa nakasaad sa Executive Order No. 26 o ang National Greening Program ng pamahalaan.

Nakapaloob sa MOA ang gagawing pagtutulungan ng DENR at ng PNP kung saan ang DENR ang siyang tutukoy sa mga lugar na maaaring pagtamnan ng mga kapulisan dito sa Sorsogon.

Aniya, ang malawakang pagtatanim ng mga puno ng kahoy ang isa sa mga programa ng PNP na tinaguriang “Pulis Makakalikasan: 10 Milyonng Puno, Pamana sa Kinabukasan”, kung saan ang bawat kasapi ng PNP ay dapat na makapagtanim ng anim (6) na mga puno ng kahoy buwan-buwan sa loob ng isang taon na magtatagal hanggang sa ika-28 ng Pebrero, 2013.

Pumirma rin sa MOA bilang witness sina Forester Marlene P Rodriguez, Community Environment and Natural Resources Officer (CENRO)  at ang hepe ng Police Community Relations at PIO ng SPPO. Naroroon din sa ginawang aktibidad ang iba pang mga opisyal ng SPPO sa pangunguna ni PSupt Robert AA Morico, ang Deputy Provincial Director for Administration at ang mga tauhan ng Provincial Headquarters ng Sorsogon Police Provincial Office. (SPPO/BARecebido, PIA Sorsogon)

MOA Signing on NGP implementation. PNP-SPPO Provincial Director PSSupt John CA Jambora and DENR-PENRO Forester Rene P. Camacho signs Memorandum of Agreement on the full implementation of PNP’s “Pulis Makakalikasan: 10 Milyonng Puno, Pamana sa Kinabukasan” in response to the National Greening Program (NGP) of the national government. (PO3MDEspena, SPPO/BAR, PIA Sorsogon)
MOA Signing on NGP implementation. PNP-SPPO Provincial Director PSSupt John CA Jambora and DENR-PENRO Forester Rene P. Camacho with Forester Marlene P Rodriguez, Sorsogon Provincial Community Environment and Natural Resources Officer (CENRO) during the signing of Memorandum of Agreement on PNP Sorsogon’s support to the National Greening Program, held at the Conference Hall of Camp Salvador Escudero, Sr. in Sorsogon City on February 29, 2012. (PO3MDEspena, SPPO/BAR, PIA Sorsogon)


DPWH-S1DEO kalahating porsyento nang naipatupad ang mga proyektong sinimulan noong 2011


Ni: Bennie A. Recebido

Lungsod ng Sorsogon, Marso 2 (PIA) – Mula sa isangdaang posyentong kabuuang pondong naibigay sa Department of Public Works and Highways Sorsogon 1st District Engineering Office (DPWH-S1DEO) kaugnay ng pagpapatupad ng mga proyektong pang-imprastruktura, 51.83 porsyento na nito ang aktwal na naipatupad ng tanggapan noong nakaraang taon 2011.

Ito ang inihayag ni DPWH Sorsogon 1st District Engineer Romeo Doloiras sa ipinalabas nilang ulat kamakailan. Kaugnay nito, mas marami pa umanong pondo ang ibinigay sa ngayon para sa 1st District Engineering Office.

Aniya, sa regular infra Php13.729-M ang ibinigay na alokasyon, Php20.537 sa preventive maintenance, Php138.765-M para sa DPWH lumpsum at Php194,000 para sa water supply sewerage at iba pang mga imprastruktura para sa istratehikong turismo.

Naglaan din ng pondong nagkakahalaga ng Php68.500-M para sa iba pang mga imprastruktura at proyektong ipapatupad ng S1-DEO, Php1.5-M para sa maintenance at iba pang mga gastusin sa operasyon; Php4.349-M para sa DepEd School Building program at Php70-M sa paggamit ng mga behikulo.

May alokasyon din mula sa Congressional Fund na nagkakahalaga ng Php21.050-M at Php3.350-M mula sa Partylist bilang Priority Assistance Fund.

Tiniyak naman ni Doloiras na maipatutupad ng kanyang tanggapan ang mga proyekto kung saan nakalaan ang mga pondong ito lalo na’t nais din ng kanilang tanggapan na mapakinabangan na rin sa lalong madaling panahon ang mga proyekto hindi lamang ng mga Sorsoganon kundi maging ng mga dadayo din dito sa lalawigan. (DPWH S1-DEO/BArecebido, PIA Sorsogon)




Thursday, March 1, 2012

Motorcade, Earthquake at Fire Drill tampok sa pagbubukas ng Fire Prevention Month


Ni: Bennie A. Recebido

Lungsod ng Sorsogon, Marso 1 (PIA) – Opisyal nang sinimulan kaninang umaga ang pagbubukas ng pagdiriwang ng Fire Prevention Month ngayong buwan ng Marso sa pangunguna ng Bureau of Fire Protection (BFP).

Tinampukan ito ng ginawang motorcade at pagbubusina na agad na sinundan ng paglalagay ng mga streamers at pamamahagi ng mga leaflet at flyers upang mapatibay pa ang kamalayan ng publiko ukol sa pagiging alerto sa pag-iwas sa maaaring pagmulan ng sunog at trahedya.

Pangungunahan din ng BFP ang gagawing 2012 1st Quarter Simultaneous Earthquake at Fire Drill kung saan alas nuebe ng umaga ang earthquake drill habang alas dos naman ng nakatakda ang fire drill sa pakikipagtulungan sa Department of Education (DepEd).

Ayon kay Provincial Fire Marshall Achilles Santiago, maliban sa mga pambungad na aktibidad na ito ay magsasagawa din sila ng tuloy-tuloy na pag-iinspeksyon ng mga fire hydrants at mga pasilidad pangkaligtasan ng establisimyento at mga boarding house sa lalawigan. Nakatakda ring magsagawa ang BFP ng feeding program, tree planting activity, clean-up drive, blood letting activity at fire truck visibility. Tuloy-tuloy din umano ang pamamahagi nila ng mga Information, Education and Communication (IEC) material sa mga paaralan at komunidad.

Magkakaroon din ng Open House sa Marso 9, 2012 kung saan iimbitahan ang mga mag-aaral sa elementarya sa lungsod ng Sorsogon upang makita nila ang gamit ng mga bumbero at maipaliwanang sa mga ito ang papel na ginagampanan, tungkulin at kahalagahan ng BFP.

Samantala, nanawagan pa rin si Santiago sa mga may-ari ng establisimyento at mga boarding house dito lalo yaong hanggang ngayon ay hindi pa rin nakakasunod sa itinakda nilang fire safety requirement sa ilalim ng Fire Code Law na punan na ito sa lalong madaling panahon upang hindi na malagay pa sa peligro ang kanilang mga ari-arian. Aniya, kadalasan nang ang paggamit ng mga sub-standard na mga outlet at pag-ooverload nito ang nagiging sanhi ng mga nairerehistrong sunog.

Matatandaan namang mahigpit ang panawagan ni Department of Interior and Local Government Secretary Jesse M. Robredo sa BFP na paigtingin pa ang kanilang kampanya ukol sa pag-iwas sa sunog at hikayatin ang publiko na suportahan sila sa kanilang kampanya.

Ang pagdiriwang ng Fire Prevention Month ay alinsunod sa Presidential Decree No. 115-A na nilagdaan noong 1967 ni dating Pangulong Ferdinand Marcos. (BARecebido, PIA Sorsogon)