Friday, October 14, 2011

Skills Registry System ng DOLE inaasahang maipatutupad ngayong Oktubre


Ni: Bennie A. Recebido

Lungsod ng Sorsogon, Oktubre 14 (PIA) – Positibo ang Department of Labor and Employment (DOLE) Sorsogon na maipatutupad na ng tuluyan ang Skills Registry System (SRS) bago matapos ang buwan ng Oktubre ngayong taon.

Ayon kay DOLE Sorsoogn Field Officer Imelda Romanillos, hinihintay na lamang nila na mapirmahan ng pamahalaang lungsod ng Sorsogon ang Memorandum of Agreement sa pagitan ng DOLE at ng pmahalaang lokal ng lungsod ng Sorsogon upang maisakatuparan na ang full implementation ng SRS.

Matatandaang hinhikayat ng mga opisyal ng DOLE ang lahat ng mga local Government Unit (LGU) na iparehistro ang knailang mga nasasakupan sa ipinatutupad na Skills Registry System ng pamahalaan upang matulungan ang mga ito na madaling makahanap ng trabaho.

Ang sistemang ito ay dati nang ipinakilala ng DOLE sa probinsya ng Sorsogon partikular sa bayan ng Pilar at lungsod ng Sorsogon.

Ayon kay Romanillos sa pamamagitan ng SRS, matutulungang malutas ang suliranin sa skills-job mismatch at mapapaganda pa nito ang kalidad ng trabaho sa bansa at magiging mas produktibo at globally competitive pa ang mga Pilipino.

Mahihikayat din umano nito ang mga imbestor na maglagay ng mga negosyo sa mga lugar kung saan may mga manggagawang makatutugon sa kasanayang hinahanap nila.

Ang SRS ay konektado sa PhilJobnet, ang online job portal ng pamahalaan na madalas binibisita ng mga naghahanap ng trabaho, recruitment agencies at maging ng lokal at dayuhang may-ari ng mga negosyo.

Sinabi ni Romanillos na mabibigyan nila ng katiyakan ang mga aplikante na matutulungan nila ang mgaito sa paghahanap nila ng trabaho.

Ang SRS ay bahagi ng pagsisikap ng DOLE na makabuo ng ‘integrated data of labor information’ katuwang ang Bureau of Local Employment (BLE), Philippine Overseas Employment Administration (POEA), Technical Education and Skills Development Authority (TESDA), Professional Regulation Commission (PRC), Maritime Training Councils (MTC) at National Maritime Polytechnic (NMP). (PIA Sorsogon)



Bulusan Lake Resort higit pang pagagandahin


Ni: Bennie A. Recebido

Lungsod ng Sorsogon, Oktubre 14 (PIA) – Inihayag ni Bulusan Mayor Michael Guysayko na makakatanggap sila ng sampung milyong piso mula sa Department of Tourism para sa pagpapapaganda pa ng mga pasilidad sa Bulusan Lake resort.

Ayon kay Mayor Guysayko, nagpadala na ng mga arkitekto at iba pang mga tauhang teknikal upang tingnan at pag-aralan kung ano pang mga proyekto ang maaaring gawin para dito.

Sinabi ng alkalde na kung siya umano ang tatanungin mas irerekomenda niya ang pagsasaayos ng mga linya ng kuryente doon nang sa gayon ay makapaglagay sa nasabing lugar ng pasilidad para sa maayos na suplay ng tubig.

Dagdag din niya na kung kakayanin pa ng pondo, nais din umano nilang makabili ng mga water bikes bilang dagdag na pasilidad maliban sa mga kayak na sa ngayon ay ginagamit na ng mga dumadayong bisita sa Bulusan Lake.

Positibo si Mayor Guysayko na sa pamamagitan nito ay mapapasigla pa ang turismo sa Bulusan sapagkat hindi lamang umano nakatuon sa iisang uri ng pasilidad ang makikita at mararanasan ng mga turista maliban pa sa magkakaroon din sila ng mas maginhawang pananahan sa ipinagmamalaking Bulusan Lake ng Sorsogon. (jag/PIA Sorsogon)

Thursday, October 13, 2011

Oktubre 17 deklaradong special non-working holiday sa Sorsogon


Ni: Bennie A. Recebido

Lungsod ng Sorsogon, Oktubre 13 (PIA) – Idineklarang non-special working holiday ng Pamahalaang Lokal ng Lalawigan ng Sorsogon ang araw ng Lunes Okrubre 17, 2011 bilang paggunita sa ika-isangdaan labing-pitong taong pagkakatatag ng Sorsogon bilang hiwalay na lalawigan sa Albay.

Sa bisa ng ipinalabas na Executive order No. 013 series of 2011 ni Sorsogon Governor Raul Lee, idineklarang walang pasok ang mga paaralan at lahat ng tanggapan sa lalawigan ng Sorsogon upang bigyang-daan din ang mga ito na makalahok sa mga gagawing aktibidad sa araw na ito.

Matatandaang nakasaad sa mandato ng Republic Act 7380 na bawat taon ay magiging special holiday ang Oktubre 17 upang maipagdiriwang ang kasarinlan ng Sorsogon.

Kabilang sa mga tampok na aktibidad sa Lunes, Oktubre 17, ay ang Historico-Cultural Parade na lalahukan ng iba’t-ibang mga festival ng labing-apat na bayan at isang lungsod ng Sorsogon. Inaabangan na rin ngayon ang gagawing parada ng Ms. “K” Festival Costume na gagawin sa Balogo Sports Complex.

Samantala, idinaos ang kauna-unahang Kasanggayahan Festival noong 1974 sa ilalim ng panunungkulan ni dating Gobernador Juan G. Frivaldo, pansamantalang natigil at muling binuhay noong 1994 kaalinsabay ng selebrasyon ng sentenaryo ng lalawigan ng Sorsogon at nagpapatuloy hanggang sa ngayon. (PIA Sorsogon)







Susi sa tagumpay ng SSC engineering passers ibinahagi


Ni: Bennie A. Recebido

Lungsod ng Sorsogon, Oktubre 13 (PIA) – Paghamon at tamang pagganyak ang susi ng Sorsogon State College (SSC) upang maging topnotcher and kanilang mga engineering board passers.

Ito ang ipinahayag ni Lito Orticio, Engineering Department Faculty ng SSC sa panayam ditto kamakailan. Ayon sa kanya, ‘challenge’ at motivation’ sa mga mag-aaral ang pinanghahawakan nilang susi sa tibay at tagumpay ng kanilang mga engineering board passers.

Ayon pa kay Orticio, malaking tulong din ang ginawa nilang exposure sa kanilang mga mag-aaral kung saan sa unang taon pa lamang nito sa SSC ay hinahasa na nila ang ito bilang kalahok at panalo sa mga local at national competition.

Maliban din sa suporta ng mga magulang hindi rin umano matatawaran ang determinasyon ng mga mag-aaral na hindi lamang basta maipasa ang board exam kundi maungusan pa ang ibang mga board examinees.

Matatandaang sunud-sunod na taon nang maliban sa mataas ang passing rate ng SSC sa engineering board examination ay nasusungkit pa nila ang first hanggang 10th placer sa engineering board exam. Pinakahuli ngayon ang Mechanical Engineering Board Examination kung saan mula sa 1,546 examinees ay nakuha ni Engr. Joseph Ramirez Gredoña ang top place na may katumbas na passing grade na 92.70% at ni Engr. Daniel Espinar Forteza ang 2nd place na may katumbas namang 92.65%.

Maliban sa dalawang ito ay 16 pang mga mag-aaral mula sa SSC ang ngayon ay rehistrado na bilang mechanical engineer sa bansa. Ang mataas na naabot na ito ng kanilang engineering department umano ang magsisilbing hamon sa kanila upang pagbutihin at pagtibayan pa ang kanilang ginagawa.

Samantala, kinilala din ng Sangguniang Panlalawigan ang galing na ipinakita ng mga mag-aaral sa SSC partikular ng dalawang nnaguna sa Mechanical Engineering Board Exam ngayong taon. Ayon kay Board Member Benito Doma, dapat lamang na mabigyan ng pagkilala ang mga mag-aaral na ito sapagkat maliban sa nagdala ang mga ito ng karangalan sa Sorosogon, inspirasyon din ang mga ito sa mga mag-aaral at patunay na walang imposible sa mga taong nagsisikap. Kaugnay nito nakatakda ring bigyan ang dalawang topnotchers ng P20,000 bilang insentibo sa ipinakitang tibay ng mga ito.

Maliban dito ay nakatanggap din ng tig-dalawampung libong piso si Gredoña at Forteza mula naman sa SSC bilang pagkalilala rin sa galling na ipinakita ng mga ito. (PIA Sorsogon)

Wednesday, October 12, 2011

Broadcasters’ Awards of Excellence sa Sorsogon naging matagumpay


Ni: Bennie A. Recebido

Lungsod ng Sorsogon, Oktubre 12 (PIA) – Pormal subalit naging makulay at matagumpay ang kauna-unahang Sorsogon Broadcasters’ Awards of Excellence na ginawa dito kagabi sa pangunguna ng Kapisanan ng mga Broadcaster sa Pilipinas (KBP) Sorsogon Chapter.

Pinakamaraming nakuhang parangal sa radyo kasama ang individual category ay ang DZGN–FM ng God News Foundation kung saan nakaipon ito ng labing-apat na parangal, anim naman ang naipon ng DZMS–AM ng Philippine Broadcasting Network habang tig-isa naman sa DZRS–AM ng Radyo Serbisyo Network at DWOL–FM .

Kapwa naman nakatanggap ng tig-anim na parangal ang DWCB TV 11 ng Good News Foundation at AITV5 ng Aemilianum Broadcasting Network.

Nahirang naman bilang Best Public Service Program sa radyo at television ang Sararo Sarabay ng Sorsogon City–LGU. Ang Best Public Service Program ay ekslusibong kategorya para sa mga blocktime program ng pamahalaan.

Nakatanggap ng plake ng komendasyon ang lahat ng mga nanalo habang nakatanggap naman ng karagdagang gift certificate, special package at cash award ang ilang mga piling parangal tulad ng Best Educational Program Host na nakuha ni Dra. Liduvina Dorion ng DZGN-FM, Best Radio Personality of the Year na nakuha ni Vincent “Spy 22” Loreno ng DZRS-AM at Best TV Personality of the Year na nakuha naman ni Fr. Abe Arganiosa ng AITV5.

Napiling Best AM station ang DZMS, Best FM station ang DWOL, Best TV station ang AITV5 habang tinanghal namang Broadcaster of the Year si KBP Sorsogon Chapter President at DZMS station manager Andy Espinar.

Binigyan din ng Posthumous Excellence Award for Broadcast si Jorge Arcilla, ang nagtatag ng DWOL- FM at Lifetime Award of Excellence si Bishop Emiritus Jesus Y. Varela, ang nasa likod ng pagpalaganap ng Catholic Mass Media sa Sorsogon.

Samantala, sa mensahe ni KBP Sorsogon Chapter President Andy Espinar, sinabi nitong naging inspirasyon nila ang ‘Public-Private Partnership: Going Beyond’ na tema ng Kasanggayahan Festival ngayong taon kung kaya’t naisakatuparan ang kauna-unahang Broadcasters’ Awards of Excellence.

Pinuri naman ni Sorsoganon Kita, Inc. President Mitch Sulit ang hakbang na ginawa ng KBP kung saan maihahanay na din umano ito sa marami nang mga kauna-unahang nagawa sa lalawigan ng Sorsogon. Umaasa din silang magtutuloy-tuloy pa ang aktibidad na ito hanggang sa mga susunod na taon upang higit na mapataas pa ang kalidad ng serbisyo publiko ng mga mamamahayag sa radio at telebisyon sa lalawigan ng Sorsogon. (PIA Sorsogon)