Friday, November 23, 2012

Ikatlong anibersaryo ng Maguindanao Massacre ginugunita



Ni: Bennie A. Recebido

LUNGSOD NG SORSOGON, Nobyembre 23 (PIA) – Nakikiisa ang mga lokal na media dito kaugnay ng paggunita ng ikatlong taong anibersaryo ng Maguindanao Massacre kung saan hindi bababa sa 57 katao ang pinatay kasama ang hindi rin bababa sa 32 na mga mamamahayag mula sa iba’t-ibang mga istasyon ng media.

Ngayong umaga ay sabay-sabay na naririnig sa mga istasyon ng radyo sa Sorsogon ang talakayan ukol sa pinakahuling kaganapan kaugnay ng paglilitis sa kaso at iba pang mga isyu ukol sa malayang pamamahayag.

Ayon kay Bobby Labalan, presidente ng National Union of Journalists of the Philippines (NUJP), alas-kwatro ng hapon mamaya ay magkakaroon ng programa sa Capitol Park na susundan ng Multi-sectoral Torch Parade mula at pabalik sa Capitol ground.

Magtatapos ang aktibidad sa pamamagitan ng pagsisindi ng mga kandila sa kaparehong lugar.

Ang Maguindanao massacre na tinawag ding Ampatuan Massacre, hango sa isang lugar sa lalawigan ng Maguindanao kung saan naganap ang kakila-kilabot na pagpaslang ay naganap noong ika-23 ng Nobyembre taong 2009.

Matatandaang habang binabaybay ng mga biktima ang daan patungo sa tanggapan ng Comelec upang magsumite ng Certificate of Candidacy para kay Esmael Mangudadatu, bise alkalde ng bayan ng Buluan, ay kinidnap ang mga ito at brutal na pinagpapaslang.

Kabilang sa mga napaslang ay ang asawa ng Mangudadatu at kanyang dalawang kapatid na babae, mga mamamahayag, abogado, alalay at ilang motoristang napagkamalang kasama sa convoy. Politika ang dahilan ng madugong pangyayari.

Ang nasabing krimeng naganap ay tinawag ng Committee to protect Journalists (CPJ) bilang nag-iisang karumal-dumal na pangyayari sa kasaysayan ng mga mamamahayag simula noong 1992 kung saan sinimulan nila ang pagtatago ng mga rekord ng pinapatay na mga mamamahayag kung kayat ibinilang ng CPJ ang Pilipinas bilang pumapangalawa sa Israel sa pinakamapanganib na bansa para sa mga mamamahayag. (BARecebido, PIA Sorsogon)

Thursday, November 22, 2012

Lupang Hinirang Kit ipamamahagi sa Sorsogon



Ni: Bennie A. Recebido

(Foto search Stock Image; RF Royalty Free)
LUNGSOD NG SORSOGON, Nobyembre 22 (PIA) – Namahagi ngayon ng Lupang Hinirang Kit ang Dr. Salvador H. Escudero III Foundation sa pangunguna ng maybahay ng yumaong 1st district congressman ng Sorsogon Hon. Salvador “Sonny” H. Escudero III na si Nanay Evie Escudero.

Alas-nueve ng umaga kanina naganap ang turn-over ceremony ng mga Lupang Hinirang Kit para sa mga paaralan sa lungsod ng Sorsogon. Ang turn-over ceremony ay ginanap sa DepEd Multi-purpose Hall sa Brgy. Cabid-an, Sorsogon City kung saan tinanggap ang nasabing mga kit ni City Schools Division Superintendent Socorro V. Dela Rosa.

Mamayang hapon ay igagawad naman ang kahalintulad na kit sa Rotary Club of Metro Sorsogon (RCMS) sa Bacon East Central School, Bacon District, Sorsogon City kung saan tatanggapin ito ni RCMS president Dr. Dennis Donor.

Ang nasabing Lupang Hinirang kit ay naglalaman ng CD ng tamang awit at tugtog ng Lupang Hinirang na orihinal na komposisyon ni Julian Felipe, kopya ng Republic Act 8491 o mas kilala bilang Flag and Heraldic Code of the Philippines, kopya ng Basic Values Manual at Philippine Flag.

Matatandaang ang namayapang si Congressman Sonny Escudero ay isang masugid na tagapagsulong ng tamang pag-awit ng Lupang Hinirang at siya ring may akda ng National Flag Law.

Alinsunod sa itinatakda ng section 37 ng RA 8491, ang pag-awit ng pambansang awit, pinatutugtog man o kinakanta, ay dapat na naaayon sa pagkakaayos at komposisyon ni Julian Felipe.

Habang ang section 20 naman nito ay nagsasaad na ang seremonya sa pagtataas ng watawat ng pilipinas sa mga opisyal o sibikong pagtitipon ay dapat na simple at may paggalang, at dapat na patugtugin o kantahin sa orihinal na lirikong Filipino at pamartsang ritmo.

Nakassad din sa RA 8491 na ang sinumang lalabag dito ay maaaring patawan ng penalidad na nagkakahalaga ng hindi bababa sa P20,000 o pagkakakulong ng hindi lalagpas sa isang taon. (BARecebido, PIA Sorsogon)


PNP Sorsogon conducted symposium on Drug Abuse prevention and Control


Photo courtesy of SPPO

By: Bennie A. Recebido

SORSOGON CITY, November 20 (PIA) – Fifty (50) third year and fourth year students of the Annunciation College of Bacon Sorsogon Unit in Brgy. Bibincahan, Sorsogon City were oriented on the evils of drug abuse and the basics of its prevention and control.

According to Women and Children Protection Desk Police Inspector Jennifer Pertez of Sorsogon Police Provincial Office (SPPO), the said symposium on drug abuse prevention and control was organized by the SPPO on November 16, 2012 at the same school in connection with the observance of the Drug Abuse Prevention and Control Week. 

Pertez said that the activity they conducted aimed at increasing the awareness of the community about the unfavorable effects of illegal drugs on the health of every individual.

Police Chief Inspector Nonito F. Marquez, Police Community Relations Officer of the SPPO, meanwhile, discussed the effects of drug abuse to drug dependents. He gave emphasis on the harmful effects of drug abuse and likewise promoted healthy lifestyle among the young people.

Drug Abuse and Control Week is celebrated every third week of November pursuant to Presidential Proclamation No. 124.

This year’s Drug Abuse Prevention and Control Week is November 11-17, 2012 with the theme “Kalusugan ay Kayamanan, Droga ay Iwasan”.  (BARecebido, PIA Sorsogon/SPPO))


Wednesday, November 21, 2012

Kandidato sa pagka-alkalde ng Sorsogon City nagkaroon ng substitution



Ni: Bennie A. Recebido

photo source: smolec.pl
LUNGSOD NG SORSOGON, Nobyembre 21 (PIA) – Isang press conference ang ipinatawag ni dating gobernador at dating City Mayor ng Sorsogon Sally A. Lee ngayong umaga kaugnay ng ginawang substitution para sa tatakbong kandidatong Mayor ng Sorsogon City sa ilalim ng partidong United Nationalist Alliance (UNA).

Pinalitan ni Sally Ante-Lee ang anak nitong si Christine Lee-Balita na una nang nagsumite ng kanyang Certificate of Candidacy para sa posisyong city mayor sa darating na 2013 midterm election.

Si Sally Lee at Christine Lee-Balita ay kapwa nasa ilalim ng partidong UNA.

Ayon sa mga Sorsoganon, magiging mainit ang labanan ng magkabilang panig lalo pa’t one-on-one ang magiging labanan ni Sally Lee kay incumbent City Mayor Leovic Dioneda. Si Dioneda ay nasa ilalim naman ng partidong Nationalist People’s Coalition (NPC).

Si Sally Lee ay ang kauna-unahang naging city mayor mula nang maging lungsod ang Sorsogon noong taong 2000 at naging kauna-unahang babaeng gobernador ng lalawigan ng Sorsogon noong 2007. Siya rin ang asawa ng kasalukuyang gobernador ng Sorsogon na si Governor Raul R. Lee. (BARecebido, PIA Sorsogon)



Comelec nilinaw ang ilang isyu ukol sa substitution o pagpapalit ng tatakbong kandidato



Ni: Bennie A. Recebido

LUNGSOD NG SORSOGON, Nobyembre 21 (PIA) – Nilinaw ni Sorsogon City Election Supervisor Atty. Ryan Filgueras ang ilang isyu ukol sa substitution o pagpapalit ng mga kakandidato para sa halalan sa darating na 2013.

Ayon kay Atty. Filgueras, hindi maaaring mag-substitute ang isang taong una nang nagsumite ng Certificate of Candidacy (CoC) upang tumakbo para sa isang partikular na posisyon para sa isang kandidato na ma-withdraw ng kanyang kandidatura.

Sinabi ng opisyal na papayagan lamang ng tanggapan ng Comelec na makapag-substitute ang isang tao na may dalang Certificate of Nomination and Acceptance mula sa kinabibilangan na partido habang hindi naman maaaring mapalitan ang isang indibidwal na independent candidate.

Binigyang-diin ni Atty Filgueras na hanggang sa ika-21 ng Disyembre na lamang tatanggap ng withdrawal ang Comelec upang hindi malagay sa alanganin ang gagawing pag-iimprenta ng mga balota.

Samantala, wala naman umanong idineklarang nuisance candidates sa lalawigan ng Sorsogon.

Ito ang naging pahayag ni Comelec Sorsogon Election Supervisor Atty Calixto Aquino dahilan sa wala umano silang natanggap na anumang reklamo patungkol sa sinuman sa nagsumite ng kanilang Certificate of Candidacy sa Sorsogon. 

Dahilan dito ay maari na nila umanong simulang i-configure ang pinal na balota sa darating na ika-2 ng Enero sa susunod na taon para sa darating na halalan sa Mayo 2013.

Wala din umanong pagbabagong inaanunsyo ang Comelec para sa iskedyul ng pagpapalit ng kandidatong tatakbo sa eleksyon sa 2013 at nananatili umanong sa Disyembre 21, 2012 ang huling araw ng substitution. (BARecebido, PIA Sorsogon)