Thursday, June 21, 2012

Tree Planting o Arbor Day ipagdiriwang sa Hunyo 25


Ni: Bennie A. Recebido

LUNGSOD NG SORSOGON, Hunyo 21 (PIA) – Sa darating na ika-25 ng Hunyo ay ipagdiriwang sa bansa ang Arbor Day o ang tinatawag na Tree Planting Day alinsunod sa Presidential Proclamation No. 643 na may petsang Hunyo 9, 2004.

Kaugnay nito, nagpalabas ng memorandum Circular No. 2012 – 70 ang Department of Interior and Local Government (DILG) kung saan inatasan nito ang lahat ng mga gobernador, alkalde ng mga lungsod at bayan, provincial, City at Municipal Chapter President ng mga Liga ng mga Barangay, mga punong barangay at regional governor ng Auronomous Region in Muslim Mindanao (ARMM) na ipagdiwang ang Arbor Day ngayong taon.

Ang hakbang na ito ay alinsunod din sa Executive Order No. 26 ni Pangulong Benigno S. Aquino III na nilagdaan niya noong ika-11 ng Pebrero na nag-aatas sa mahigpit na pagpapatupad ng National Greening Program (NGP) bilang pangunahing prayoridad ng pamahalaan.

Sa Sorsogon, nakatakdang magsagawa ang Department of Environment and Natural Resources (DENR) Ofice, Community ENRO at Provincial ENRO kasama ang lokal na pamahalaan ng Gubat at mga lokal na residente sa Brgy. Ariman sa bayan ng Gubat, Sorsogon.

Ayon kay Anabelle Barquilla, forester ng DENR Sorsogon, dati na umano nila itong project site sa greening program nila noon at nais nilang hindi lamang mapalitan ng mga panibago ang mga nangamatay na nilang pananim kundi madagdagan pa ito.

Aabot sa 500 agoho seedlings ang nakatakda nilang itanim sa araw ng pagdiriwang ng Arbor Day sa Lunes.

Dagdag pa ni Barquilla na sabay-sabay ding magsasagawa ng tree planting activity ang iba’t-ibang mga Local Government Units sa Sorsogon sa kani-kanilang mga napiling lugar na pagtatamnan. (BARecebido, PIA Sorsogon)







Provincial Eagle Quiz nakatakdang gawin ngayon; DENR at PENRO abala sa iba pang mga aktibidad sa Environment Month


Ni: Bennie A. Recebido

LUNGSOD NG SORSOGON, Hunyo 21 (PIA) – Sa pagtutulungan ng Department of Environment and Natural Resources (DENR) at ng Provincial Environment and Natural Resources Office (PENRO) at mga katuwang na organisasyon nito, ilang mga aktibidad pa ang nakatakdang gawin dito kaugnay pa rin ng pagdiriwang ng Environment Month.

Ayon kay Anabelle Barquilla, forester ng Department of Environment and Natural Resources Sorsogon at siyang tagapamanihala ng mga aktibidad, nakatakdang gawin ngayong araw ang taunang Provincial Eagle Quiz na lalahukan ng mga piling mag-aaral sa elementarya sa umaga at sekundarya naman sa hapon.

Ang mananalo dito ang siyang ilalaban sa Regional Battle of Eagles sa darating na Hunyo na gagawin naman sa lalawigan ng Albay.

Sa Hunyo 25 ay ipagdiriwang din ang Arbor Day o Tree Planting Day kung saan nakatakda ring magsagawa ng massive tree planting ang mga tauhan ng DENR, PENRO at Community ENRO kasabay din ang iba’t-ibang mga lokal na pamahalaan dito.

Ang pagtatapos ng selebrayon ng Environment Month ay tatampukan naman ng paggawad ng pagkilala sa mga mananalo sa Saringgaya Awards na kinonsepto ng DENR Bicol sa loob ng halos ay 12 taon.

Samantala, matatandaang noong nakaraang Hunyo 5, 2012 ay ipinagdiwang ang World Environment Day sa ilalim ng temang “Green Economy: Does it include you?” na siya na ring ginawang tema para sa selebrasyon ng Environment Month sa buong buwan ng Hunyo ngayong taon.

Sa ginawang pagdiriwang ng World Environment Day ay nagsagawa dito ng tree planting activity at pagpapakawala ng isang uri ng wild at endangered animal sa kagubatang sakop ng Energy Development Corporation (EDC) sa Sorsogon.

Inilunsad din ang “Gawad Gobernador sa Kapaligiran”, isang patimpalak para sa mga Local Government Unit sa Sorsogon na may angking kagalingan at natatanging programa sa pagpapatupad ng malinis at berdeng kapaligiran.

Ang pagdiriwang ng Environment Month ay nakapaloob sa Presidential proclamation No. 237 na nilagdaan noong 1988. Layunin nitong pataasin pa ang kaalaman ng publiko ukol sa panganagalaga at pagbibigay-proteksyon sa mga natural na yaman ng kapaligiran. (BARecebido, PIA Sorsogon)


Wednesday, June 20, 2012

Libreng kagamitan sa pag-aaral ipinamahagi sa mga elementary pupils sa Casiguran


LUNGSOD NG SORSOGON, Hunyo 20 (PIA) – Labis ang naging kagalakan hindi lamang ng mga mag-aaral kundi maging ng mga magulang ng dalawang-daan apatnapu’t dalawang mag-aaral sa elementarya sa bayan ng Casiguran, Sorsogon na nabiyayaan ng libreng mga kagamitan sa pag-aaral.

Mga Grade 1 hanggang Grade 4 mula sa tatlong barangay sa bayan ng Casiguran na kinabibilangan ng Brgy. Tulay, Central at San Antonio ang nabigyan ng libreng gamit sa pag-aaral tulad ng lapis, papel, kwaderno at iba pang gamit sa kabutihang-loob ng grupong Karunungan, Kabuhayan at Kalikasan para sa Kinabukasan (KKK).

Ang pamamahagi ng mga libreng kagamitan sa pag-aaral ay base sa inisyatiba ni Casiguran Municipal Councilor Alfonso Escudero kung saan ibinigay ito sa mga mag-aaral isang linggo bago ang aktwal na pagbubukas ng klase.

Ayon kay Councilor Escudero, pinili nila yaong mga mag-aaral na kabilang sa mga mahihirap na pamilya nang sa gayon ay mabigyang-inspirasyon ang mga ito na hindi maaaring mahadlangan ng kahirapan ang pagkamit ng edukasyon.

Sa isinagawang maikling programa bago ang pamamahagi ng mga kagamitan, sinabi ni Councilor Escudero na inilunsad ng KKK ang ganitong proyekto sa iba’t-ibang mga lugar sa Casiguran mula pa noong taong 2008 sa tulong ng mga pribadong indibidwal. Subalit sa taong ito umano ay pawang mga Casiguranong nagtatrabaho o naninirahan na sa ibayong dagat ang pangunahing sumuporta sa proyekto kabilang na si Ginang Yolanda de Leon-O Kelly at Franchie de Leon na kapwa nakabase sa Amerika at si Bonifacio Belazon mula naman sa Riyadh, Saudi Arabia.

Aniya, nais niyang maipagpatuloy pa ang ganitong proyekto sa kanilang bayan kung kaya’t nanawagan din ito sa mga Casiguranon na na nasa ibang bansa na tulungan ang KKK sa mga programang pang-komunidad na kanilang ilulunsad upang higit na makatulong at mapahalagahan ang edukasyon ng mga kabataan.

Layunin din ng KKK sa pamumuno ni Councilor Escudero na isulong ang mga adbokasiyang pang-edukasyon, pangkabuhayan at pagmamahal sa Inang Kalikasan tungo sa minimithing maunlad at masaganag pamayanan.

Samantala, buong puso namang nagpasalamat ang mga opisyal ng tatlong barangay, mga magulang at maging ng mga mag-aaral na nabiyayaan ng nasabing mga kagamitan kalakip ang pangakong susuporta sila sa mga adhikain at mga kapakipakinabang na mga programang isasagawa pa ng grupong KKK sa susunod na mga taon. (BARecebido, PIA Sorsoogn/JHicap)

Tuesday, June 19, 2012

Mga bilanggong nakalabas na ng SPJ umaabot sa 174


Ni: Bennie A. Recebido

LUNGSOD NG SORSOGON, Hunyo 19 (PIA) – Umaabot sa 174 na mga bilanggo ang nakalabas na sa Sorsogon Provincial Jail (SPJ) simula Enero 2011 hanggang noong Abril ngayong taon ayon sa ipinalabas na tala ng SPJ sa pamumuno ni Officer In Charge Jail Warden Ret. Gen. Rufino Escote.

Sa nasabing tala, nakasaad dito na sampu sa kabuuang bilang na 174 ang pinagdusahan na ang kanilang sentensya, dalawampu’t dalawa ang nailipat na sa National Bilibid Prison sa Muntinlupa, isa ang nabigyan ng parole, tatlo ang nasa probation, labintatlo ang nasa recognizance na ang ibig sabihin ay inalis na ang bilanggo sa ilalim ng kustodya ng jail warden, walo ang napawalang-sala, labing-apat ang ‘dismissed with prejudice’ na ibig sabihin ay permanente nang nadismiss ang kaso, apatnapu’t-apat ang ‘dismissed without prejudice’ na ang ibig ay nadismiss ang kaso dahilan sa naisampa ito sa maling korte, habang isa ang hindi na itinuloy pa ng complainant ang kaso.

Dalawa naman ang nakalabas na matapos aprubahan ang kanilang aplikasyon ng Article 29 ng Revised Penal Code, tatlo ang inilipat sa Bureau of Jail Management and Penology District Jail, limampu’t-isa ang nakapagpiyansa at dalawa ang nakalaya base sa ibinigay na kautusan ng korte.

Sa isangdaan pitumpu’t-isang mga nakalaya na bilanggo, isangdaan labing-isa sa mga ito ay kunsiderado nang malinis at wala nang kaso sa batas.

Ang mga bilanggong kasama sa iprinisintang bilang ay nakagawa ng mga paglabag sa batas simula taong 1992 hanggang sa kasalukuyang taon.

Sa ngayon, may 417 pang mga nakaditineng bilanggo sa loob ng Sorsogon Provincial Jail.

Ayon kay Jail Warden Rufino Escote, pinagsisikapan nilang mas mapabilis ang paglilitis ng mga bilanggo sa SPJ nang sa gayon ay maiwasan ang pagkakaditine ng matagal ng mga ito sa loob ng bilangguan at maiwasan din ang siksikan sa loob ng mga selda.

Patuloy din ang ginagawang pagpapaunlad ng kakayahan, edukasyon at talento ng mga bilanggo kahit nasa loob ito ng selda nang sa gayon ay may magamit na puhunan ang mga ito para sa kanilang pagbabagong-buhay sakaling makalabas na sila ng bilangguan. (BARecebido, PIA Sorsogon)


Monday, June 18, 2012

Provincial MSAC inorganisa ng Civil Service Commission Sorsogon


Ni: Bennie A. Recebido

LUNGSOD NG SORSOGON, Hunyo 18 (PIA) – Upang higit pang maging epektibo ang serbisyong ibinibigay ng Civil Service Commission (CSC) sa Sorsogon, binuo ng CSC noong Huwebes ang isang Multi-Sectoral Advisory Council (MSAC) na siyang aaktong tagapayo at magbibigay ng mga rekomendasyong makakatulong sa pagpapahusay pa ng operasyon at pagbibigay ng makabuluhang serbisyo ng CSC sa lalawigan.

Ayon kay CSC regional director Cecilia R. Nieto, naniniwala ang kanilang ahensya sa kahalagahan ng pakikipag-alyansa kung kaya’t binuo nila ang MSAC hindi lamang sa Sorsogon kundi maging sa iba pang mga lalawigan sa rehiyon upang maging katuwang nila sa pagkamit ng mataas na performance level na siyang target ng CSC, lalo pa’t pangarap ng Civil Service Commission na maging “Asia’s leading Center for Excellence in Strategic Human Resource and Organizational Development” pagsapit ng taong 2030.

Aniya, pangunahing dahilan ng pagbuo ng MSAC ay upang masustinihan ang sistema ng mahusay na pamamahala at mamantini ang pag-abot sa mga criteriang nakapaloob sa Performance Governance System-Balanced Score Card (PGS-BSC) kung saan nasa ikatlong yugto na ngayon ang CSC.

Kaugnay nito, inatasan din ni Nieto si CSC Sorsogon provincial director Arpon Lucero na bigyan ng regular na dokumentasyon ng mga nagawa o accomplishment ng CSC Sorsogon ang mga kasapi ng MSAC upang magsilbing basehan nito sa pagbibigay ng mga payo, rekomendasyon o suhestyon na makakatulong upang mapahusay pa at maging epektibo ang serbisyong ibinibigay ng CSC Sorsogon lalo na sa larangan ng human resource management at pagsusulong ng byurukrasya sa Pilipinas.

Nahalal bilang chairman ng MSAC si DILG provincial director Ruben Baldeo, Vice-Chair si Provincial prosecutor Regina Coeli Gabito habang ang iba pang mga kasapi ay may kanya-kanya namang mga komitibang pamumunuan.

Kabilang sa mga kasapi ng MSAC ay ang Department of Interior and Local Government, Provincial Prosecutor’s Office, Philippine Information Agency, League of Municipal Mayor’s of the Philippines, Sorsogon State College, Sorsogon Provincial Council of Personnel Officers, Kapisanan ng mga Broadcaster sa Pilipinas, Sorsogon City Water District, Social Action Center para sa civil society group at Federation of Association for Communities and Children Empowerment, Inc. (FACCE) bilang kinatawan naman ng Non-Government Organization. (BARecebido, PIA Sorsogon)