Friday, January 11, 2013

Dry-run sa operasyon ng Class AA slaughter house ng Sorsogon City isasagawa

Ni: Bennie A. Recebido

LUNGSOD NG SORSOGON, Enero 11 (PIA) – Pangungunahan ng Sorsogon City Veterinary Office ang gagawing Class AA Slaughter House Orientation at Dry Run sa operasyon ng pinakabagong katayan ng mga hayop dito sa lungsod ng Sorsogon.

Ayon kay City Veterinary Office Technician at Media Affairs in-charge Arwil P. Liwanag, ang hakbang na ito ay gagawin upang masuri ang kapasidad ng mga kagamitan at iba pang mga pasilidad sa loob ng slaughter house bago tuluyang buksan at maging permanente ang operasyon nito.

Aniya, inatasan na rin ang mga magdadala ng kakataying hayop na dalhin na ang mga ito sa bagong slaughter house mula alas-otso kanina hanggang mamayang hapon para sa gagawing dry-run bukas. Ala-una naman mamayang hapon gaganapin ang oryentasyon para sa mga magiging tauhan ng slaughter house.

Si City Veterinarian Dr. Alex Destura ang magbibigay ng pambungad na pananalita at mensaheng magbibigay inspirasyon ang ibibigay naman ni City Mayor Leovic Dioneda.

Ilang mga personalidad mula sa National Meat Inspection Service (NMIS) Region V ang tatalakay ng mga paksang makakatulong upang higit na mapaganda ang operasyon ng bagong slaughter house ng lungsod.

Tatalakayin ni OIC Regional Technical Director Dr. Mateo P. Puatu ang Requirements for Accreditation of Class AA Slaughter House; Flow of Operation of Class AA Slaughter House ang tatalakayin ni Senior Meat Control Officer Dr. Alex Templonuevo at ang paksang Sanitation of Abatoir ang tatalakayin ni Regional Sanitary Engineer William G. Sabater ng Department of Health (DOH) Bicol.

Isang kinatawan mula sa fabricator/supplier ng slaughter house ang tatalakay sa paksang Utilization Operation of Slaughter House Equipment and Facilities. Si OIC Slaughter House Administrator Eugene Azas ang siya namang naatasang magbigay ng pangwakas na pananalita.

Mamayang hatinggabi hanggang bukas ng alas sais ng umaga gagawin ang dry-run sa operasyon ng slaughter house. Libre umano ang dry-run at walang kokolektahing anumang bayad mula sa mga magpapakatay.

Sinabi din ni Liwanang na may dalawang slaughter house ang lungsod, isa sa Sito Mahingan, Brgy Cabid-an at isa sa Brgy Rawis sa Distrito ng Bacon. Subalit kapag tuluyan nang nabuksan ang bagong slaughter house ay ipapasara na ang mga ito at lahat na ng pagkakatay ay gagawin sa bagong slaughter house.

Ang bagong Class AA Slaughter House ng Sorsogon City sa Sitio Madan-an, Brgy. San Juan ang pinakamalaki at pinakamodernong katayan ng hayop ngayon sa buong rehiyon ng Bicol. (BARecebido, PIA Sorsogon)

Thursday, January 10, 2013

Kaguluhan sa SPJ noong Bagong taon tinututukan ng SP


Ni: Bennie A. Recebido

LUNGSOD NG SORSOGON, Enero 10 (PIA) – Tinututukan sa ngayon ng Sangguniang Panlalawigan (SP) sa pangunguna ni Sorsogon Vice Governor Antonio “Kruni” Escudero ang pag-usad ng imbestigasyon sa naganap na kaguluhan sa loob ng Provincial Jail (SPJ) noong Enero 1, 2013 kung saan isang jail guard ang nasaksak at limang bilanggo ang nasugatan.

Ilang mga hakbang din ang nais isulong ng SP upang matuldukan na ang mga karahasan sa loob ng SPJ.

Sa programang Sanggunian Panlalawigan Update, sinabi ni Bise-Gobernador Escudero na siya ring tumatayong Chairman ng Committee on Peace and Order ng SP, nais niyang matukoy ang tunay na pinag-ugatan ng nasabing pangyayari.

Imumungkahi din niya umano kay Sorsogon Gov. Raul R. Lee na ibyahe na ang mga sentensyadong bilanggo sa National Bilibid Prison (NBP) sa Muntinlupa upang mabawasan na ang pagsisiksikan ng mga ito sa karsel at mabawasan na rin ang mga pasaway na inmates sa SPJ.

Hiniling din ng bise gobernador sa Department of Justice Provincial Prosecutors Office na bilisan ang paglilitis ng mga kaso nang sa gayon ay mapalabas na sa bilangguan ang mga walang sala at matira na lamang sa kulungan yaong mga bilanggong may dapat na panagutan sa batas.

Samantala, sa pinakahuling sesyon naman ng Sangguniang Panlalawigan, tinalakay sa ginawang privilege speech ni Board Member Eric Dioneda ang naganap na kaguluhan sa SPJ at sinabi nitong dapat nang gumawa ng mabilisang aksyon ang lokal na pamahalaan upang matuldukan na ang ganitong karahasan sa loob ng bilangguan.

Balak ding ipatawag ni Committee on Rules, Privileges and Amendments Chair Board Member Arnulfo Perete ang mga mayor sa loob ng SPJ upang makakalap ng mga impormasyon ukol sa kalagayan ng mga bilanggo at makagawa din sila ng mga kaukulang hakbang na makakatulong sa pagsasaayos ng sistema sa loob ng SPJ.

Pinag-aaralan din ng SP kung dapat ngang ilipat ang pamamahala ng SPJ sa Bureau of Jail Management and Penology.

Base sa rekord ng Sorsogon Provincial Jail, mayroon itong 408 na kabuuang bilang ng mga bilanggo kung saan lima dito ang nasentensyahan na at nakatakda nang ibyahe sa NBP, isa ang nasenstensyahan na ng mababa sa tatlong taong pagkakakulong, habang patuloy pang nililitis ang kaso ng 402 pang natitirang bilanggo. (BARecebido, PIA Sorsogon)

Wednesday, January 9, 2013

Pista ng Itim na Nazareno ipinagdiriwang din ng mga deboto sa Sorsogon

Photo by: thepensieveonline.blogspot.com
Ni: Bennie A. Recebido


LUNGSOD NG SORSOGON, Enero 9 (PIA) – Hindi lamang sa Metro Manila abala ang mga deboto ng Poong Nazareno kundi maging dito din sa lungsod ng Sorsogon kung saan isang banal na misa mamayang alas-dos ng hapon na susundan ng isang prusisyon ng Mahal na Poon ang tatampok sa selebrasyon ng Pista ng Nazareno ngayong araw.

Pangungunahan ang mga aktibidad ng Devotees of Black Nazarene na una nang inorganisa dito noong Marso taong 2009 ng mga disipulo ng Diocese ng Sorsogon na inaprubahan naman ng noo’y rector ng Sts Peter and Paul Parish Msgr. Choi Esperida.

Ayon sa isang deboto na siya ring nag-organisa ng grupo ng mga mananampalataya sa Poon, ito na ang ikatlong taon na ipuprusisyon nila ang Poong Nazareno na ipinagawa pa nila sa lalawigan ng Albay at dumating sa Sorsogon noong Hunyo 2009.

Aniya, ginagawa din nila ang regular na pagrorosaryo tuwing Biyernes, alas sais y medya ng hapon kung saan intensyon nitong hilingin sa Poon na pagalingin ang mga maysakit sa pamamagitan ng pagdarasal at pananampalataya.

Tuwing unang Biyernes naman ng buwan ay nagkakaroon sila ng pagrorosaryo at pagnonobena sa Poon tuwing alas-kwatro y medya ng hapon.

Sa kasalukuyan ay higit na naging maginhawa para sa mga deboto ang pagdarasal sa Poon matapos na ibigay sa kanila ang isang bahagi ng Sts. Peter and Paul Cathedral na nakaharap sa kahabaan ng Rizal St. sa lungsod ng Sorsogon noong Nobyembre 9, 2012 kung saan nakalagak ang imahe ng Poong Nazareno at bukas para sa pananampalataya ng publiko mula alas-singko ng umaga hanggang alas-nueve ng gabi sa mga araw ng Lunes hanggang Sabado at alas kwuatro naman ng umaga hanggang alas-nueve ng gabi tuwing araw ng Linggo.

Pahayag pa ng deboto na napakaistratehiko ng lugar na ibinigay sa kanila ng Diocese ng Sorsogon sapagkat naobserbahan din nila ang pagbabago sa mga dumaraang Sorsoganon, ano man ang estado sa buhay, kung saan nag-aantanda ang mga ito at nag-aalay ng dasal. Nakikita din umano nila na unti-unting naibabalik ang pananampalataya at pagiging malapit sa Panginoon ng publiko.

Ang Devotees of Black Nazarene ay mayroon nang 50 regular na kasapi mula sa iba’t-ibang mga barangay sa Sorsogon City at patuloy pa umanong dumarami. (BARecebido, PIA Sorsogon)

Tuesday, January 8, 2013

PCG, LGU Pilar rescued 62 passengers of MB Sirakan



By: Bennie A. Recebido

SORSOGON CITY, Jan 8 (PIA) – Sixty two (62) passengers onboard MB Sirakan 2 were successfully rescued yesterday by Coast Guard Pilar and LGU-Pilar Search and Rescue Team after it has encountered an engine trouble an hour after it departed Pilar Port bound for Aroroy Port in Aroroy, Masbate.

Report from Philippine Coast Guard (PCG) District Sorsogon said that on Jan 7, 2013 at 7:30 AM, CG Detachment Pilar received a cellphone call from a certain Nelly Serrano that MB Sirakan 2 was dead on sea at the vicinity waters off approximately five nautical miles from Brgy. San Antonio (Sapa), Pilar, Sorsogon, and need an immediate assistance.

Without delay, CG Pilar coordinated with Pilar-LGU and thereafter, PCG Asst Petty Officer PO3 Arvin Flor, in-charge of CG Detachment Pilar and CG K9 personnel SN1 Elwin Bongalos together with two LGU-Pilar personnel went onboard LGU-Pilar speedboat to rescue passengers.

Following an hour rescue, all passengers in good physical conditions were successfully transferred to MB Sirakan 3 and returned home safely, while MB Sirakan 2 was successfully towed to Aroroy, Masbate.

Boat Captain Carlito Dino said they left Pilar port at 5:30 in the morning and has experienced engine trouble and ultimately engine stopped at about 7:00 in the morning.

Passengers were provided by the rescuers with food and water to temporarily relieve their thirst and hunger having been stranded at sea for more than three hours.

MB Sirakan 2, a 21.33 GT/14.50NT vessel has a 130 pax capacity. Said banca is owned and operated by Elpidio V. Valencia with business address at Brgy. Cabda, Tugbu, Masbate City and skippered by boat captain Dino.

This is the second maritime incident of its kind that Coast Guard Detachment Pilar has recorded this year.  (BARecebido, PIA Sorsogon)

Patay na balyena muli na namang nakuha sa karagatan ng Sorsogon



Ni: Bennie A. Recebido

LUNGSOD NG SORSOGON, Enero 8 (PIA) – Limang araw matapos makakuha ng isang patay na balyena sa karagatan ng Pilar, Sorsogon, noong ika-30 ng Disyembre, 2012, isa na namang patay na balyena ang nakuhang lulutang-lutang sa karagatang sakop ng Barangay Lupi sa bayan ng Prieto Diaz nito lamang Biyernes, ika-4 ng Enero, 2013.

Sa ulat na ipinaabot sa PIA Sorsogon ni Provincial Veterinarian Dr. Enrique Espiritu, Biyernes nang mamataan ang isang Longman’s Beaked Whale o balyena, subalit dahilan sa kondisyon ng panahon ay nakuha ito ng grupo ng Bureau of Fisheries and Aquatic Resources (BFAR) Bicol sa pangunguna ni BFAR-5 FIRST Team Leader Nonie P. Enolva, linggo na ng umaga, Enero 6, 2013.

Ang balyena ay may bigat na mahigit kumulang sa 250 kilos at may habang 3.25 metro.

Sa tantiya ng BFAR, halos ay limang araw nang patay ang nasabing balyena dahilan sa nakitang kondisyon, kulay at kakaibang amoy nito.

Sa pagsusuring ginawa ni Provincial Veterinarian Dr. Espiritu, may ilang mga bukol o tumor ang higanteng isda sa baga na siya umanong dahilan ng kamatayan nito.

Paliwanag ni Dr. Espiritu na maraming mga kadahilanan kung bakit tinutubuan ng tumor ang mga malalaking isda, isa na umano sa nagiging sanhi nito ang mga pollutant o dumi lalo na yaong mga plastik na itinatapon sa karagatan na nakakain ng mga isda at hindi natutunaw sa tiyan nito.

Matapos ang ginawang necropsy ay agad na itong ibinaon sa lupa ng mga tauhan ng BFAR. May ilang bahagi din ng lamang-loob ng balyena na ipinadala sa laboratoryo upang mas masusing masuri pa ito.

Ayon kay Dr. Espiritu, madalang na madalang o halos ay hindi makakakita ng Longman’s Beaked Whale na may scientific name na Indopacetus pacificus sa bansa o maging sa buong mundo. Sa katunayan sasampu pa lamang ng ganitong uri ang nakita sa buong mundo.

Sa Pilipinas, ito ang ikalawang pagkakataong nakakita ng ganitong uri ng balyena sa karagatang sakop nito, kung saan unang nakita ito noong Enero 2004 sa karagatan ng Davao na naitalang ika-walong uri sa buong mundo. Base sa rekord, lumalaki ang balyenang ito mula sa anim hanggang walong metro ang haba.

Dagdag pa ng beterinaryo na dahilan sa pagbabago ng klima at temperatura sa dagat ay hindi kataka-takang magkaroon ng ganitong senaryo sa karagatan sa bansa. Ganitong mga panahon o mula buwan ng Enero hanggang Hunyo ay nagiging madalas umanong magkaroon ng mammal stranding sa karagatan hindi lamang ng Sorsogon kundi maging sa iba pang panig ng bansa. (BARecebido, PIA Sorsogon)