Wednesday, November 24, 2010

BFP PATULOY PA RIN SA PAGLILINIS SA MGA IBINUGANG ABO NG MT. BULUSAN

 Tagalog News

SORSOGON PROVINCE (Nov. 24) – Patuloy pa rin ang mga tauhan ng Bureau of Fire Protection partikular sa bayan ng Irosin sa pagsasagawa ng mga paglilinis sa mga kalsada.

Ayon kay Senior Inspector Prospero Deona, hepe ng BFP Irosin, natapos na nilang linisin ang mga kalsada sa barangay Mombon, Gulang-gulang, Tinampo at Bolos partikular ang Maharlika Highway.

Ayon kay Deona, kinakailangang malinis agad ang mga abong nakakalat sa mga kalsada sapagkat lubhang mapanganib ito sa mga motoristang dumadaan dito.

Aniya, nakatakda din nilang i-flushing ang mga mga punong-kahoy, halaman at mga bubong ng mga paaralan upang hindi ito maging mapanganib sa mga residente lalo na sa mga batang mag-aaral.

Matapos diumano ito ay tututukan naman nila ang paglilinis sa Barangay Cogon upang ihanda ang lugar sa pagbabalik ng mga evacuees na may mga sakit at mahihinang pangangatawan na hanggang sa kasalukuyan ay nasa evacuation center pa.

At kung hindi rin aniya umulan sa mga susunod na araw, mapipilitan na rin silang diligan ang mga pananim at damong pagkain ng mga alagang hayop ng mga residente upang maiwasan ang mas lalo pang malaking perwisyo sa kabuhayan ng mga residente na naapektuhan ng aktibidad ng Mt. Bulusan. (Bennie A. Recebido, PIA Sorsogon)

MT. BULUSAN UPDATES (Nov. 25, 2010)

Tagalog News

SORSOGON PROVINCE (Nov. 24) – Muli na namang nagbuga ng abo ang Mt. Bulusan kanina, bandang ala-una beinte kwatro ng hapon.

Ayon sa Phivolcs, tinatayang nasa isang kilometro ang taas ng ibinugang abo mula sa bunganga ng bulkan patutungong timog silangang direksyon.

Kaugnay nito nananatili ang abiso ng Phivolcs sa publiko na iwasan ang pagpasok sa itinalagang 4-km permanent Danger Zone.

Sa ipinaabot namang mensahe ni Municipal Social Welfare and Development Officer Hilda Martinez, sinabi niyang sa kabila ng panibagong pagbuga ng abo ng bulkang Bulusan, nananatili sa bilang na limampu’t-limang pamilya na binubuo ng 247 katao ang nasa evacuation center at hindi na ito nadagdagan pa simula kaninang hapon hanggang sa kasalukuyan.

Sinabi din niyang nagsagawa din ngayon ang lokal na pamahalaan ng Irosin ng first aid training sa pangunguna ng mga tauhan ng Provincial at Municipal Police Office kung saan nilahukan ito ng mga volunteer students, evacuees at mga Barangay officials.

Ayon naman kay Information Officer Jerelle Marquez ng LGU-Irosin, ilan sa mga sakit na naitala sa mga evacuation sites particular sa bayan ng irosin ay ang acute respiratory illness, pananakit ng dibdib, lagnay, hypertension, sakit ng ulo at ngipin. Subalit agad din naman itong nabigyan ng first aid at karampatang lunas ng kanilang mga health personnel.

Samantala, nakatanggap naman ng relief goods at gamot kahnina ang mga apektadong residente sa bayan ng Juban mula sa Ako Bicol Party List sa pangunguna ni Atty. Rodel Batocabe. Maliban sa relief goods at gamot, nagsagawa din ang AKB ng medical at dental mission sa mga residente doon. Bukas ay isasagawa naman ang kahalintulad na aktibidad sa bayan ng Irosin. Naroroon din si 2nd District Congressman Deogragracias Ramos upang magbigay suporta. (Bennie A. Recebdio, PIA Sorsogon)



PRESYO NG MGA BILIHIN SA APEKTADONG LUGAR NG MT. BULUSAN, NANANATILI SA DATI - DTI Sorsogon


Tagalog News
SORSOGON PROVINCE (Nov. 24) – Walang naitatalang pagbabago sa galaw ng mga pangunahing bilihin sa mga lugar na apektado ng Mt. Bulusan.

Ito ang nagging pahayag ni DTI Consumer Welfare Desk Evelyn Paguio matapos silang magsagawa ng price monitoring nito lamang nakaraang mga araw.

Ayon kay Paguio, nananatili pa rin sa dating mga presyo ang mga pangunahing bilihin sa mga bayan ng Irosin, Juban, Casiguran at iba pang mga kalapit na lugar sa palibot ng Mt. Bulusan.

 Sa ngayon ay patuloy din ang kanilang monitoring sa mga presyo ng bilihin partikular na nalalapit na din ang Christmas season.

Umapela din ito sa mga negosyante na iwasan ang pananamantala at ipatupad ang mga presyo ng mga bilihin ayon sa itinatakda ng batas. (Bennie A. Recebido, PIA Sorsogon)

PANGANGAILANGAN SA MGA APEKTADONG BAYAN AGAD NA INAKSYUNAN NG MGA KINAUUKULAN

Tagalog News

SORSOGON PROVINCE (Nov. 24) – Sinimulan kahapon ng provincial government of Sorsogon katuwang ng LGU-Irosin ang paglalagay ng mga portalets o portable CRs sa mga evacuation sites partikular sa Gallanosa National High School.

Ito ang ipinahayag ni Sorsogon Governor Raul Lee bilang tugon sa panawagan ng pamahalaan ng Irosin ukol sa kakulangan ng mga CR sa kanilang evacuation center.

Dagdag pa ni Lee na naging aktibo din ang Department of Public Works and Highways 2nd District Engineering Office at Provincial Engineering Office sa pagsagawa ng dredging operations sa bayan ng Juban at Irosin partikular sa mga ilog na apektado ng mudflows.

Matatandaang sa nagging pahayag ni DPWH 2nd District Engineer Edgar Curativo na mayroong kasalukuyang nakatutok na apat na civil engineers sa mga Barangay ng Patag, Cogon, Monbon at Gulang-Gulang sa bayan ng Irosin. Ito diumano ang mga lugar na pawang delikado sa posibleng pagragasa ng lahar kung magkakaroon ng matagal at malalakas na pag-uulan.

Tiniyak naman ni Lee sa lokal na opisyal ng mga apektadong bayan na laging nakahanda ang provincial government sa pagbigay tugon sa mga suliraning idinudulog sa kanila na hindi na nakakayang gampanan ng mga LGUs dahilan na rin sa limitasyon ng mga ito sa kagamitan.

Kaugnay naman sa pag-usisa ng ilang mga taga- Bulan ukol sa kalinisan ng tubig na kanilang iniinom, tiniyak ni Bulan Mayor Helen De Castro sa kanyang mga nasasakupan na walang kontaminasyon ang tubig ng Bulan Water District dala ng pinakahuling pagbuga ng abo ng Bulkang Bulusan kung saan naapektuhan ang ilang mga barangay doon.

Samantala, pinauwi na rin ang ilang mga evacuees sa kanilang mga tahanan simula kahapon. Tanging ang mga highly vulnerable residents tulad ng mga may sakit at may hika, at mga matatanda na lamang sa ngayon ang natitira sa mga evacuation centers na papayagan lamang makauwi sakaling makakuha na sila ng clearance mula sa kanilang Municipal Health Officer. (Bennie A. Recebido, PIA Sorsogon)

Tuesday, November 23, 2010

STATE OF CALAMITY IDINEKLARA NA SA BAYAN NG IROSIN

Tagalog News

SORSOGON PROVINCE (Nov. 23) – Matapos ang dinalang epekto sa bayan ng Irosin dahilan sa naging huling mga aktibidad ng Mt. Bulusan, tuluyan nang nagdeklara ng State of Calamity ang bayan ng Irosin.

Ito ay matapos na pirmahan ni Irosin Mayor Eduardo Ong, Jr. ang iResolution No. 96-2010 (Resolution declaring the Municipality of Irosin under a State of Calamity due to series of volcanic eruptions and continuous threat of pyroclastic flow along the rivers of the said municipality) na isinulong ng Sangguniang Bayan doon.

Ang pagdeklara ng state of calamity ay nangangahulugang magagamit na ng bayan ng Irosin ang kanilang 5% calamity fund upang mapapabilis pa nila ang pagbibigay ng tulong sa mga apektado ng bulkang Bulusan.

Ang bayan ng Irosin ang isa sa may pinakamalaking perwisyong naranasan dala ng huling mga pagbuga ng abo ng Mt. Bulusan.

Samantala, inihayag naman ni Phivolcs supervising specialist Julio Sabit na nakapagtala sila ng walong volcanic quakes sa nakalipas na dalawampu’t-apat na oras at nananatili pa rin sa Alert Level 1 ang estado ng bulkan pati na ang no-human-activity policy nila sa 4-km radius permanent danger zone.

Sinabi din ni Sabit na bagamat tahimik ngayon ang bulkan, hindi pa diumano tapos ang aktibidad nito. Maaari pa rin aniyang magkaroon ng mga kasunod na pagbuga ng abo kung kaya’t dapat na maging alerto ang lahat ng mga residente at kinauukulan lalo na yaong mga nasa prone areas ng ashfalls sa bahaging timog kanlura ng Bulusan volcano.

Dapat din aniyang sumunod sa mga advisories, palagiang maging handa sa paglikas tuwing magkakaroon ng ashfalls at may nakaantabay na mga dust masks lalo ang mga may hika, bata, matatanda at mga buntis.

Sinabi din ni Sabit na sa pinakahuli nilang pagtataya, nasa 372,000 cubic meter na abo na ang naibuga ng Mt. Bulusan. (Bennie A. Recebido, PIA Sorsogon)



Pagbuga ng abo ng Mt. Bulusan noong nakaraang Linggo, mas higit na malakas


Tagalog News

SORSOGON PROVINCE (Nov. 23) – Mas higit na malakas ang nangyaring panibagong pagbubuga ng abo ng Bulkang Bulusan noong nakaraang Linggo (7: 22 AM November 21, 2010), kung ikukumpara sa volcanic activity noong nakaraang November 9, 2010.

Bukod sa 2 kilometro at mas mataas ito sa dating 1 kilometrong ibinugang abo noong nakaraang November 9, mas marami rin ngayon ang bilang ng mga apektadong barangay sa apat na mga bayan na sakop ng lalawigan ng Sorsogon, gayundin ang bilang ng mga nagsilikas na internally displaced persons (I.D.P.’s) sa mga evacuation centers.

Ang barangay Puting Sapa sa bayan ng Juban ang lubhang naapektuhan nitong pinakahuling pagbubuga ng abo ng Mt. Bulusan, kung saan mayroong pinakamaraming bilang ng I.D.P.’s. Sa kasalukuyang opisyal na talaan ng Provincial Disaster Risk Management Office-Sorsogon, 55 mga pamilya o 280 katao ang nagsilikas sa Cogon Elementary School ng nabanggit na barangay, 36 na mga pamilya o 179 katao sa Provincial Nursery at 22 mga pamilya o 97 katao sa Juban National High School. Bagama’t apektado rin ang Buraburan at Guruyan ay walang namang naitatalang I.D.P. sa nabanggit na mga barangay.

Nakapagtala naman ng 225 mga pamilya o 992 I.D.P.’s sa barangay Bolos at Cogon at 3 mga pamilya o 22 mga I.D.P.’s sa barangay Mapaso sa bayan ng Irosin. Wala ring naitatalang mga internally displaced persons sa iba pang mga apektadong barangay tulad ng Mombon, Umagon at sa Irosin Proper. Pansamantalang nanatili ang mga residente ng Bolos at Cogon sa Gallanosa High School habang ang mga taga-Mapaso ay mas piniling lumikas sa barangay hall ng San Roque sa bayan ng Bulusan, sa pag-aakalang mas ligtas sila doon.

Inabot din ng pagbubuga ng abo ng bulkan ang barangay Aquino, Sumagonsong, San Francisco, Quirino, Palale, Cadandanan, Dolos, Calpi, Roxas, Bical at ang Bulan Proper sa bayan ng Bulan at ang barangay Tula-Tula, Busay at Siuton sa bayan ng Magallanes.

Sa kabuuan, 341 mga pamilya o 1, 570 na mga internally displaced persons ang kasalukuyang nasa mga nabanggit na evacuation centers bunsod ng panibagong pag-aalburuto ng Bulkang Bulusan. (Von Labalan-PIO Sorsogon)