DTI Sorsogon nanawagang samantalahin ang libreng sertipikasyon ng mga helmet

Ni: Bennie A. Recebido

LUNGSOD NG SORSOGON, Hulyo 17 (PIA) – Nanawagan si Department of Trade and Industry (DTI) Sorsogon Consumer Welfare Desk Evelyn Paguio sa mga motoristang gumagamit ng helmet na samantalahin ang libreng aplikasyon para sa sertipikasyon ng kanilang mga helmet na magtatagal hanggang sa Setyembre ngayong taon.

Aniya, ang hakbang na ito ay alinsunod sa memorandum na ipinadala ng Bureau of Product Standards Manila kung saan pansamantalang inaalis ang P 101.25 na bayad para sa pagproseso ng aplikasyon (P100.00) at stiker (P1.25) na ibibigay ng DTI.

Subalit nilinaw ni Paguio na magpapatuloy pa rin ang pagtanggap nila ng aplikasyon para sa sertipikasyon ng mga helmet hanggang sa Disyembre 31, 2012.

Aniya, dapat na dalhin ng mga motorista ang kanilang ginagamit na helmet sa tanggapan ng DTI upang masuri kung nasa quality standard ito bago nila ito lagyan ng Import Commodity Clearance (ICC) sticker ng Bureau of Product Standards (BPS).

Matatandaang pinaigting pa ng pamahalaan ang kampanya sa paggamit ng helmet  sa pamamagitan ng pagpapalabas ng Joint Administrative Order No. 1 series of 2012 ng Department of Transporation and Communication (DoTC) at Department of Trade and Industry (DTI) na nag-aatas sa mga motorista na iparehistro ang kanilang ginagamit na helmet para na rin sa personal nilang kaligtasan. (BARecebido, PIA Sorsogon)