TV5, Phil. Army, PRC, NGO namahagi ng tulong sa Matnog

Ni: Bennie A. Recebido

Lungsod ng Sorsogon, September 20 (PIA) – Muling napatunayan ang bisa ng pagtutulungan ng pampubliko at pribadong mga institusyon matapos na matagumpay na maihatid ang iba’t-ibang mga serbisyong pangkalusugan sa mga residente ng Brgy. Calintaan, isang islang barangay sa bayan ng Matnog, Sorsogon.

Sa impormasyong ipinaabot ni Col. Felix J. Castro, Jr., Commanding officer ng 903rd Infantry Brigade, Phil. Army sa PIA Sorsogon, mahigit umano sa pitongdaang mga residente sa Brgy. Calintaan ang kabenipisyo noong Martes, Oct. 18, ng iba’t-ibang mga serbisyong inihandog ng TV5 sa pangunguna ni TV5 Resource Mobilization Officer Chay Dionco katuwang ang 903rd Infantry Brigade ng Philippine Army, Philippine Red Cross (PRC) at Kapisanan ng mga Kababaihan para sa Kaunlaran ng Matnog, Inc. (KABALIKAT) sa pakikipag-ugnayan sa lokal na pamahalaan ng Matnog. Naging aktibo din si Ginang Marie Ubaldo, ang maybahay ni Matnog Mayor Emilio G. Ubaldo.

Kabilang sa mga serbisyong natanggap ng mga residente ay ang libreng konsultasyon at gamutan sa pamamagitan ng kanilang medical mission kung saan naroroon si Dr. Rossana Galeria, ang Municipal Health Officer (MHO) ng Matnog at Dr. James Apin, MHO ng Juban kasama ang mga tauhan ng Rural Health Unit ng Matnog.

Nagkaroon din ng libreng gupit, pamamahagi ng mga relief goods at feeding program sa mga mag-aaral mula grade one hanggang grade three ng Calintaan Elementary School.

Samantala, malaki naman ang naging pasasalamat ng mga residente ng Brgy. Calintaan at ng pamahalaang bayan ng Matnog dahilan sa atensyong naibigay sa kanila ng mga institusyong ito. (PIA Sorsogon)

Pledge 25 at RC 143 program ng Philippine Red Cross pinaiigting

Ni: Bennie A. Recebido

Lungsod ng Sorsogon, Oktubre 20 (PIA) – Patuloy pang pinaiigting ng Philippine Red Cross (PRC) Sorsoogn Chapter ang kanilang Pledge 45 at Red Cross (RC) 143 campaign kaugnay ng patuloy na pagtaas ng bilang ng kaso ng dengue sa bansa.

Ayon kay PRC Sorsogon Chapter Manager Salvacion Abotanatin, mahigit isangdaan na rin ang naitatala nilang mga volunteer mula sa mga paaaralan sa kolehiyo dito sa lungsod ng Sorsogon na anumang oras ay matatawag sakaling magkaroon ng mga dagliang pangangailangan sa dugo. Ito umano ay maliban pa sa mga volunteer mula sa mga local government units (LGU).

Sunud-sunod din ang ginagawang mga pagsasanay at information and education drive ng PRC upang maipaabot sa publiko ang kahalagahan ng pagbibigay ng dugo hindi lamang para sa mga pasyenteng matutulungan nito kundi maging sa personal na kausugan at kondisyon ng pangangatawan ng isang indibidwal na nagbibigay ng dugo.

Mayroon na din umanong mga detailed nurses ngayon na nakakatuwang nila sa kanilang mga programa. Ikinututuwa din umano ng kanilang tanggapan ang suporta at pagiging aktibo na rin ngayon ng mga LGU pagdating sa blood letting activities at pagkakaroon ng mas mataas na kamalayan ngayon ng komunidad ukol sa mga programang tulad nito.

Matatandaang nagpalabas din kamakailan ng isang memorandum ang Secretary General ng Philippine Red Cross para sa lahat ng mga chapters nito sa bansa na buhayin at paigtingin ang RC 143 Community Health Team at Pedges 25 volunteers upang mamantini ang pagiging mapagbantay at pagsasagawa ng mga kaukulang aksyon upang mapataas ang kamalayan ukol sa pagkontrol at pagsugpo sa sakit na dengue sa kani-kanilang mga nasasakupang lugar.

Sa tala ng PRC National Office umaabot na sa tatlumpu’t-walong libong kaso at dalawangdaang pagkakamatay ang naiulat na mula Enero 2011 hanggang Hulyo 2011 at patuloy pang tumataas hanggang sa ngayon.

Sa Sorsogon, siyam na kaso ng dengue lamang ang naitatala sa kaparehong panahon, higit na mababa kumpara noong taong 2010. (PIA Sorsogon)

Mga bilanggo ng SPJ sumayaw sa kalsada

Ni: Bennie A. Recebido

Lungsod ng Sorsogon, Oktubre 20 (PIA) – Sa kauna-unahang pagkakataon ipinakita ng mga bilanggo ng Sorsogon Provincial Jail (SPJ) ang binuo nilang sayaw at iba pang mga palabas  sa ginawang ‘Kasanggayahan Inmates Break’ sa Capitol Grounds alas dos y medya ng hapon, kahapon.

Ayon kay Sorsogon provincial Jail Warden Josefina Lacdang, hinikayat at talagang binuksan nila sa publiko ang nasabing street presentation na ito ng mga bilanggo partikular sa mga kamag-anak at kaibigan ng mga bilanggo.

Sinabi ni Lacdang na mismong si Sorsogon Governor Raul R. Lee ang humikayat sa kanya na turuan ng sayaw, kanta at iba pang mga natatanging palabas ang mga bilanggo upang mas maging abala pa ang mga ito.

Mahigit umano sa isangdaang mga bilanggo ang nakilahok sa kauna-unahang palabas na ito na ginawa nila bilang pakikiisa sa pagdiriwang ng Kasanggayahan Festival 2011.

Ipinagmalaki din ni Lacdang ang malaking pagbabago ngayon sa SPJ mula sa pisikal na istruktura nito hanggang sa ugali at samahan ng mga bilanggo.

Aniya, sa dami ng pinagkakaabalahan at mga mapaglilibangan sa loob ng bilangguan, nawalan na umano ng panahon ang mga bilanggo na gumawa pa ng mga malalaking gulo at suliranin sa loob.

Kabilang sa mga pinagkakabalahan ng mga ito ay ang pag-aaral lalo na’t maraming mga scholarship at iba pang oportunidad ang ibinibigay ng mga kapartner na organisasyon at institusyon ng SPJ. Mayroon din umanong library ang SPJ, mga libangan tulad ng isports, livelihood activities at binibigyang pagkakataon din niyang makapagkantahan ang mga bilanggo tuwing Biyernes.

Samantala, ayon naman sa ilang mga obserbador, ang pagbabago ngayon sa SPJ ay bunga na rin ng maganda at makataong pagtrato ni Lacdang sa mga bilanggo. (PIA Sorsogon)

Mga aktibidad ng Kasanggayahan Festival dinumog ng mga manonood

Ni: Bennie A. Recebido

Lungsod ng Sorsogon, Oktubre 18 (PIA) – Dinumog ng mga manonood at nagbigay ng malaking kasiyahan sa mga ito ang sunud-sunod na mga aktibidad ng Kasanggayahan Festival mula noong Linggo hanggang kahapon.

(Photo by: BARecebido/PIA Sorsogon)

 Naging makulay ang isinagawang Regional Band and Majorette Competition noong Sabado kung saan anim na mga kalahok ang naglaban-laban na karamihan ay mga nagwagi din sa ginawang Regional Military Parade sa Naga City kamakailan.

Kabilang sa mga ito ang Sorsogon State College ng Sorsogon City, Central Bicol State University of Agriculture ng Pili, Camarines Sur, Camarines Sur Polytechnic Colleges ng Nabua, Naga College Foundation ng Naga City at Partido State University ng Goa, Camarines Sur.

Hinusgahan ang mga kalahok base sa street parade exhibition at sa ginawa nilang exhibition sa Balogo Sports Complex na ginawa ng mga ito sa loob ng pito hanggang sampung minuto.

Nakuha ng University of Saint Anthony ang Best in Marching Majorette Award sa puntos na 92.97% kung saan tinanggap nito ang limang libong cash prize award at trophy habang napili namang Best in Marching Band and Naga College Foundation sa puntos na 94.43% at nakatanggap din ito ng limanglibong piso at trophy.

Sa Best Regional Band, napili ang Naga College Foundation sa Naga City bilang 3^rd place. Labinlimang libong piso at trophy ang napanalunan nito habang naging 2^nd place naman ang Central Bicol State University of Agriculture ng Pili, Camarines Sur na nakatanggap ng dalawampu’t limang libong piso at trophy. Naging 1st place naman ang University of St. Anthony ng Iriga City kung saan limampung libong piso at trophy ang napanalunan nito.

Ang bawat kalahok ay binigyan ng Plaque of Appreciation at nakatanggap din ang mga ito ng subsidyong sampung libong piso.

(Photo by: BARecebido/PIA Sorsogon)

Ang Regional Band and Majorette Competition ay naisakatuparan sa pangunguna at pagtutulungan ng Sorsoganon Kita, Inc., The Rotary Club of Metro Sorsogon at ng The Rotaract Club of Metro Sorsogon. 

Samantala, nagbigay din kakaibang excitement sa mga Sorsoganon at bisita dito ang ginawang Skydiving Demonstration ng Philippine Air Force. Sa taas na limanglibong talampakan, isa-isang tumalon ang anim na mga skydivers na nagpahanga sa mga manonood nito.

(Photo by: BARecebido/PIA Sorsogon)

 Isinagawa din ang makulay na Historico-Cultural Parade kahapon kung saan anim na float ang ipinarada at siyam na Local Government Unit (LGU) ang nakilahok at nagpakita ng kani-kanilang mga festival sa pamamagitan ng street dancing.

Pumili din ng Best Float at Best Street Dance kung saan sa Best Float ay nakuha ng Barcelona ang 2^nd place at Donsol naman ang nakakuha ng First Place. Sa kategorya naman ng Best Street Dance, nakuha ng Castilla ang 3^rd place, 2^nd place ang Pilar at Sorsogon City ang nakakuha ng 1^st place. 

(Photo by: BARecebido/PIA Sorsogon)

Naging malaking atraksyon din ang partisipasyon ng mga Agta Tabangnon ng San Rafael, Prieto Diaz, Sorsogon lalo na ng magpakita ito ng kanilang indigenous dance. Maging ang Muslim community ng Sorsogon City ay aktibo ding nakilahok sa parada. (PIA Sorsogon)

Sorsogon's pride Sen Francis 'Chiz' Escudero delivers his message during the Bicol Regional Band and Majorette Competition sponsored by the Sorsoganon Kita, Inc., The Rotary Club and The Rotaract Club both of Metro Sorsogon, held in Sorsogon as part of the Kasanggayahan Festival 2011 activities, held at the Balogo Sports Complex, October 16, 2011. (BARecebido/PIA Sorsogon)

Sorsoganons were so enthusiastic and even climb on top of an armored personnel carrierof the Philippine Army so to fully watch the exhibitions of street dancers from various Local Government Unit (LGU) in the province during the Historico-Cultural Show on October 17, 2011 during the 117th commemoration of Sorsogon's foundation as a separate province, held at the Balogo Sports Complex, Sorsogon City. (BARecebido/PIA Sorsogon)

903rd Infantry Brigade ng Philippine Army nakilahok sa isinagawang coastal clean-up

Ni: Bennie A. Recebido

Lungsod ng Sorsogon, Oktubre 18 (PIA) – Isang coastal clean-up ang nilahukan ng mga tauhan ng 903^rd Infanty Brigade ng Philippine Army na nakabase sa bayan ng Castilla, Sorsogon noong Biyernes, Oktubre 15, 2011 sa mga kostal na lugar ng Brgy. Poblacion, Castilla, Sorsogon.

Ayon kay Col. Felix J. Castro, Jr., Commanding Officer ng 903^rd IB ng Philippine Army, pinangunahan ang nasabing aktibidad ng Sangguniang Kabataan at Brgy. Council ng Poblacion Castilla kung saan nakilahok din ang mga kinatawan ng Youth for Environmental Service (YES) Organization, Poblacion Brgy. Council at limampung mga mag-aaral na pawang nasa ikatlo at ikaapat na taon sa hayskul sa Poblacion National High School.

Aniya, nasa isangdaan limampung metrong kostales na lugar sa Brgy. Poblacion ang nalinisan sa pamamagitan ng tulungang adhikaing ito. Mahigit tatlong oras din ang ginugol nila sa paglilinis na sinimulan nila ng alas-syete ng umaga at natapos alas-dyes y medya ng umaga.

Samantala, nakatakdang ring tumulong sa gagawing medical mission ng TV5 sa ilang mga piling kostales na lugar sa Matnog.

Matatandaang una nang iniskedyul ang aktibidad noong Oktubre 12, 2011 subalit dahil sa malalaking along dala ng bagyong Ramon kung kaya’t ipinagpaliban nila ito.

Ang pagtulong sa nasabing aktibidad ay bahagi ng kanilang pakikipagkawing sa mga non-government at private organizations upang maihatid sa mga komunidad ang pangunahing serbisyong kailangan ng mga ito. (PIA Sorsogon)

Skills Registry System ng DOLE inaasahang maipatutupad ngayong Oktubre

Ni: Bennie A. Recebido

Lungsod ng Sorsogon, Oktubre 14 (PIA) – Positibo ang Department of Labor and Employment (DOLE) Sorsogon na maipatutupad na ng tuluyan ang Skills Registry System (SRS) bago matapos ang buwan ng Oktubre ngayong taon.

Ayon kay DOLE Sorsoogn Field Officer Imelda Romanillos, hinihintay na lamang nila na mapirmahan ng pamahalaang lungsod ng Sorsogon ang Memorandum of Agreement sa pagitan ng DOLE at ng pmahalaang lokal ng lungsod ng Sorsogon upang maisakatuparan na ang full implementation ng SRS.

Matatandaang hinhikayat ng mga opisyal ng DOLE ang lahat ng mga local Government Unit (LGU) na iparehistro ang knailang mga nasasakupan sa ipinatutupad na Skills Registry System ng pamahalaan upang matulungan ang mga ito na madaling makahanap ng trabaho.

Ang sistemang ito ay dati nang ipinakilala ng DOLE sa probinsya ng Sorsogon partikular sa bayan ng Pilar at lungsod ng Sorsogon.

Ayon kay Romanillos sa pamamagitan ng SRS, matutulungang malutas ang suliranin sa skills-job mismatch at mapapaganda pa nito ang kalidad ng trabaho sa bansa at magiging mas produktibo at globally competitive pa ang mga Pilipino.

Mahihikayat din umano nito ang mga imbestor na maglagay ng mga negosyo sa mga lugar kung saan may mga manggagawang makatutugon sa kasanayang hinahanap nila.

Ang SRS ay konektado sa PhilJobnet, ang online job portal ng pamahalaan na madalas binibisita ng mga naghahanap ng trabaho, recruitment agencies at maging ng lokal at dayuhang may-ari ng mga negosyo.

Sinabi ni Romanillos na mabibigyan nila ng katiyakan ang mga aplikante na matutulungan nila ang mgaito sa paghahanap nila ng trabaho.

Ang SRS ay bahagi ng pagsisikap ng DOLE na makabuo ng ‘integrated data of labor information’ katuwang ang Bureau of Local Employment (BLE), Philippine Overseas Employment Administration (POEA), Technical Education and Skills Development Authority (TESDA), Professional Regulation Commission (PRC), Maritime Training Councils (MTC) at National Maritime Polytechnic (NMP). (PIA Sorsogon)