LEGAZPI CITY, AUGUST 25 --- SA HAMPANG KAN MAHIWASAN NA PAGBABAHA BUDA PAGRARASAY NIN DAGA SA KABIKOLAN, LIWAT NA PIGBUBUSOL KAN DEPARTMENT OF ENVIRONMENT AND NATURAL RESOURCES O D-E-N-R AN PAGREPASO BUDA PAG-UPGRADE KAN GEOLOGIC HAZARD MAPS SA RONA.
TINAWAN NIN DOON NI D-E-N-R BICOL REGIONAL EXECUTIVE DIRECTOR JOSELIN MARCUS FRAGADA NA SA KADAHILANAN KAN MAHIWASAN NA PAGBABAHA BUDA PAGTIRIS NIN DAGA NA KAWSA KAN BAGYONG JUANING ITUTULOD NA PORMALMENTE KAN AHENCIA AN PAGREPASO DANGAN UPGRADING KAN GEOHAZARD MAPS.
SAIYANG SINABI NA PARTIKULARMENTENG TOTOTOKAN KAN D-E-N-R SA PAAGI KAN MINES AND GEOSCIENCES BUREAU O M-G-B AN MGA BAGONG PANGYARING PAGBAHA DANGAN LANDSLIDE O PAGTUPAG NIN DAGA SA PROBINSIYA NIN ALBAY.
GINIBO NIYANG EHEMPLO AN PANGYARI SA BRGY. GABON SA POLANGUI BUDA AN SA MALABNIG GUINOBATAN NA TINAMAAN NIN KADAKUL NA PAGRASAY NIN DAGA, SIRING MAN AN MAHIWASAN NA PAGBABAHA SA MALINAO, ALBAY ASIN MAN SA HAROS KABILUGAN KAN PROBINSIYA.
IDINUGANG PA NIYA NA MAY PONDO MAN NA PIGKOKONSEGER AN AHENCIA HALE SA GOBYERNO PROBINSIYAL SA PAMAMAYO NI GOBERNADOR JOEY SALCEDA PARA SA PROCESO NIN PAGREPASO KAN GEOHAZARD MAPS.
KATAKOD KAINI, INABISOHAN NAMAN NI DIRECTOR FRAGADA AN MGA HEPE EHEKUTIBO NA MAGSUNOD SA ABISO KAN D-E-N-R NA PA-DAKITON NA SA IBANG LUGAR AN MGA NAKA-EROK SA MGA REKONOSIDONG “HIGH RISK AREAS” SA RASON NA PIGTATALAAN NA INI NI ENVIRONMENT SEC. RAMON PAJE BILANG “NO HABITATION ZONE”. (JESSEL BASANTA, DENR/PIA Sorsogon)
No comments:
Post a Comment