Sunday, November 25, 2012

DENR - V News Releases (in Bicol)



DENR, LANDBANK NAGPIRMA LIWAT NIN KASUNDUAN SA PAGPALANGUBO NIN 6 NA WATERSHED

SYUDAD NIN LEGAZPI, NOBYEMBRE 25 (PIA) – NAGKASUNDO LIWAT AN DEPARTMENT OF ENVIRONMENT AND NATURAL RESOURCES (D-E-N-R) SAKA AN LAND BANK OF THE PHILIPPINES (L-B-P) NA PAKARAYON AN HAROS 40 EKTARYA NIN NAKAKALBONG KABUBULDAN SA ANOM NA NAMEMELIGRONG WATERSHED O TINGALAN NIN TUBIG.

AN PROYEKTO KAN DUWANG DEPARTAMENTO NA PIG-APUD "ADOPT-A-WATERSHED" MINAPAPUSOG SA KATOYOHAN KAN NATIONAL GREENING PROGRAM O N-G-P NA MAPAKARHAY AN KAPASIDAD NA MAGBASYAR NIN TUBIG KAN MGA WATERSHED NA DULONG MAPAKUSOG KAN PRODUKSYON SA AGRIKULTURA SIRING MAN MAPANGATAMAN SA NATATADANG BUKID NA IYO AN PIG-EEROKAN KAN MGA BUHAY-LAGALAG O WILDLIFE.

AN KASUNDUAN MAGIGIN LYABE SA PAGPAKARHAY KAN 40 EKTARYA NIN NAKAKALBONG WATERSHED SA BUGALLON, PANGASINAN; SAN JOSE DEL MONTE, BULACAN; SAPANG DAKO, CEBU CITY; SITIO CALUNSONG, E-B MAGALONA; NEGROS OCCIDENTAL; PAQUIBATO; DAVAO CITY SAKA POLOMOLOK, SOUTH COTABATO.

AN PROYEKTO MAPOON SA SUNOD NA TAON SAGKOD TAON 2015. (Ruby Mendones, DENR-V/PIA Sorsogon)

----------------------------------------------

DENR BICOL PINAGPADRINOHAN AN PAGMUKNA NIN PANTALAN SA MOBO, MASBATE

SYUDAD NIN LEGAZPI, NOBYEMBRE 25 (PIA) – MAKAKAMTAN NA KAN BANWAAN KAN MOBO, SA MASBATE AN PANGITURUGAN NA PANTALAN KAN MUNISIPYO SA TAHAW KAN IMPLEMENTASYON KAN INTEGRATED COASTAL RESOURCES MANAGEMENT PROJECT (I-C-R-M-P) KAN DEPARTMENT OF ENVIRONMENT AND NATURAL RESOURCES (D-E-N-R) BICOL.

SINABI NI REBECCA MATUSALEM, PAMAYO KAN COASTAL AND MARINE MANAGEMENT DIVISION KAN D-E-N-R NA AN PROYEKTO MATAONG DALAN SA PANGANGATAMAN KAN REKURSOS SA DAGAT SAKA MAPA-ASENSO SA KABUHAYAN KAN MGA PASASIRA.

AN 100 METROS NA PANTALAN NA IMUMUKNA SA BRGY. PINAMARBUHAN, MOBO MASERBE SA PAGSISIRA BUDA PAGBYAHE NIN MGA KALAKAL SA MGA KATAID NA LUGAR.

PINAGTALAANAN NIN 11,496,978 PISOS AN PROYEKTO SA LINDONG KAN I-C-R-M-P ASIAN DEVELOPMENT BANK-GEF-GOP SA PAGSASARO KAN MUNICIPAL DEVELOPMENT FUND OFFICE. SA KATIRIPONAN KAN FUNDO, IGWA NIN 40% DIGDI AN GRANT O DONASYON, 45% AN UTANG, DANGAN AN HIRAS NA BABAYADAN KAN GOBYERNO LOKAL MAMUMUGTAK SA 15%.

NAGPOON NA AN KONSTRUKSYON KAN EDIPISYO KAN ENOT NA SEMANA KAN BULAN NA INI MATAPOS AN PAG-OYON KAN PROVINCIAL STEERING COMMITTEE, A-D-B SAKA M-D-F-O. (Ruby Mendones, DENR-V/PIA Sorsogon)

----------------------------------------------

SARONG PAG-AADAL KAN DENR-ERDS NANGGANA SA BCARRD RESEARCH & DEVELOPMENT SYMPOSIUM

SYUDAD NIN LEGAZPI, NOBYEMBRE 25 (PIA) – NAPILI BILANG SARO SA MGA MARAHAY NA PAG-AADAL SA REHIYON AN PROYEKTO KAN ECOSYSTEM RESEARCH AND DEVELOPMENT SERVICE (E-R-D-S) KAN DEPARTMENT OF ENVIRONMENT AND NATURAL RESOURCES (D-E-N-R) BICOL.

AN PROYEKTONG MAY TITULONG “STABILIZATION STRATEGIES FOR RIVERBANK AND FLOODPLAIN AREAS IN GUINOBATAN, ALBAY” NINDA ALEJO BALAGUER  SAKA E-R-D-S O-I-C REGIONAL TECHNICAL DIRECTOR BORBORAN IYO AN NAKAKUA KAN IKA-TULONG (3) PUESTO SA ISINAGIBONG REGIONAL RESEARCH AND DEVELOPMENT SYMPOSIUM KAN BICOL CONSORTIUM FOR AGRICULTURE RESOURCES RESEARCH AND DEVELOPMENT ( BCARRD) KAN NOBYEMBRE 5 TAON NA INI.

SA NASABING PAG-AADAL, KATOYOHAN KAINI AN BAYOPISIKAL NA PAGTANTAN O ASSESSMENT ASIN PAG-AARAM SA MGA PELIGRO; MAADALAN AN KALUYAHAN SA MGA KALAMIDAD KAN MGA LUGAR NA NASA PAGDULUNAN KAN SALOG SAN FRANCISCO BUDA MGA FLOOD PLAINS O BAHADA KAINI; DANGAN MAPAKARHAY AN KABUHAYAN KAN MGA KOMUNIDAD SA GILID NIN SALOG SA PAAGI KAN NAGKAKANIGONG DISASTER RISK MANAGEMENT.

PARTE PA KAN PAG-AADAL AN PAGMUKNA NIN MGA ISTRUKTURA SA PAGKONTROL NIN BAHA KUN SAEN 150 METRO AN ITINALAAN PARA SA BIOENGINEERING RIVERBANK SLOPE AND FLOOD CONTROL STRUCTURE. TULONG (3) DESENYO AN PIGTUGDOK NA KADA SARO IGWANG TIG-50 METROS NA LABA.

ENOT KAINI, SINABI NI R-T-D BORBORAN NA MASERBENG PANGENOT NA PAG-AADAL AN PROYEKTO NA PWEDE MAN ISAGIBO SA IBA PANG KOMUNIDAD SA REHIYON BILANG PANGSAGANG SA MGA KALAMIDAD DULO NA AN PAGBAHA. (Ruby Mendones, DENR-V/PIA Sorsogon)

No comments: