SYUDAD NIN LEGAZPI, Abril 8 – Nagsagibo
nin mahalagang lakdang an Department of Environment and Natural Resources sa
pagprotehir kan ginhawa kan mga Pilipino tumang sa polusyon sa paros sa paagi
kan paghusay kan Air Quality Standard na pig-aapud na PM2.5 o an alpog na may
sukol 2.5 micrometers sa katahawan buda mas sadayot.
Sosog sa pag-aadal kan DENR, an PM2.5
sarong pinong alpog na manunumpungan sa aso o ambon, asin ini direktang
pig-uulanto hale sa mga kasulo sa kadlagan, o napoporma kapag an aso hale sa
mga planta kan kuryente, industriya buda mga behikulo, nagkakaigwang reaksyon
sa duros.
Kasabay kaini, sinabi ni DENR Bicol Regional
Executive Director Gilbert Gonzales na an PM2.5 may peligrong dolot sa salud,
na nakaka-apekto sa puso asin baga dangan pwedeng magkawsa nin dulong
delikadong problema sa ginhawa.
Enot kaini, piglagdaan ni Environment
Sec. Ramon Paje an Department Administrative Order (DAO) No. 2013-13 na
minapanuytoy sa National Ambient Air Quality
Guideline Value (NAAQGV) para sa PM2.5 sa 75 micrograms per Normal Cubic Meter (µg/Ncm) sa laog nin 24 oras o
mas halipot na durasyon, saka 35 µg/Ncm para sa laog nin sarong taon o halawig
na durasyon, sa poon kan pagpa-otob kan dao sagkod sa Disyembre 31, 2015.
Sa lindong kan panundanan, mas
magigin higot an sukulan matapos an taon 2015 kun saen itatalaan an NAAQGV para
sa halipot dangan halawig na durasyon sa 50 buda 25 µg/Ncm pagpoon kan Enero 1,
2016.
Tinawan nin doon ni Gonzales na an
siring na lakdang sosog sa itinatalaan kan Republic Act 8749 o an Phil. Clean Air
Act kan taon 1999. (RLMendones, DENR-V, RPAO/PIA Sorsogon)
No comments:
Post a Comment