Tagalog News Release
SORSOGON PROVINCE – Naging matagumpay ang ginawang shooting competition ng mga kasapi ng Philippine National Police sa buong lalawigan noong unang linggo ng Hulyo dito sa lungsod ng Sorsogon.
Ang dalawang araw na provincial director’s cup shooting competition ay ang kauna-unahang shooting competition sa Sorsogon kung saan isinagawa ito sa Firing Range ng Brgy. Buhatan, Sorsogon City sa pangunguna ni Sorsogon Police Provincial Director PSSupt. Heriberto Olitoquit.
Ayon kay Olitoquit, bahagi din aniya ito ng kanilang pagdiriwang ng Police Community Relations Month kung saan layon ng aktibidad na magkaroon ng firearms proficiency o husay sa pamamaril ang buong pwersa ng pulisya dito sa lalawigan ng Sorsogon sa pamamagitan ng isang friendly shooting competition.
Naging matagumpay ang shooting competition matapos na lahukan ito ng iba’t-ibang mga team representatives mula sa mga municipal at city police stations kasama na rin ang mga kinatawan mula sa Sorsogon Police Provincial Office.
Tinanghal naman bilang best shooter sa kategorya ng mga opisyal si SPPO admin officer Police Senior Inspector Honesto A. Garon.
Sa kategorya ng mga kababaihan ay nanguna naman si PO2 Emilia Domino ng Pilar Municipal Police Station habang si PO2 Ali Ferolino ng Barcelona Municipal Police Station naman ang sa kategorya ng mga kalalakihan.
Sa pagtatapos ng kompetisyon, binigyang-diin ni PD Olitoquit ang kahalagahan ng pagiging sharp shooter at mabilisang pagtarget ng mga pulis lalo na kung nahaharap sila sa mga enkwentro.
Pinuri naman ng mga pulis ang hakbang na ito ng SPPO dahilan sa anila’y nabibigyan din sila ng pagkakataong tasain ang kanilang mga kakayahan lalo na sa paggamit ng kanilang mga baril. (PIA Sorsogon/ may ulat mula sa SPPO)
No comments:
Post a Comment