LEGAZPI CITY, MARCH 6 ---- PIGHAHAGAD NI ENVIRONMENT SEC. RAMON PAJE SA MGA LEHISLADOR AN MARIKAS NA PAGRESOLBER SA NAGPAPADAGOS NA PANGGAGADAN SA MGA PERSONAHES NA INBUELTO SA PANGATAMAN KAN KABUBULDAN SA PAAGI KAN PAGPASAR KAN LEYE NA MINATALAAN SA ILEGAL NA PAGTROSO BILANG MAGABAT NA KRIMEN O HEINOUS CRIME.
AN NAUNAMBITAN NA PANGAPUDAN PIGTUNGKUSAN NI PAJE SA TAHAW KAN PANGGAGADAN SA SARONG TAWOHAN KAN D-E-N-R SA AGUSAN DEL SUR NIN PIGSUSUPUNERAN NA ILEGAL NA PARATROSO.
KAN NAKALIHIS NA PEBRERO 22, AN D-E-N-R TREE MARKER NA SI JAIME DIEZ, 45 ANYOS AN BINADIL-GADAN SA LAOG KAN SAIYANG HARONG SA BAYUGAN, AGUSAN DEL SUR, 15 DIAS MATAPOS NA SAKYADAHON SI FORESTRY SPECIALIST MELANIA DIRAIN, 47 ANYOS SA LAOG KAN OPISINA SA SANCHEZ MIRA, CAGAYAN KAN PEBRERO 7, 2012.
ENOT KAINI, IPIG-ORDEN NI PRESIDENTE AQUINO SA D-E-N-R, DEPARTMENT OF INTERIOR AND LOCAL GOVERNMENT, DEPARTMENT OF NATIONAL DEFENSE, PHIL. NATIONAL POLICE, BUDA FUERSAS ARMADAS AN MAS PINAKUSOG NA KAMPANYA KONTRA SA ILEGAL NA PAGTROSO KAUBAY NA AN PAGPROTEHIR SA MGA FOREST LAW ENFORCERS O MGA PERSONAHES SA PANGATAMAN NIN KABUBULDAN.
IPINAHAYAG NI PAJE NA SINDA DIEZ SAKA DIRAIN PARTE SANA KAN NAGLALAWIG NA LISTAHAN NIN MGA TAGAPANGATAMAN KAN KAPALIBUTAN NA IYO AN NAGDUSAY NIN BUHAY SA PAGGAMPAN KAN SAINDANG TRABAHO. IPINALIWANAG KAN OPISYAL NA KUN AN MGA NAGTUTULAK NIN DROGA SAGKOD NAGSASABOTAHE NIN EKONOMIYA IYO AN PIGPAPATAWAN KI MAGABAT NA PINALIDAD DARA KAN PAGRATAK SA BUHAY ASIN PAMILYA, DULONG MAY RASON NA AN MGA ILEGAL NA PARATROSO PATAWAN MAN KI KAPAREHAS NA PADUSA DAHIL TA AN KAGADANAN NA SAINDANG DULOT BAKO SANA NAGRARAOT KAN MGA BUHAY BUDA PAMILYA NUDI MAGIN MGA KOMUNIDAD SA KADA BES NA MAY PIGPAPALOD SINDANG KAKAHOYAN.
SA NGONYAN NAKASANGAT SA KAMARA DE REPRESENTANTES AN HOUSE BILL 00744 NA PIG-UUSOL NI REP. JANE TAN CASTRO KAN CAPIZ NA NAGMAMAWOT NA ITALAAN NA HEINOUS CRIME O MAY KAPADUSAHANG CAPITAL PUNISHMENT AN ILEGAL NA PAGTROSO. (Ruby Mendones, DENR/PIA Sorsogon)
No comments:
Post a Comment