City Veterinary Office nakikiisa sa pagdiriwang ng Sosogon Festival 2012

Ni: Bennie A. Recebido

LUNGSOD NG SORSOGON, Nobyembre 29 (PIA) – Sa pamamagitan ng pagbibigay ng mga libreng serbisyo, nakikiisa ang City Veterinary Office (CVO) sa gagawing pagdiriwang ng Sosogon Festival ng Sorsogon City ngayong taon.

Ayon kay City Veteterinary Technician Arwill Liwanag, sinadya nilang isabay ang aktibidad sa Sosogon Festival nang sa gayon ay mas marami ang makakapansin at mas mapapalawak nila ang pagpapabot ng kaalaman sa publiko ukol sa tamang pangangalaga sa mga alagang hayop.

Tampok sa kanilang aktibidad ang pagsasagawa ng “Love Dog Services” o libreng serbisyo para sa mga alagang aso sa darating na ika-14 ng Disyembre, 2012 simula alas otso ng umaga hanggang alas singko ng hapon.

Ayon kay Liwanang, babakunahan nila ng kontra rabis ang mga aso at magsasagawa din sila ng neutering o pagkakapon ng mga lalaking aso at spaying o pagtanggal ng matris ng mga babaing aso.

Aniya, maliban sa nasabing mga serbisyo ay magsasagawa din sila ng hair trimming, nail clipping, ear cleaning at paggamot sa kuto o garapata ng mga alagang aso.

Kaugnay ng mga aktibidad na ito, nanawagan ang pamunuan ng City Veterinary Office sa pamumuno ni City Veterinarian Dr. Alex Destura sa mga residente ng lungsod ng Sorsogon na samantalahin ang libreng serbisyong  ito para na rin masuri ang kalagayan ng mga alagang aso at maiwasang mahawaan ng sakit ng aso ang mga nakatira sa loob ng tahanan.

Ayon pa kay Liwanang, sinisikap ng CVO na mapangalagaan ang kalusugan ng publiko sa pamamagitan ng pagmamantini din ng kalinisan ng kanilang mga alagang hayop lalo na kung nakatira sila sa iisang bahay.

Samantala, ang Sosogon Festival ay ipinagdiriwang sa buwan ng Disyembre bilang pasasalamat ng lungsod sa mga biyayang natanggap sa buong taon at bilang paggunita na rin sa pagkakatatag ng Sorsogon City noong ika-16 ng Disyembre 2000.

Sisimulan ang pagdiriwang ng Sosogon Festival mula ika-walo hanggang ika-16 ng Disyembre 2012 kung saan aabangan ng mga taga-lungsod at ng mga bibisita dito ang makukulay na aktibidad lalo pa’t natataon ito sa kapanahunan ng pasko.(BARecebido, PIA Sorsogon)