Barangay Election mapayapang naidaos kahapon sa Sorsogon

Mga botante habang naghahanap ng kanilang pangalan.

LUNGSOD NG SORSOGON, Oktubre 29 (PIA) – Naging mapayapa sa kabuuan ang naging pagtatasa ng mga awtoridad sa naganap na Barangay Election kahapon, Oktubre 28, 2013. Sa tulong ng mga guro na nagsilbing Board of Election Inspectors (BEI) para sa eleksyon naging mas mabilis ang daloy ng botohan sa mga presinto na itinalaga  sa  bawat  barangay.

Ayon kay Sorsogon City Police Chief PSupt Aarne Oliquiano, wala silang naitalang anumang mga insidente o karahasang maaaaring maiugnay sa naganap na halalan.

Eksaktong alas-syete ay binuksan na ang mga voting precincts para sa pagboto. Maliban sa naging kalituhan ng ilan sa paghahanap ng kanilang pangalan, malakas na buhos ng ulan sa ilang mga lugar sa lalawigan, at iilang mga reklamo ukol sa paglabag sa ilang mga panuntunan ng Commission on Election (Comelec) ay nanatiling mapayapa, maayos at ligtas ang naganap na halalan. 

Alas-syete pa lamang ay nakahanay na ang mga botante.

Maging ang Comelec Sorsogon ay ikinasiya din ang naging resulta ng halalan sa barangay ngayon.

Nakalulungkot nga lang isipin ayon sa ilang mga obserbador na sa barangay level kung saan napakalaki ng papel na ginagampanan ng mga opisyal ng barangay sa pag-unlad ng komunidad ay kakambal na ng botohan ang vote buying. Kaugnay nito, panawagan ng mga obserbador na nawa’y matutunan ng mga botante na sagrado ang boto at hindi ito dapat na ipagbili.

Natapos ang eleksyon sa ganap na alas-tres ng hapon at sinimulan agad ang bilangan para malaman ang mga nanalo sa mga barangay. Hindi na rin inabot ng hatinggabi ang bilangan lalo pa’t kumpara sa mga nakaraang eleksyon na gumagamit ng PCOS machine, ay mas maraming mga presinto ang binuksan ngayon dahilan upang mabawasan ang pagsisiksikan at pagkakaantala sa pagboto.

Maging ang mga bilanggo ng Sorsogon Provincial Jail ay binigyan din ng pagkakataong makaboto kung saan umabot din sa mahigit dalawang-daan ang naging botante sa loob.

Matapos naman ang bilangan ay agad na ring iprinoklama ang mga bagong halal na opisyales ng barangay. Hanggang sa sinusulat ang balitang ito ay walang naitalang anumang mga pagpoprotesta mula sa mga natalong kandidato at kung titingnan sa kabuuan ay mahinahon naman ang mga ito na tinanggap ang kinahinatnan ng botohan sa barangay ngayong taon. (AJamisola/BARecebido, PIA-5/Sorsogon)