Apat pang proyekto sa ilalim ng PAMANA-DILG Fund, inindorso ng PPOC

Ni: Bennie A. Recebido

LUNGSOD NG SORSOGON, Agosto 8 (PIA) – Matapos ang masusing pag-aaral at deliberasyon ng mga kasapi ng Sorsogon Provincial Peace and Order Council (PPOC) Technical Working Group sa kumpletong mga dokumento, iprinisinta na sa mga kasapi ng PPOC ang apat na mga proyekto sa bayan ng Magallanes upang aprubahan at ma-iindorso na ito sa Regional Peace and Order Council (RPOC).

Ang mga proyekto ay kinabibilangan ng pagpapaganda pa ng Lourdes Grotto sa Brgy, Behia na nagiging popular at dinarayo na ng mga turista at deboto lalo na sa panahon ng kwaresma; pagsasaayos at pagpapaganda pa ng Bucalbucalan Spring sa Brgy. Aguada Sur; Evacuation Center; at mga kagamitan sa panahong nagkakaroon ng mga kalamidad.

Ayon kay Department of Interior and Local Government (DILG) provincial director Ruben Baldeo, ang mga ito ay kasama din sa popondohang proyekto sa ilalim ng Payapa at Masaganang Pamayanan – Department of Interior and Local Government (PAMANA-DILG) 2012 Fund Phase III project.

Matatandaang una nang inindorso ng PPOC sa RPOC ang pitong proyekto sa mga bayan ng Casiguran, Juban, Barcelona, Gubat at Irosin upang maaprubahan na ito.

Ayon kay Baldeo sakaling maaprubahan na ang mga proyektong ito ay mailalabas na ang tig-lilimang milyong pondo bawat proyekto, at agaran na ring masisimulan ang implementasyon nito. (BARecebido, PIA Sorsogon)